ރާއްޖޭގެ އަސްކަރިއްޔާގައި ޑޯނިއަރ އަދި ހެލިކަޕްޓަރު ދުއްވޭ ފެންވަރުގެ ޤާބިލު ސިފައިންނެއް ނެތް: ސަރުކާރު
11 މެއި 2024 | ހޮނިހިރު 11:37އެކި ސަބަބުތަކާއި ގުޅިގެން ޓްރެއިނިންގ ވަނީ ހުއްޓިފައި
އިންޑިޔާ ސަރުކާރުން ހަދިޔާ ކުރި ހެލިކޮޕްޓަރު
ދިވެހިރާއްޖޭގެ އަސްކަރިއްޔާގައި ޑޯނިއަރ އަދި ހެލިކަޕްޓަރު ދުއްވޭ ފެންވަރުގެ ގާބިލު ސިފައިންނެއް ނެތް ކަމަށް ސަރުކާރުން ބުނެފިއެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މިހާރު ދިވެހި އަސްކަރިއްޔާގައި ޑޯނިއަރ އާއި ހެލިކަޕްޓަރު ދުއްވޭވަރުގެ ގާބިލު ސިފައިން ނެތްތޯ ސުވާލު ދަންނަވާފައެވެ. އެ ސުވާލަށް ޖަވާބު ދެއްވަމުން ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވީ ތަރީހަށް ބަލާއިރު ތަންކޮޅެއް ކުރިން ތަމްރީނެއް ފަށާފައިވާ ކަމަށެވެ. ނަމަވެސް އެކި ސަބަބުތަކާއި ގުޅިގެން އެ ތަމްރީން ހުއްޓިފައިވާ ކަމަށް މިނިސްޓަރު ޣައްސާން ވިދާޅުވިއެވެ.
މިނިސްޓަރު ޣައްސާން ވިދާޅުވީ ކުރިއަށް އޮތްތަނުގައި ދިވެހި އަސްކަރިއްޔާގެ ގާބިލުކަން އިތުރުކުރައްވާނެ ކަމަށެވެ. އަދި ތަމްރީނުތައް ކުރިއަށް ގެންދަވާނެ ކަމަށެވެ.
މީގެ އިތުރުން ދިވެހި ސިފައިން ތަމްރީންވެ ނިމުމުން މިހާރު ޑޯނިއަރ އަދި ހެލިކަޕްޓަރު ދުއްވަން ގެނައި މަދަނީން ފޮނުވާލާނެތޯ ނޫސްވެރިން ސުވާލު ދެންނެވުމުން، އެ ސުވާލަށް މިނިސްޓަރު ސީދާ ޖަވާބެއް ނުދެއްވައެވެ. ނަމަވެސް އެ ސުވާލާ ގުޅޭގޮތުން ފޮރިން މިނިސްޓަރު މޫސާ ޒަމީރު ވިދާޅުވީ ދިވެހިން ތަމްރީން ކުރާނެ ކަމަށާއި، ތަމްރީން ކުރުމުގެ ނަތީޖާއަަކަށްވާނީ އިންޑިއާގެ މަދަނީން އަނބުރާ ދިއުން ކަމަށެވެ.
މިހާރު ވެސް ދިވެހި އަސްކަރިއްޔާގެ ބައެއް ތަމްރީންތައް ކުރިއަށްދާކަމަށް ސަރުކާރުން ބުނެފައިވެއެވެ.
