މިރޭ ކުޅުމަށް ހަމަޖެހިފައިވާ ޔޫއެފާ ސުޕަރކަޕްގެ ފައިނަލްގައި މެންޗެސްޓާ ޔުނައިޓެޑާ ދެކޮޅަށް ރޮނާލްޑޯ ހުރީ ނަފްސާނީ ގޮތުންނާއި ފިޒިކަލީ ގޮތުން ވެސް ފިޓްކޮށް ކަމަށާއި އެގޮތުން މިރޭގެ މެޗުގައި ރޮނާލްޑޯގެ ތަފާތު ފެނިގެންދާނެކަމުގެ އުންމީދުގައި ހުރިކަމަށް ރެއާލް މެޑްރިޑް ކޯޗް ޒައިނުއްދީން ޒިދާން ބުނެފިއެވެ.

ޒިދާން މިހެން ބުނެފައި ވަނީ މެޗުގެ ކުރިން ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ވާހަކަދައްކަމުން ޒިދާން ބުނީ ރޮނާލްޑޯ ޕްރިސީޒަން ފުރިހަމަ ނުކުރި ކަމުގައި ވީނަމަވެސް އޭނާގެ ހުނަރަށް ބަދަލެއް ނާންނާނެ ކަމަށާއި ރޮނާލްޑޯ މިރޭގެ މެޗަށް މުހިންމުކަމަށެވެ. އެގޮތުން  ޓީމުގެ ފުރަތަމަ އެގާރާގައި ވެސް އޭނާ ހިމަނާފައިވާނެ ކަމަށެވެ.

ރޮނާލްޑޯ ރެއާލް ދޫކޮށްދާން އުޅޭ ކަމަށް ބުނެ ފެތުރިފައިވާ އަޑުތަކާ ބެހޭ ގޮތުން ނޫސްވެރިޔަކު ކުރި ސުވާލަކަށް ޖަވާބުދެމުން ޒިދާން ބުނީ ޕްރިސީޒަން ތެރޭގައި ރޮނާލްޑޯއާ ބެހޭގޮތުން ވަރަށް ތަފާތު އަޑުތަށް ފެތުރިފައިވާ ކަމަށާއި އެހެން ނަމަވެސް އެއީ ހަގީގަތެއް ނޫންކަމަށެވެ. ރޮނާލްޑޯ ރެއާލްގައި މަޑުކުރާނެ ކަމަށެވެ.

"ރޮނާލްޑޯ އަކީ ރެއާލްއަށް ވަރަށް މުހިންމު ކުޅުންތެރިއެއް. އޭނާ ރެއާލް ދޫކޮށް ނުދާނެ. ރޮނާލްޑޯއާ ގުޅޭ ގޮތުން ފެތުރެނީ ދޮގު ޚަބަރު. މިރޭގެ މެޗުގައި ވެސް އޭނާގެ ތަފާތު ފެންނާނެ،" ޒިދާން ބުންޏެވެ.

ރޮނާލްޑޯ އަށް އިތުބާރުކުރާ ކަމަށާއި އޭނާ ރެއާލްގައި މަޑުކުރާނެކަމަށް ޒިދާން ބުނެފައިވެއެވެ. ވޭތުވެ ދިޔަ ދުވަސްތަކުގައި ރޮނާލްޑޯއާ ގުޅޭ ގޮތުން ތާކުންތާކު ނުޖެހޭ ދޮގު ވާހަކަތައް އަޑުއިވިގެން ދިޔަ ކަމަށާއި އެހެން ނަމަވެސް އޭނާ ހުރީ ވަރަށް ހަމަޖެހިފައި ކަމަށް ޒިދާން ބުންޏެވެ.

ޒިދާން ބުނީ ކޮންމެ ގޮތަކަށް އަޑުތަށް އެރި ނަމަވެސް ރޮނާލްޑޯއަކީ އަދިވެސް ރެއާލް މެޑްރިޑްގެ ކުޅުންތެރިއެއް ކަމަށާއި، އޭނާ ހުރީ އަދިވެސް އެ ކްލަބުގައި ކަމަށެވެ. އެހެންކަމުން މިރޭގެ މެޗުގައި ވެސް އޭނާ ކުޅޭނެ ކަމަށެވެ.

ފަހުން ކަންތައްތައް ވާނެ ގޮތެއް ނޭންގޭ ކަމަށާއި ނަމަވެސް، މިވަގުތު ރޮނާލްޑޯ ހުރީ ކްލަބާއެކު ކުރިއަށްދާން ފުރިހަމައަށް ތައްޔާރުގައި ކަމަށް ގަބޫލުކުރާ ކަމަށް ޒިދާން ބުންޏެވެ.

ރޮނާލްޑޯގެ މައްޗަށް ސްޕެއިންގެ ޓެކްސް އޮތޯރިޓީން ކޮށްފައިވާ ޓެކުހަށް މަކަރު ހެދުމުގެ މައްސަލައިގައި، ސްޕެއިންގެ އިތުރުން ރެއާލް ވެސް ދޫކޮށް އިނގިރޭސި ވިލާތަށް ދާން ބޭނުންވާ ކަމަށް ރޮނާލްޑޯ ވަނީ ދާދިފަހުން ބުނެފައެވެ.

މިހިނގާ ޓްރާންސްފަރ ވިންޑޯ ބަންދުވުމުގެ ކުރީން، ރޮނާލްޑޯ އެހެން ކްލަބަލަ ބަދަލުވާނޭ ކަމުގެ އަޑުތައް ވަރަށް ގަދަވެފައިވާއިރު، އޭނާ ހިނގައިދާނޭ ކަމަށް އެންމެ ބޮޑަށް ބެލެވޭ އެއް ކްލަބަކީ ރޮނާލްޑޯގެ ކުރީގެ ކުލަބު މެންޗެސްޓާ ޔުނައިޓެޑެވެ.

 މެސެޑޯނިއާގެ ވެރިރަށް ސްކޯޕްޔާގައި މިރޭ ކުޅޭ މި މެޗުގައި ރެއާލް މެޑްރިޑު އަދި ޔުނައިޓެޑު ކުރިމަތިލާއިރު، ދެ ޓީމު ވެސް އޮތީ ވަރަށް ފުރިހަމައަށް ތައްޔާރުވެފަކަމަށް ރިޕޯޓްތަށް ބުނެއެވެ. އަނިޔާގެ އެއްވެސް މައްސަލައެއް ދެޓީމުންކުރެ ޓީމެއްގައި ނެތް ކަމަށް ވެސް ރިޕޯޓްތައް ބުނެއެވެ.

މެސެޑޯނިއާގެ ވެރިރަށް ސްކޯޕްޔާގައި މިރޭ ކުޅޭ ސުޕަރ ކަޕް ފައިނަލްގައި ރެއާލް މެޑްރިޑާއި މެންޗެސްޓަރ ޔުނައިޓެޑް ބައްދަލުކުރާ މެޗު ފަށާނީ މިރޭ ރާއްޖޭ ގަޑިން 11:45 ގައެވެ.