އިންޓަނޭޝަނަލް ކްރިމިނަލް ކޯޓް (އައިސީސީ) އިން އިޒްރޭލުގެ ބޮޑުވަޒީރު ނަތަންޔާހޫ ހައްޔަރުކުރަން ނެރެން އުޅޭ އަމުރު ހުއްޓުވޭތޯ އެމެރިކާގެ ސެނެޓަރުންގެ ޓީމަކުން އައިސީސީގެ އޮފިޝަލުންނާއެކު ބައްދަލުވުމެއް ބާއްވައިފިކަމަށް މީޑިއާ ރިޕޯޓްތައް ބުނެފިއެވެ.
އައިސީސީން މިފަދަ ބައްދަލުވުމަކާ ބެހޭ ގޮތުން އަދި އެއްވެސް އެއްޗެއް ބުނެފައެއް ނުވެއެވެ. ނަމަވެސް އައިސީސީން އިޒްރޭލުގެ ބޮޑުވަޒީރާއި، ޑިފެންސް މިނިސްޓަރާއި، އިޒްރޭލްގެ ޑިފެންސް ފޯސްގެ ވެރިޔާ ހައްޔަރު ކުރުމަށް ވަރަށް އަވަހަށް އަމުރު ނެރޭނެ ކަމުގެ އަޑުތައް ވަނީ ފެތުރިފައެވެ.
އިޒްރޭލުގެ ނޫސްތަކުން ބުނާ ގޮތުގައި މިފަދަ އަމުރެއް ނެރެފާނެ ކަމަށް ކަންބޮޑުވެވަޑައިގެންފައިވާ ބޮޑުވަޒީރު ނަތަންޔާހޫ ވަނީ އަމުރު ނެރުން ހުއްޓުވައިދިނުމަށް އެމެރިކާގެ އެހީއަށް އެދިވަޑައިގެންފައެވެ. މިމައްސަލައިގައި ބޮޑުވަޒީރު ނަތަންޔާހޫ ވަނީ އެމެރިކާގެ ރައީސް ބައިޑަންއާ ހުސްވި ހަފްތާގެ އާދިއްތަ ދުވަހު ގުޅުއްވާ ވާހަކަފުޅު ދައްކަވާފައެވެ.
މި މައްސަލައިގައި ހޯމަ ދުވަހު ވައިޓް ހައުސް އިން ނެރުނު ބަޔާނެއްގައި ބުނެފައިވަނީ މިއީ އައިސީސީގެ މެންޑޭޓް ހިނގާ މައްސަލައެއް ކަމަށް ނުދެކޭ ކަމަށާއި، އައިސީސީން ހިންގަން އުޅޭ ތަހުގީގަށް އެމެރިކާއިން ތާއީދު ނުކުރާނެ ކަމުގައެވެ.
އައިސީސީގެ ނިންމުން ތަކަކީ އެމެރިކާއިންވެސް އަދި އިޒްރޭލުންވެސް ބަލައިގަންނަ އެއްޗެއް ނޫނެވެ. އެމެރިކާ އާއި އިޒްރޭލް އައިސީސީގެ މެމްބަރު ގައުމުތައް ކަމުގައި ނުހިމެނުނު ނަމަވެސް އައިސީސީން އެފަދަ އަމުރެއް ނެރެފިނަމަ، ބޮޑުވަޒީރު ނަތަންޔާހޫ އަށް ބައިނަލް އަގްވާމީ ދަތުރުފަތުރު ކުރެއްވުމުގައި ބޮޑެތި ދަތިތަކާ ކުރިމަތިވެވަޑައިގަންނަވާނެއެވެ.
