ފައިނަލަށް ނުދެވުނީ އަހަރެންނަށް ގޯލު ނުޖެހިގެން: އެމްބާޕޭ

ޗެމްޕިއަންސް ލީގު ފުޓްބޯޅަ މުބާރާތުގެ ފައިނަލަށް ނުދެވި ޕީއެސްޖީ ކެޓީ އޭނާއަށް ގޯލު ނުޖެހިގެން ކަމަށް ފޯވަޑް ކީލިއަން އެމްބާޕޭ އެއްބަސްވެއްޖެ އެވެ.

މުބާރާތުގެ ސެމީ ފައިނަލުގައި ރޭ ޕީއެސްޖީ ބަލިވީ އަމިއްލަ ދަނޑުގައި ބޮރޫޝިޔާ ޑޯޓްމުންޑް އަތުން 1-0އިންނެވެ. މި މެޗުގައި އެމްބާޕޭ އާއި އެހެން ކުޅުންތެރިން ފޮނުވާލި ގިނަ ބޯޅަތައް އަމާޒުވީ ގޯލުގެ ދަނޑި އަށެވެ.

އޭނާ ބުނީ ޑޯޓްމުންޑާ ދެކޮޅަށް ކުޅުނު ދެ މެޗުގައި 30 ބޯޅަ ގޯލަށް ފޮނުވާލެވުނު ކަމަށާއި ނަމަވެސް ގޯލެއް ނުޖެހުމަކީ ހަމައެކަނި ނަސީބު ނެތުން ނޫން ކަމަށެވެ.

އޭނާ އަދި ބުނީ ޗެމްޕިއަންސް ލީގު ކާމިޔާބު ކުރުމަކީ ކޮންމެ ކުޅުންތެރިއެއްގެ ވެސް ހުވަފެނެއް ކަމަށާއި އޭނާ ފަދައިން ޕީއެސްޖީގެ ކޮންމެ ކުޅުންތެރިއަކު ވެސް ރޭގެ މެޗު ކާމިޔާބު ކުރަން ވަރަށް މަސައްކަތް ކުރި ކަމަށެވެ. ނަަމަވެސް ފުޓްބޯޅައިގައި ކާމިޔާބު ލިބޭނީ ކޮންމެވެސް އެއްބަޔަކަށް ކަން ހަނދާން ކުރަންޖެހޭ ކަމަށެވެ. މެޗުގައި ރެފްރީގެ ނިންމުންތަކާ މެދު ވެސް އޭނާ ވާހަކަ ދެއްކިއެވެ. ފްރާންސްގެ ކެޕްޓަން ބުނީ ޕީއެސްޖީ އަށް އެޑްވާންޓޭޖް ލިބެންޖެހޭ ވަގުތުތަކުގައި އެކަމަށް ފުރުސަތު ލިބިފައިނުވި ނަމަވެސް، ބަލިވުމުން ރެފްރީ ކުށްވެރިކޮށްފައި ނިންމާލަން އޭނާ ބޭނުންނުވާ ކަމަށެވެ. ސަބަބަކީ މެޗުގެ ނަތީޖާ ކަނޑައަޅަނީ ރެފްރީކަމަށް ނުވާތީ ކަމަށެވެ.