ވަގަށް ނަގާފައިވާ ނޫސްވެރިޔާ އަހުމަދު ރިލްވާން އަބްދުﷲގެ މައްސަލައިގެ މައުލޫމާތު ފުލުހުން ހިއްސާ ނުކުރާތީ އާއި ތަޙްގީގު އަވަސް ކޮށްދިނުމަށް ގޮވާލައި ބޭއްވި ހިނގާލުމަށް ފުލުހުން ހުރަސް އަޅައިފިއެވެ.

އަންގާރަ ދުވަހުގެ ހަވީރު 4:30 ކަންހާއިރު ހުޅުމާލޭ ފެރީ ޓާރްމިނަލް ކުރިމަތިން ފެށި މި ހިނގާލުމުގައި ރިލްވާންގެ އާއިލާގެ މެމްބަރުންނާއި ގާތް އެކެވެރިންގެ އިތުން ރައްޔިތުންގެ މަޖިލީހުގެ މެމްބަރުން ވަނީ ބައިވެރިވެފައެވެ. މަޖީދީމަގާއި ޖަނަވަރީ މަގާއި ގުޅޭ ކަންމައްޗާ ހަމައަށް ހިނގާލުމުގެ ބައިވެރިން ދިއުމާއި އެކު އެސްއޯ ފުލުހުން މަގު ބަންދުކޮށް ޕެޕާސުޕްރޭ ޖެހިއެވެ. ފެންކަޅިވެފައިވާ ރިލްވާންގެ މަންމަގެ ލޮލަށް ޕެޕާސްޕްރޭ ޖެހުމުން އެކަމާއި ރައްޔިތުންގެ މަޖިލީހުގެ ގަލޮޅު ދެނކުނު ދާއިރާގެ މެމްބަރު އަހުމަދު މަހުލޫފާއި ރައްޔިތުންގެ މަޖިލީހުގެ ހެންވޭރު ދެނކުނު ދާއިރާގެ މެމްބަރު އަހުމަދު އަބްދުލް ކަރީމް  ހިތްހަމަ ޖެހިވަޑައިނުގެން އަޑު އުފުލުމުން ފުލުހުންގެ ބެލުމުގެ ދަށަން ގެންދިޔައެވެ. 

ފުލުހުން ޖެހި ޕެޕާސްޕްރޭއަކަށް ނުބަލައި ހިނގާލުމުގެ ބައިވެރިން "ރިލްވާން ކޮބާހޭ" ކިޔާ އަޑު އުފުލަމުން ދަނިކޮށް އަނެންކާ ވެސް މަޖިދީ މަގު ބަންދުކޮށް ޕެޕާސްޕްރޭ ޖަހާ ހަތް މީހުން ފުލުހުންގެ ބެލުމުގެ ދަށައް ގެންދިއެވެ. އަދި ހިނގާލުމުގެ ބައިވެރިން އަތުގައި ހުރި ޕޯސްޓަރުތައް ފުލުހުން އަތުލިއެވެ.

މިކަމާއި ގުޅިގެން ފުލުހުން ބުނީ ހިނގާލުން ރޫޅާލައިފައި ވަނީ ސުލްހަވެރިކަމާއި އެއްވެއުޅުމުގެ ގާނޫނާއި ހިލާފްވުމުން ކަމަށެވެ. ފުލުހުން ވަނީ ހިނގާލުމުގެ ބައިވެރިންނަން މަޖިދީ މަގަށް ނުނިކުމޭނެ ގޮތަށް އެމަގާއި އިންވެހުރި ގޯޅިތަން ބަންދުކޮށްފައެވެ. ހިނގާލުމުގައި ފުލުހުން ކަންކަންކުރި ގޮތާއި، ރިލްވާންގެ މައްސަލާއިގެ ތަހްގީގް ކުރިއަށް ނުދާތީ މޯލްޑިވަން ޑިމޮކްރަސީ ނެޓްވޯކްގެ ފަރާތުން ވަނީ ކަންބޮޑުވުން ފާޅުކޮށްފައެވެ. އަދި ރިލްވާންގެ އާއިލާގެ ފަރާތުން ފުލުހުންގެ އަމަލުކުރި ގޮތުން ހިތާމަ ކުރާކަމަށް ވަނީ ބުނެފައެވެ.

މިނިވަން ނޫހުގެ ނޫސްވެރިޔާއަށް އިންޒާރުތަކަކަށް ފަހު ވަގަށް ނަގާފައި ވަނީ 2014 ވަނަ އަހަރުގެ އޮގަސްޓް އަށް ވަނަ ދުވަހު އެވެ. މި މައްސަލައާ ގުޅިގެން އެންމެ ފުރަތަމަ ފުލުހުން ހިންގި ތަހުގީގުގައި ރިލްވާން ވަގަށް ނެގި ރޭ އޭނާގެ އެޕާޓްމެންޓް ސަރަހައްދުން ފެނުނު ރަތްކާރާއި އެތަނުން ފެނުނު ވަޅިއަކީ އެ މައްސަލައާ ގުޅޭ ކަމެއް ނޫން ކަމަށް ހާމަކޮށްފައިވީ ނަމަވެސް އޭގެ އެއް އަހަރު ފަހުން ފުލުހުން ބޭއްވި ނޫސްވެރިންގެ ބައްދަލުވުމުގައި ވަނީ އެއީ އެ މައްސަލައާ ގުޅޭ ކަމެއްގެ ގޮތުގައި ފާހަގަކޮށްފަ އެވެ.  އެ ކާރުން ފެނުނު އިސްތައްޓަކުން ނެގި ޑީއެންއޭ އާއި ރިލްވާންގެ މަންމަގެ ޑީއެންއޭއާ ދިމާވާ ކަމަށް ފުލުހުން ބުނެފައި ވެއެވެ.