ލޯންޗެއްގައި އެކަނި މާލެ އައި ފިރިހެން ކުއްޖާއާއި އެކުއްޖާއާ އެކު ފިލި އަންހެން ކުއްޖާ އާއިލާއާ ހަވާލުކޮށްފި
މި ދެކުދިން ފެނިފައިވަނީ ބުދަ ދުވަހުގެ ރޭ ވަރަށް ލަސްވިފަހުން
ކުޑަކުއްޖާ ވަގަށް ނަގައިގެން ދިޔަ ލޯންޗު
ލޯންޗެއް ވަގަށް ނަގައިގެން އެކަނި ދުއްވާފައި މާލެއައި 14 އަހަރުގެ ފިރިހެން ކުއްޖާއާއި އެކުއްޖާއާ އެކު ފިލި 13 އަހަރުގެ އަންހެން ކުއްޖާ އާއިލާއާ ހަވާލުކޮށްފިއެވެ.
މައުލޫމާތު ލިބިފައިވާ ގޮތުގައި އަންގާރަ ދުވަހުގެރޭ މިކުއްޖާ ރަށުން ފުރާފައިވަނީ މެންދަމު 3 ޖަހާކަންހާއިރުއެވެ. އަދި ބުދަ ދުވަހުގެ ހެނދުނު މާލެ އައީ ސިނަމަން ހަކުރާ ހުރާ ރިސޯޓުގެ ލޯންޗެއް އެރަށުގައި އަޅާފައި އޮއްވާ އޭގަ އެވެ. ލޯންޗު ވަގަށް ނެގިކަން އެނގުނީ، އޭގެ ފަޅުވެރިން ހެނދުނު ބަނދަރު މައްޗަށް ދިއުމުންނެވެ. އެ ކުއްޖާގެ ރަހުމަތްތެރިނާ ހަވާލާދީ ބައެއް މީޑީއާތަކުގައި ރިޕޯޓުކޮށްފައިވަނީ އޭނާ މާލެއަށް އައީ ލޯބީގެ ގޮތުން ގުޅިގެން އުޅޭ 13 އަހަރުގެ އަންހެން ކުއްޖާ ވަރަށް ހާލުގައި މާލޭގައި އުޅޭތީ އެކުއްޖާ ސަލާމަތް ކުރުމަށެވެ.
ސިނަމަން ހަކުރާ ހުރާގެ ލޯންޗުގައި އެ ކުއްޖާ ރަށުން ފުރީ އައިޑީ ކާޑާއި އޭނާގެ މަންމަގެ ފޯނާއި ބައެއް އަންނައުނު ވެސް ދަބަހަށް ލައިގެން ކަމަށް މައުލޫމާތު ލިބެއެވެ. ލޯންޗެއް ގެއްލިގެން އުޅޭ ކަމަށް ރިޕޯޓުކުރުމާއެކު، ފުލުހުން ވަނީ ބުދަ ދުވަހުގެ ހެނދުނު ހުޅުމާލެ އެމްޓީސީސީ ފެރީ ޓާމިނަލް ކައިރިން ލޯންޗު ހޯދާފައެވެ. ލޯންޗު އެސަރަހައްދަށް ދޫކޮށްލާފައިވަނީ އިންޖީނު ވެސް ނިއްވާނުލައެވެ. ބައެއް ގެއްލުންތައް ވެސް ލޯންޗަށް ވަނީ ލިބިފައެވެ.
މައުލޫމާތު ލިބިފައިވާ ގޮތުގައި މި ދެކުދިން ފެނިފައިވަނީ ބުދަ ދުވަހުގެރޭ ވަރަށް ލަސްވިފަހުންނެވެ.
މިމައްސަލައާ ގުޅިގެން ފުލުހުން ބުނީ ބުދަ ދުވަހުގެރޭ އެ ދެ ކުދިން ހޯދާ އާއިލާއާ ހަވާލުކޮށްފައިވާ ކަމަށެވެ. އަދި ދެ ކުދިންގެ ހާލު ވެސް ރަނގަޅު ކަމަށެވެ.
މިމައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.
