ޗައިނާއިން ޖައްވުގައި މަސްމަހާމެއްސާއި ސޫފާސޫފި އާލާ ކުރަނީ؟

އާރާއި ބާރު، ޝާނާއި ޝައުކަތަކީ ބައެއްގެ ހައިބަތު ދެއްކުމަށްޓަކައި ދީ އުޅޭ ސިފަކުރުންތަކެކެވެ. ފަހަރެއްގައިވެސް ސަބަބެއް ނެތިއެއް ނޫނެވެ. މި ދެންނެވި ފަދަ ޝަޚްސީ ލަޤަބުތަކާއި ސިފަކުރުންތަކަށް މި ދުނިޔޭގެ ބިންމަތީގައި ޤައުމުތަކުން ތަޅާފޮޅަމުން ގޮސް، އެ ވާދަވެރިކަން މިހާރު ގަދަވަމުން ދަނީ ޖައްވާއި ފަޒާގެ ތެރޭގައެވެ. ދުނިޔޭގެ ނިސްބަތުން ބަލާއިރު، ޖައްވީ ބާރުތަކުގެ ލިސްޓުގެ 4 ވަނައިގައި އޮތް ޗައިނާއިން ދަނީ އެ ޤައުމުގެ ހައިބަތު ވަރުގަދަ ކުރުމުގެ ގޮތުން ޖައްވު ތެރޭގައި އާދަޔާ ޚިލާފު އެތައް މަޝްރޫޢެއް ހިންގަމުންނެވެ. ލިސްޓަށް އެންމެ ފަހުން އިތުރުވި އެއް ނަމްބަރަކީ، ޖައްވު ތެރޭގައި މަސް ގެންގުޅެން ހިފި ޢަމާޒެވެ.

ޗައިނާގެ ޖައްވީ ފަޅުވެރިންގެ ޒިންމާއަކީ، ޖައްވުގައި ގާއިމު ކޮށްފައި ވާ ޗައިނާގެ ޖައްވީ ސްޓޭޝަންގައި އެކުއަކަލްޗަރ މަޝްރޫޢެއް ހިންގުމެވެ. މި ތަހުލީލީ މަޝްރޫޢުގައި ބޭނުން ކުރަނީ އިންޑިއާއާއި ދެކުނު އޭޝިއާގެ ސަރަޙައްދުތަކަށް ހާއްސަ، ސާފު ފެނުގައި ދިރިއުޅޭ މަހުގެ ބާވަތެއް ކަމަށްވާ ޒީބްރާފިޝްއެވެ. މިއީ ޓޭންކުތަކުގައި މަސް ގެންގުޅޭ މީހުންގެ މެދުގައިވެސް މަގުބޫލު މަހެކެވެ.

ޗިއުކުއާން ސެޓެލައިޓް ލޯންޗް ސެންޓަރުން މިދިޔަ ބުރާސްފަތި ދުވަހު އުދުއްސާލި ޝެންޖޯ-18 ޖައްވީ އުޅަނދުގެ 3 ފަޅުވެރިންނާއެކު، އިތުރު މެންބަރެއްގެ ގޮތުގައި ޒީބްރާފިޝްވެސް ބައިވެރިވިއެވެ. މި އާދަޔާ ޚިލާފު ތަޖުރިބާ މަޝްރޫޢު ކުރިއަށް ގެންދާ ދަތުރުގެ 3 ފަޅުވެރިންނަކީ ޔޭ ގުއާންގްފޫ، ލީ ކޮންގް އަދި ލީ ގުއާންގްސޫއެވެ. މިޝަން ކޮމާންޑަރަކީ ޔޭއެވެ.

ޖައްވުގައި އެކުއަކަލްޗަރ މަޝްރޫޢުތައް ހިންގިދާނެތޯ ބެލުމަށް ޗައިނާއިން ކުރިއަށް ގެންދާ ތަޖުރިބާތަކުގައި ޒީބްރާފިޝް ބޭނުން ކުރަން ނިންމީ، އެ ބާވަތުގެ މަހަކީ ޖެނެޓިކްސް ދިރާސާތަކުގައި އެންމެ އާންމުކޮށް ބޭނުން ކުރާ މަހުގެ ބާވަތަށް ވީމައެވެ. ޒީބްރާފިޝްއަކީ އިޔާދަވުމުގައި އިހުނަށްވުރެ ފުރިހަމަ ސިފަތަކަކާއެކު އިޔާދަވުމުގެ ޤާބިލުކަން ލިބިފައި ވާ މަހެކެވެ. އަދި ބިހުން ސެލްތައް އުފެދި މަހަކަށް ބަދަލުވަމުން އަންނަ ދުވެލިވެސް ހަލުވި މަހެކެވެ.

ޒީބްރާފިޝްގެ ޓިޝޫތަކާއި، ގުނަވަންތަކާއި ނިޒާމުތައް ހުންނަނީ އިންސާނުންނާ އެއްގޮތަކަށެވެ. ޒީބްރާފިޝްގެ ބިހަކީ، އެތެރެ ފެންނަ ގޮތަށް ހުންނަ ބިހެއް ކަމުން، އެމްބްރިޔޯ ހެދިބޮޑުވަމުން އަންނަ ގޮތް ސީދާ ގޮތުން ބަލައިލުމުގެ ފުރުޞަތު، ދިރާސާވެރިންނަށް އޮވެއެވެ.

ޝެންޖޯ-18ގެ މިޝަންގައި ޒީބްރާފިޝް ޖައްވަށް ގެންގޮސް، ޗައިނާގެ ޖައްވީ ސްޓޭޝަންގައި އެ މަސް އާލާ ކުރެވޭތޯ ބަލަނީ، މައިކްރޯގްރެވިޓީގެ ސަބަބުން މަހުގެ ހެދިބޮޑުވުމަށް ކުރާ އަސަރު ދެނެގަނެ، ޖައްވުގައި މަސްގެންގުޅުމުގެ ރޮނގުން އާދަޔާ ޚިލާފު ކުރިއެރުމެއް ހޯދުމުގެ ޢަމާޒުގައެވެ. މައިކްރޮގްރެވިޓީއަކީ އެއްޗެއްގައި ބަރުދަނެއް ނެތުމަށް ރިޢާޔަތް ކުރެވޭ ޙާލަތެކެވެ. ނުވަތަ ބިމަށް ދަމާ ބާރު އިންތިހާއަށް ދަށް ހާލަތެކެވެ.

ޗައިނާގެ ޖައްވީ ސްޓޭޝަންގައި އާލާ ކުރާ ޒީބްރާފިޝްގެ ބިސްތައް އަލުން ބިމަށް ގެނެސް، އިތުރު ދިރާސާތައް ކުރުމަށް ވަނީ ނިންމާފައެވެ. މަޝްރޫޢު ރާވާފައި ވަނީ، ކެމެރާތަކުގެ އެހީގައި ވަގުތުން ވަގުތައް މަންޒަރުތައް ފެންނަ ގޮތަށެވެ. ޒީބްރާފިޝްގެ ފުރަތަމަ ޖައްވީ ދަތުރުގައި 3 ފަޅުވެރިއަކު ބައިވެރިވި ނަމަވެސް، ބިމުގައި އޮތް ކުރޫއިންގެ ޢަދަދު ގިނައެވެ.

ޖައްވީ ކޮންޓްރޯލް ނެގުމަށް ޗައިނާއިން ހިފާފައިވާ ވަރުގަދަ ޢަޒުމުގައި، ޖައްވު ތެރޭގައި އެކި ކަހަލަ ސޫފާސޫތްޕާއި، ކުދި ޖަނަވާރުތައް އާލާ ކުރެވޭތޯ ބެލުމަށްވެސް ވަނީ ރާވާފައެވެ.