ޑަބްލިއުއެޗްއޯގެ މެންބަރުކަން ފަލަސްތީނަށް ލިބުމަކީ ހަމަޖެހުން ޤާއިމްކުރުމަށް އެޅުނު މުހިންމު ފިޔަވަޅެއް - ރައީސް

ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)ގެ މެންބަރުކަން ފަލަސްތީނަށް ލިބުމަކީ ހަމަޖެހުން ޤާއިމްކުރުމަށް އެޅުނު މުހިންމު ފިޔަވަޅެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ ސިއްޙަތު ޖަމިއްޔާގެ މެންބަރުކަން ފަލަސްޠީނަށް ލިބުމުން މަރުޙަބާ ވިދާޅުވެ މީސްމީޑިއާގައި ކުރެއްވި ޕޯސްޓެއްގައެވެ.

އެ މަނިކުފާނު ވަނީ 77 ވަނަ ވޯލްޑް ހެލްތު އެސެމްބްލީގައި ދުނިޔޭގެ ސިއްޙަތު ޖަމިއްޔާގެ މެންބަރުކަން ފަލަސްތީނަށްދީ އެ ޤައުމުގެ ޙައްގުތައް ކަށަވަރުކުރުމަށް ކުރަމުންދާ މަސައްކަތުގައި ވޯޓުދިން 101 ޤައުމުގެ ތެރޭގައި ރާއްޖެ ވެސް ހިމެނޭކަން ފާހަގަކުރައްވާފައެވެ. މިއީ ފަލަސްތީނަކީ ފުރިހަމަ ދައުލަތެއްގެ ގޮތުގައި ބަލައިގަތުމަށް ބައިނަލްއަގުވާމީ ތާއީދު އިތުރުވަމުންދާކަމުގެ ހެއްކެއް ކަމަށް ރައީސް ވަނީ ވިދާޅުވެފައެވެ. ރައީސުލްޖުމްހޫރިއްޔާ ވަނީ ފަލަސްތީނަށް ލިބެންޖެހޭ ޙައްގުތައް ކަށަވަރުކުރުމަށާއި ބައިނަލްއަގުވާމީ ޖަމިއްޔާ ޖަމާޢަތްތަކުގައި ފުރިހަމަ މެންބަރުކަން ފަލަސްތީނަށް ލިބުމަށް ދިވެހިން ފުރިހަމައަށް ތާއީދު ކުރާ ކަމަށް ވެސް ވިދާޅުވެފައެވެ. ރާއްޖެއިން ޑަބްލިއުއެޗްއީގެ މެންބަރުކަން ފަލަސްތީނަށް ދިނުމަށް ނިންމި ނިންމުމަށް ދިވެހިރާއްޖެއިން ތާއީދު ކުރާ ސަބަބަކީ އެއީ ކަމަށް ވެސް ރައީސް ވިދާޅުވިއެވެ.

ވޯލްޑް ހެލްތު އެސެމްބްލީގައި ދުނިޔޭގެ ސިއްޙަތު ޖަމިއްޔާގެ މެންބަރުކަން ފަލަސްތީނަށް ދިނުމަށް ހުށަހެޅި މައްސަލަ ދިވެހިރާއްޖެއިން ވަނީ ކޯ ސްޕޮންސަރ ކޮށްފައެވެ. ރައީސް މިފަދައިން ވިދާޅުވެފައިވާއިރު ފޮރިން މިނިސްޓަރ މޫސާ ޒަމީރު ވަނީ ޑަބްލިއުއެޗްއޯގެ މެމްބަރަކަށް ފަލަސްތީން ވުމަކީ ފަލަސްތީނުގެ ޙައްގުތަށް ކަށަވަރުކުރުމަށް ދުނިޔޭގެ ބޮޑު ބައެއް ތާއީދު ކުރާކަމުގެ ނިޝާނެއް ކަމަށް ވިދާޅުވެފައެވެ. އެ މަނިކުފާނު ވިދާޅުވީ އެ ނިންމުމާއެކު ފަލަސްތީނަށް ދުނިޔޭގެ ސިއްޙަތު ޖަމިއްޔާގެ ހިތޯބުތައް ދީ، ޕްރޮޕޯސަލްތަކާއި މައްސަލަތައް ހުށަހެޅުމުގެ ހައްގު ލިބިގެންދާނެ ކަމަށެވެ. ހަމައެހެންމެ 1967 ވަނަ އަހަރުގެ ކުރިން ބޯޑަރު އޮތްގޮތަށް އިރުމަތީ ޤުދުސަކީ ފަލަސްތީނުގެ ވެރިރަށް ގޮތުގައި ކަނޑައެޅުމަށް ދިވެހިރާއްޖެއިން ތާއީދު ކުރާ ގޮތް ކަމަށް އެ މަނިކުފާނު ވަނީ ވިދާޅުވެފައެވެ.