ސޮސިއެޑާޑް ބަލިކޮށް ރެއާލް މެޑްރިޑް ސްޕެނިޝް ކަޕްގެ ފައިނަލަށް

ރެއާލް ސޮސިއެޑާޑްގެ މައްޗަށް އެގްރިގެޓް ނަތީޖާއިން ކުރި ހޯދައިގެން ސްޕެނިޝް ކަޕުގެ ފައިނަލުގެ ޖާގައެއް ރެއާލް މެޑްރިޑުން ހޯދައިފި އެވެ.

ރެއާލް މެޑްރިޑު އެގްރިގޭޓް ނަތީޖާއިން ކުރިހޯދީ ސެމީ ފައިނަލުގެ ދެވަނަ ލެގުގައި ރެއާލް ސޮސިއެދާދާއި ދެކޮޅަށް ކުޅުނު މެޗު 4-4 ގެ ނަތީޖާއަކުން އެއްވަރުކޮށް، 5-4 ގެ އެގްރިގޭޓް ނަތީޖާއިންނެވެ.

ސެމީ ފައިނަލުގެ ފުރަތަމަ ލެގުގައި ސޮސިއެޑާޑްގެ ދަނޑުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކޮށްފައިވަނީ ރެއާލް މެޑްރިޑުންނެވެ. އަދި އަންގާރަ ދުވަހުގެ ރޭ އަމިއްލަ ދަނޑުގައި ކުޅުނު މެޗުގެ ފުރިހަމަ ވަގުތު ހަމަވިއިރު 4-3 ގެ ނަތިޖާއަކުން ސޮސިއެޑާޑް ކުރި ހޯދުމާއެކު، މެޗުގެ އެގްރިގޭޓް ނަތީޖާ ވަނީ އެއްވަރުވެފައެވެ. އެހެންކަމުން މި މެޗުގެ ނަތީޖާ ނެރެފައިވަނީ އިތުރު ވަގުތުގެ ކުޅުމުގައެވެ.

ކިލިއަން އެމްބާޕޭ އާއި އެންޓޯނިއޯ ރުޑިގާ އަދި ލޫކާ މޮޑްރިޗް މެޗު ބެންޗުގައި ބައިންދައިގެން ރެއާލް އިން މެޗު ފެށިއިރު، ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެން ގޮސްފަ އެވެ.

މި މެޗުގެ ފުރަތަމަ ލަނޑު ޖަހައި ކުރި ހޯދީ ސޮސިއެޑާޑް އިން ނެވެ، މެޗުގެ 16 ވަނަ މިނެޓުގައި މި ލަނޑު ސޮސިއެދާދަށް ޖަހައިދިނީ ބަރެނެޓްޝިއާ އެވެ. އެހެން ނަމަވެސް އޭގެ 14 މިނިޓު ފަހުން ރެއާލް މެޑްރިޑްގެ އެންޑްރިކް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ.

މި މެޗުގައި ރެއާލް ސޮސިއެޑާޑުން ދެވަނަ ފަހަރަށް ކުރި ހޯދާފައިވަނީ މެޗުގެ 72 ވަނަ މިނިޓުގައި ރެއާލް މެޑްރިޑްގެ ޑިފެންޑަރު ޑޭވިޑް އަލާބާ އަތުން ބައިކޮޅަށް ވަން ލަނޑުންނެވެ. އަދި އޭގެ އަށް މިނެޓު ފަހުން މިކޭލް އޮޔަރްޒަބާލް ވަނީ އިތުރު ލަނޑެއް ޖަހައި މެޗުގެ އެގްރިގޭޓް ނަތީޖާ 3-2 އަށް ބަދަލުކޮށްފައެވެ.

ދެވަނަ ހާފުގެ ވަކި ހިސާބަކުން ބެންޗުގައި ތިބި އެންމެ މުހިންމު ތިން ކުޅުންތެރިން ކަމަށް ވާ އެމްބާޕޭ އާއި ރުޑިގާގެ އިތުރުން މޮޑްރިޗްވެސް ވަނީ ކުޅެން އަރުވާފައެވެ.

ރެއާލް މެޑްރިޑުން މި މެޗުގައި ޖެހި ދެވަނަ ލަނޑު މެޗުގެ 82 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ޖޫޑް ބެލިންހަމް އެވެ. އަދި އޭގެ ހަތަރު މިނިޓު ފަހުން ޗޫމޭނީ ވަނީ އިތުރު ލަނޑެއް ޖަހައި އެ ޓީމަށް ކުރި ހޯދަދީފަ އެވެ.

ރެއާލް ސޮސިއެދާދުން މޮޅު ކުޅުމެއް ދައްކާފައިވާއިރު، މި މެޗުގެ އެގްރިގޭޓް ނަތީޖާ އެއްވަރުވެފައިވަނީ މެޗުގެ ފުރިހަމަ ވަގުތުގެ އިތުރު ވަގުތުގައި އޮޔަރްޒަބާލް ކާމިޔާބުކޮށްދިން ލަނޑުންނެވެ.

މެޗުގެ ފުރިހަމަ ވަގުތު ހަމަވިއިރު 4-4 ގެ އެގްރިގޭޓް ނަތީޖާއަކުން ދެ ޓީމު އެއްވަރުވެފައިވާތީ، ނަތީޖާ ނެރުމަށް ކުޅުނު އިތުރު ވަގުތުގެ 30 މިނިޓުގެ ކުޅުން ނިމެން ފަސް މިނިޓަށް ވެފައިވަނިކޮށް ރުޑިގާ ވަނީ ލަނޑެއް ޖަހާ އެ ޓީމު މޮޅުކޮށްދީފަ އެވެ.