ކްލަބް ފްރެންޑްލީއެއްގައި ބޮޑު ތަފާތަކުން ބްރެޒިލްގެ ޝަފަކޮއެންސްގެ މައްޗަށް ބާސެލޯނާ ކުރިހޯދައިފި އެވެ.
ކޮންމެ ސީޒަނެއް ބާސާ އިން ފެށުމުގެ ކުރިން ބާސާގެ އަމިއްލަ ދަނޑުގައި ޖޯން ގެމްޕާ ޓްރޮފީ ނަމުގައި މެޗެއް ކުޅެއެވެ. މި ފަހަރު އެ މެޗު ކުޅެފައިވަނީ މިދިޔަ އަހަރުގެ ނޮވެމްބަރު މަހު ޝަފަކޮއެންސްގެ ކުޅުންތެރިންނާއެކު ދަތުރުކުރަމުންދިޔަ ފްލައިޓެއް ވެއްޓި ހިނގި ހިތާމަވެރި ހާދިސާގައި 71 މީހުންގެ ދުނިޔެ ދޫކޮށް ގޮސްފައިވާތީ، އެ މީހުންގެ ހަނދާނުގައެވެ.
ކޭމްޕްނައުގައި ކުޅުނު މި މެޗު ފެށިގެން ހަ ވަނަ މިނެޓުގައި ބާސާ އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދީފައިވަނީ ޑެލޯފޫ އެވެ. މި ލަނޑަށްފަހުވެސް ބާސާ އިން ދިޔައީ ޝަފަކޮއެންސްގެ ހާފަށް ބާރުބޮޑުކުރަމުންނެވެ.
އެގޮތުން ބާސާ އިން ވަނީ 11 ވަނަ މިނެޓުގައި ސާޖިއޯ ބުސްކެޓްސް ކާމިޔާބުކުރި ލަނޑުން މެޗުގެ ލީޑު ފުޅާކޮށްފައެވެ. ބާސާ އިން ކާމިޔާބުކުރި ތިންވަނަ ލަނޑު 28 ވަނަ މިނެޓުގައި އެޓީމަށް ކާމިޔާބުކޮށްދިނީ ލިއޮނެލް މެސީއެވެ.
ފުރަތަމަ ހާފް ނިމުނީ 0-3 ގެ ނަތީޖާ އިން ޝަފަކޮއެންސްގެ މައްޗަށް އެޓީމު ކުރިހޯދައިގެންނެވެ.
Valverde: "It was an emotional game due to the tribute to our rivals" #GamperBarça pic.twitter.com/S7YItzhCYD
— FC Barcelona (@FCBarcelona) August 7, 2017
ދެވަނަ ހާފް ފެށިގެންވެސް ބާސާ އިން ދިޔައީ ޝަފަކޮއެންސްގެ ހާފަށް ބާރުބޮޑުކޮށް ފުލުފުލުގައި ހަމަލާ އުފައްދަމުންނެވެ. މެޗުގައި ބާސާ އިން ކާމިޔާބުކުރި ހަތަރުވަނަ ލަނޑު 55 ވަނަ މިނެޓުގައި އެޓީމަށް ކާމިޔާބުކޮށްދިނީ ލުއިސް ސުއަރޭޒް އެވެ.
ދެވަނަ ހާފްގައި ދެޓީމުންވެސް ގިނަ ބަދަލުތަކެއް ގެނެސްފައިވާއިރު، ޝަފަކޮއެންސް އިން ވަނީ މެޗުގައި އެޓީމުގެ ހުރިހާ ކުޅުންތެރިންނަށް ކުޅުމުގެ ފުރުސަތު ދީފައެވެ. ބާސާ އިން މެޗުގައި ކާމިޔާބުކުރި ފަސްވަނަ ލަނޑު ކާމިޔާބުކުރީ 74 ވަނަ މިނެޓުގައި ސުއަރޭޒް އެވެ.
ކުރިޔަށް އޮތް ސީޒަން ހުޅުވާ މެޗުގައި ބާސާ ނިންނާނީ ރެއާލް މެޑްރިޑާ ދެކޮޅަށެވެ. އެއީ ކޮޕާޑެލްރޭގެ ޗެމްޕިއަން އަދި ސްޕެނިޝް ލީގުގެ ޗެމްޕިއަންއާ ދެމެދު ކުޅޭ ސްޕެނިޝް ލީގު ހުޅުވާ މެޗެވެ.
