ފުރަތަމަ ހަތަރު މެޗު ނިމުނުއިރު ފެންޓަސީ ދިވެހި ޕްރިމިއާ ލީގަށް ބޮޑު ތަރުހީބެއް!

ފުރަތަމަ ހަތަރު މެޗު ނިމުނުއިރު، ފެންޓަސީ ދިވެހި ޕްރިމިއާ ލީގަށް ބޮޑު ތަރުހީބެއް ލިބިފައިވާ ކަމަށް ފެންޓަސީ ފުޓުބޯޅައިގެ ކްރިއޭޓިވް ޑައިރެކްޓާ އަލީ ސަބަތު ވިދާޅުވެއްޖެ އެވެ.

ރާއްޖެއެމްވީ އަށް މައުލޫމާތު ދެމުން ސަބަތު ބުނީ ފެންޓަސީ ފުޓުބޯޅައިގައި ބައިވެރިވުމަށް މި މަހުގެ ދެވަނަ ދުވަހު ހުޅުވާލި ކަމަށާއި، އެގޮތުން ފުރަތަމަ ހަތަރު މެޗަށް 500 އަށްވުރެ ގިނަ ޓީމް ރަޖިސްޓާ ކޮށްފައިވާ ކަމަށެވެ.

ސަބަތު ބުނީ ހުކުރު ދުވަހު ލީގު ފަށާފައިވާއިރު، ފައިނަލް ޓީމް ލިސްޓްތައް ލިބުމަށް ދަތިތަކާ ކުރިމަތިވި ކަމަށާއި، އެހެންނަމަވެސް ރަޖިސްޓްރީކުރަން ހުޅުވާލި ފުރުސަތުގައި ގިނަ އަދަދެއްގެ ޓީމުތައް ވަނީ ރަޖިސްޓްރީކޮށްފައިވުމުން އެއީ ބޮޑު ތަރުހީބެއްކަމަށް ދެކޭ ކަމަށެވެ.

ދިވެހި ޕްރިމިއާ ލީގުގައި ވާދަކުރާ ޓީމުތަކުގެ ކުޅުންތެރިންނަށް ހިޔާލީ އަގުތަކެއް ދީފައިވާއިރު، ކޮންމެ ބައިވެރިއަކަށް ވެސް އޭނާ ހަދާ ޓީމަށް ކޮންމެ މެޗު ހަފުތާއެއްގެ ކުރިން ކުޅުންތެރިން ގަނެ ވިއްކޭނެ އެވެ. އެ ބައިވެރިއަކަށް ޕޮއިންޓް ލިބޭނީ، އެ މެޗު ހަފުތާއެއްގައި ލީގުގައި ކުޅޭ މެޗުތަކުގައި ނުކުންނަ ނަތީޖާ އާއި ކުޅުންތެރިންގެ ޕާފޯމަންސަށް ބަލައިގެން ކަނޑައަޅާފައިވާ މިންގަނޑަކުންނެވެ. އަދި ޖެހިގެން އަންނަ މެޗު ހަފުތާއަކަށް އަނެއްކާ ވެސް ޓީމަށް ބަދަލު ގެނައުމުގެ ފުރުސަތު ލިބޭނެ އެވެ.

ފެންޓަސީ ލީގުގެ ޗެމްޕިއަންކަން ލިބޭނީ، ލީގު ނިމޭއިރު އެންމެ ގިނަ ޕޮއިންޓް ލިބޭ ފަރާތަކަށެވެ. ޗެމްޕިއަން ބައިވެރިއާއަށް ޔުއެފާ ޗެމްޕިއަންސް ލީގުގެ މެޗެއް ބަލަން ދިއުމުގެ ފުރުސަތު ލިބޭނެ އެވެ. މީގެ އިތުރުން ވެސް އެހެނިގެން އިނާމްތައް ލިބޭނެ ކަމަށް ސަބަތު ވަނީ ބުނެފައެވެ.

ރާއްޖޭގައި އެންމެ މަގުބޫލޫ އިނގިރޭސި ޕްރިމިއާ ލީގުގެ ފެންޓަސީ ލީގަށްވާއިރު، އޭގައި 7000 ވަރަކަށް ދިވެހިން ބައިވެރިވެ އެވެ. މި ފަހަރުގެ ދިވެހި ޕްރިމިއާ ލީގުގައި ވާދަކުރަނީ މާޒިޔާ ސްޕޯޓްސް އެންޑް ރެކްރިއޭޝަން، ނިއުރޭޑިއަންޓް ސްޕޯޓްސް ކްލަބް، ޓީސީ ސްޕޯޓްސް ކްލަބް، ގްރީން ސްޓްރީޓް، ދ.ކުޑަހުވަދޫ، ގދ.ތިނަދޫ، ނ.މިލަންދޫ އަދި އއ.މާޅޮހެވެ.