އަބަދުވެސް ދައްކަނީ ދީނީ ގޮތުން ހަރުކަށި ފިކުރުގެ މީހުން އިތުރުވަމުންދާ ވާހަކައެވެ. ދީނީ ގޮތުން ހައްދުފަހަނައަޅާފައިވާ މީހުން ގިނަވަމުންދާ ވާހަކައެވެ.

އެހެންނަމަވެސް އިސްލާމް ދީނުގެ އުސޫލުތަކާއި ކަނޑައެޅިގެން ޚިލާފު ކަންތައްތަކަކަށް މުޅި ގައުމު އަހުލުވެރި ކުރުމަށް ފިކުރީ ގޮތުން ހިނގަމުންދާ ހަނގުރާމައިގެ ވާހަކަ ދައްކާ މީހުން މަދެވެ. އެ ބައިގަނޑުގެ ވާހަކަ ދައްކާނެ މީހެއް ނުވެއެވެ. އެކަންކަމާ އެއްޗެއް ބުނާ މީހާގެ އަނގަ ބަންދުކޮށްލަނީ އެއްކަލަ "ހައްގު" މި ބަސް ބޭނުންކޮށްގެންނެވެ. 

ބަލައިލި ކޮންމެ ދިމާއަކުންވެސް އިވެނީ ހައްގުތަކުގެ ވާހަކައެވެ. އަންހެނަކަށްވީތީ ލިބެން ޖެހޭ ހައްގެވެ. އިންސާނަކަށްވީތީ ލިބެންޖެހޭ ހައްގެވެ. އެމީހަކު ބޭނުން ގޮތަކަށް އުޅުމާއި، ބޭނުން ޚިޔާލެއް ފާޅު ކުރުމުގެ ހައްގެވެ. ހައްތަހާވެސް ހައްގުތަކެވެ.

ކޮންމެއަކަސް، ހައްގުތަކާއި މިނިވަންކަމުގެ ވާހަކަ ދައްކާއިރު، މިއަދު ފެންނަމުންދަނީ އެ ހައްގުތަކުގެ ނާޖާއިޒު މަންފާ ނަގައި، އެއް ބަޔަކު މުޖުތަމައު ފަސާދަ ކުރަމުންދާ ތަނެވެ.

އެތައް ބަޔަކު ބޭނުންކުރަމުންދާ ސޯޝަލް މީޑިއާ ޕްލެޓްފޯމެއްކަމަށްވާ ޓިކްޓޮކްގައި އާންމު އަޙްލާޤީ މިންގަނޑުތަކާއި ޚިލާފަށް ބަރަހަނާ ވީޑިއޯތައް އާންމު ކުރަމުންދިޔަ މައްސަލައިގައި ދައުވާ އުފުލި މުޙައްމަދު ނަބީލް 1 އަހަރަށް ޖަލަށްލާން ކްރިމިނަލް ކޯޓުން މީގެ ކުރިން ޙުކުމްކޮށްފައިވެއެވެ. އެއީ 2022 ވަނަ އަހަރުގެ ސެޕްޓެމްބަރު މަހުއެވެ.

ކްރިމިނަލް ކޯޓުން ކުރި ޙުކުމަށް ބަލާއިރު، އެ ދައުވާއަކީ މުޙައްމަދު ނަބީލް، 2021 އަހަރު ސެޕްޓެމްބަރު މަހު ތެރޭގައި ޓިކްޓޮކް މެދުވެރިކޮށް އޭނާގެ ޖިންސީ ގުނަވަން ދައްކައި، ޖިންސީ ޢަމަލު ހިންގާ މަންޒަރު ދައްކުވައިދޭ ވީޑިއޯއެއް ހަދާފައިވާތީ އޭރު އުފުލި ދައުވާއެކެވެ.

އޭރު އެ މައްސަލައިގައި އެތައް ބަޔަކު އަޑުއުފުލިއެވެ. ކަމާ ގުޅުންހުރި އިދާރާތަކަށް ފާޑުކިޔާހެދިއެވެ.

އަނެއްކާވެސް ހަމައެކަން މިވަނީ ތަކުރާރުވާން ފަށާފައެވެ. ޓިކްޓޮކްގައި އަންހެނެއްކަމަށް ދައުވާކޮށް، އާންމު އިޖުތިމާއީ މިންގަނޑުތަކާ ޚިލާފު އެތައް ކަމެއް އޭނާ ދަނީ ޕްރޮމޯޓު ކުރަމުންނެވެ. ފާޅުގައި ވީޑިއޯ އާންމުކޮށް، ޖެހިލުމެއްނެތި އެކަން ކުރަމުންދަނީ އިދާރާތަކަށް ގޮންޖަހަމުންނެވެ.

ހަމައެގޮތަށް، ފާހިޝް އަމަލުތައް ފާޅުގައި ހިންގަމުންދާ މީހުން ދުވަހެއް ދުވަހަކަށް ދަނީ އިތުރު ވެސް ވަމުންނެވެ. އެގޮތުން ފިރިހެނުން އަންހެން ހެދުން އަޅައިގެން ނެށުމާއި، އަންހެނުން ފިރިހެން ހެދުން އަޅައިގެން ނެށުންފަދަ ކަންކަން މުޖުތަމައުގެ ތެރޭގައި އާންމު ކުރުމަށް މަސައްކަތް ކުރަމުންދާ މީހުން ވެސް މަދެއް ނޫނެވެ.

އެހެންނަމަވެސް، މިއަދު އެކަންކަން ބަލާނެ އިދާރާއެއް ނެތެވެ. ނުވަތަ ނުފެންނަނީ ކަމަށް ވެސް ވެދާނެއެވެ. އެއްޖިންސުން ގުޅުން ހިންގުމާއި އެފަދަ ފާހިޝްކަންކަން ޕްރޮމޯޓް ކުރުމަށް ވަކި ޕޭޖްތައް މިއަދު ހަރަކާތްތެރިވެއެވެ.

ނަމަވެސް މިއީ ދިވެހިރާއްޖެއެވެ. މިއީ ދިވެހިންނެވެ. ދިވެހި ލޭހިނގާ، ދިވެހި ދިދައިގެ ދަށުގައި ތިބި، ދިވެހި ދައުލަތެއްގެ ބާރުހިނގާ، އެންމެންގެ މައްޗަށް ލާޒިމު އުސޫލުތަކަކާއި ގާނޫނުތަކަކާއި، ދީނީ އަސާސްތަކެއް އޮތް ގައުމެއްގެ ރައްޔިތުންތަކެކެވެ. ދިވެހި ގައުމުގައި އުޅެންވާނީ ދިވެހިވަންތަކަމަށް އިހުތިރާމްކޮށްގެންނެވެ.

ދިވެހި ދައުލަތާއި ރާއްޖޭގެ ޝަރުއީ ނިޒާމު އެ އެއްޗެއްގެ މައްޗަށް ބިނާވާ އިސްލާމީ ރިވެތި އުސޫލުތަކުގައި ހިފަހައްޓައިގެންނެވެ. ގާނޫނު އަސާސީގައި އަދި ހަމަ ގައިމުވެސް އޮތީ ދިވެއްސަކަށް ވެވޭނީ ސައްތައިން ސައްތަ މުސްލިމަކަށްވުމުން ކަމަށެވެ. ވީއިރު އެ އަސާސް ގަބޫލުނުކޮށް، ދިވެއްސެއްގެ ތާޖު ތިމާ އަޅައިގެން ނުވާނެއެވެ. އެކަންކަން ނުބެލޭނަމަ އެއީ ސަރުކާރުން ވެސް ލަދުގަންނަންޖެހޭ ކަމެކެވެ. ސަރުކާރުގެ ވެސް ފެއިލްވުމެކެވެ.