ގާޒާ ހަނގުރާމަ ހުއްޓާލަފާނެ ކަމުގެ އުއްމީދެއް – ހަމާސް އިން ބައިޑެންގެ ހުށަހެޅުމަށް ތާއީދު ކުރާ ކަމުގެ އިޝާރާތެއް!

އެމެރިކާގެ ރައީސް ބައިޑްން ހާމަ ކުރެއްވި ހަނގުރާމަ ހުއްޓާލުމުގެ ޕްލޭނަށް ހަމާސް އިން ތާއީދު ކުރާ ކަމުގެ އިޝާރާތެއް ދިނުމާއެކު، 8 މަސް ދުވަހަށް ދިގު ދެމިގެން ދިޔަ ގާޒާގެ ހަނގުރާމަ ނިމުމަކަށް އަތުވެދާނެ ކަމުގެ އުއްމީދު ލިބިއްޖެ ކަމަށް މަސްރަހް ދިރާސާ ކުރާ ފަރާތްތަކުން ހާމަ ކޮށްފިއެވެ.

މި ހަނގުރާމައިގައި މިހާތަނަށް 36،000ށް ވުރެ ގިނަ ފަލަސްތީނުގެ ރައްޔިތުން ވަނީ މަރުވެފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.

ބައިޑްންގެ ހުށަހެޅުއްވުން "ފޮސިޓިވް" ކޮށް ދެކޭ ކަމަށް ހަމާސް އިން ބުނި ނަމަވެސް ރަފަހްގެ ޖަބާލިއާގައި ހަމާސް އާއި އިޒްރޭލް ސިފައިންނާ ދެމެދު ވަރުގަދަ އަށް ހަމަލާ ތައް ބަދަލު ކުރެވެމުންދާ ކަމަށް އަލް ޖަޒީރާ އިން ބުނެފައިވެއެވެ.

އަނެއްކޮޅުން ދެކުނު ގާޒާގެ ރަފަހް ސިޓީއަށް އިޒްރޭލް ސިފައިން އަރާ މި ފާއިތުވި 3 ހަފްތާގައި ހިންގާފައިވާ އުދުވާން ތަކުގެ ސަބަބުން އެ ސިޓީގައި ދިރިއުޅޭ މީހުން ވަރަށް ނިކަމެތި ހާލުގައި ތިބި ކަމަށް އދ. ގެ ކާނާ އާ ބެހޭ އޭޖެންސީން ވަނީ ބުނެފައެވެ.

އިޒްރޭލުން ހަމާސް އަށް ހުށަހެޅި ސުލްހައިގެ ޕްލޭން ނޫސްވެރިންނަށް ހާމަ ކުރައްވަމުން ހުކުރު ދުވަހު އެމެރިކާގެ ރައީސް ބައިޑްން ވިދާޅުވީ، "މި ހަނގުރާމަ ނިމުމަކަށް ގެންނަން ޖެހޭ ވަގުތު އަތުވެއްޖެ" ކަމަށެވެ.

އިޒްރޭލުން ހުސްވި އަހަރުގެ އޮކްޓޯބަރު މަހުން ފެށިގެން ގާޒާ އަށް ދެމުންދާ ހަމަލާތަކުގައި މިހާތަނަށް 36.284 ފަލަސްތީން މީހުން ވަނީ މަރުވެފައެވެ. މީގެ އިތުރު އިޒްރޭލުގެ ހަމަލާތަކުގައި ޒަޚަމްވި މީހުންގެ އަދަދު 82،057ށް ވަނީ އަރާފައެވެ.