މަޖިލީހުގެ ރައީސް ހޮވުމަށް ނެގި ވޯޓުގެ ނަތީޖާއިން އެނގިގެންދިޔައީ އެމްޑީޕީގެ މެންބަރުންނާއެކު މަސައްކަތް ކުރެވޭނެ އެހެން މެންބަރުން ތިބިކަން - ނާޒިލް
29 މެއި 2024 | ބުދަ 05:08މަޖިލީހުގައި ތިއްބަވާ ޕީއެންސީގެ 75 މެމްބަރުންގެ އިތުރުން ސަރުކާރާ އެއްކޮށް މަސައްކަތް ކުރާ ތިން ޕާޓީގެ ހަތަރު މެންބަރަކު ތިއްބަވާ
އެމްޑީޕީގެ ޕީޖީ ލީޑަރު އިބްރާހިމް ނާޒިލް
20 ވަނަ ރައްޔިތުންގެ މަޖިލީހުގެ ރައީސް ހޮވުމަށް ނެގި ވޯޓުގެ ނަތީޖާއިން އެނގިގެންދިޔައީ އެމްޑީޕީގެ 12 މެންބަރުންނާއެކު މަސައްކަތް ކުރެވޭނެ އެހެން މެންބަރުން ތިބިކަން ކަމަށް އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން ހިތަދޫ ދެކުނު ދާއިރާގެ މެންބަރުކަން ވެސް ކުރައްވާ އިބްރާހިމް ނާޒިލް ވިދާޅުވީ ޕީއެންސީގެ މެންބަރުން ކަންކުރައްވާނީ ކިހިނެއްތޯ އެމްޑީޕީގެ މެންބަރުން އެއްވެސް ވަރަކަށް ނުވިސްނަވާ ކަމަށެވެ. އެމްޑީޕީގެ މެންބަރުން ބޭނުންވީ އެމްޑީޕީގެ އާންމު މެންބަރުންނަށް، އެމްޑީޕީގެ މެންބަރުން ތިބީ އެކީގައި އެއް އަޒުމެއްގައި ކަން ސާބިތުކޮށްދިނުމަށް ކަމަށެވެ. ނާޒިލް ވިދާޅުވީ އެމްޑީޕީގެ 12 މެންބަރުންގެ އިތުރުންވެސް އެމްޑީޕީގެ މެންބަރުންނާއެކު މަސައްކަތް ކުރެވޭނެ އެހެން މެންބަރުން ތިބިކަން ވޯޓުގެ ނަތީޖާއިން ފާހަގަ ވެގެންދިޔަ ކަމަށެވެ.
މަޖިލީހުގެ ރައީސްކަމަށް އަބްދުއްރަހީމް އައްޔަންކުރުމަށް ވޯޓު ދެއްވީ، އެ ވޯޓުގައި ބައިވެރިވެވަޑައިގެންނެވި 92 މެމްބަރުންގެ ތެރެއިން 71 މެންބަރުންނެވެ. އެމަނިކުފާނާ ވާދަކުރެއްވި އެމްޑީޕީގެ، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އަށް ވޯޓު ދެއްވީ 14 މެންބަރުންނެވެ. ބާތިލް ވޯޓުގެ އަދަދަކީ 7 އެވެ.
މަޖިލީހުގައި ތިއްބަވާ ޕީއެންސީގެ 75 މެމްބަރުންގެ އިތުރުން ސަރުކާރާ އެއްކޮށް މަސައްކަތް ކުރާ ތިން ޕާޓީގެ ހަތަރު މެންބަރަކު ތިއްބަވައެވެ. އެހެންކަމުން އެ އަދަދަށް ބަލާ ނަމަ އަބްދުއްރަހީމަށް މަދުވެގެން 79 ވޯޓު ލިބިވަޑައިގަންނަވަންވާނެ ކަމަށް ވޯޓުގެ ކުރިންވެސް އޮތީ ބެލެވިފައެވެ. މަޖިލީހުގެ ރިޔާސަތުގައި އިންނެވި ސިޔާމް ނުހިމަނާ ވޯޓުގައި ބައިވެރިވީ ސަރުކާރުގެ 78 މެންބަރުންނެވެ.
