އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް ލީގު ތާވަލްގެ އެއް ވަނަ އަށް ޖެހިލައިފި އެވެ.

ޔުނައިޓެޑުގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 1-0 އިންނެވެ. އެ މެޗުން އާސެނަލް މޮޅުވުމާއެކު، މި ސީޒަންގެ ލީގު ޗެމްޕިއަން ކަށަވަރު ވާނީ އެންމެ ފަހު މެޗުންނެވެ.

މެޗު ފަށައިގެން 20 ވަނަ މިނެޓުގައި އާސެނަލުން ވަނީ ޔުނައިޓެޑު ކޮޅަށް ލަނޑު ޖަަހައި، މެޗުގެ ލީޑު ނަގައިފަ އެވެ. ކައި ހަވާޓްޒް ތަނަވަސްކޮށްދިން ފުރުސަތެއްގައި އާސެނަލަށް އެ ލަނޑު ޖަހައިދިނީ ލިއާންޑްރޯ ޓްރޮސާޑް އެވެ. އޭގެ ފަހުން ޔުނައިޓެޑުން ނަތީޖާ ހަމަހަމަ ކުރުމަށް މަސައްކަތް ކުރިއިރު، އާސެނަލަށް ވަނީ ލީޑު ފުޅާ ކުރުމުގެ ފުރުސަތު ވެސް ލިބިފަ އެވެ.

މޮޅާއެކު އާސެނަލް އެއް ވަނައިގައި އޮތީ ޕޮއިންޓެއްގެ ލީޑަކުންނެވެ. މިހާތަނަށް ލީގުގައި ކުޅުނު 37 މެޗުން އެ ޓީމަށް ލިބެނީ 86 ޕޮއިންޓެވެ. ދެ ވަނައިގައި އޮތް ސިޓީ އަށް 85 ޕޮއިންޓު ލިބެނީ 36 މެޗުންނެވެ. ލީގުގައި އާސެނަލަށް ބާކީ އެއް މެޗު އޮތްއިރު، ސިޓީ އަށް އޮތީ ދެ މެޗެވެ. ލީގުގެ ޗެމްޕިއަން ކަށަވަރު ވާނީ އާސެނަލް ކުޅޭ ފަހު މެޗަށްފަހު އެވެ.