ވިޔަފާރި އުސޫލުން ބޯވަ އާލާކޮށް އޭގެ ވިޔަފާރި ކުރުމަށް ދުނިޔޭގައި އުފައްދާ ފުރަތަމަ ވިޔަފާރި އަންނަ އަހަރު ހުޅުވަން ނިންމައިފިއެވެ.
ސީފުޑަށް އޮތް ޑިމާންޑު އިތުރުވަމުންދާ މި ދަނޑިވަޅުގައި ބޯވަ އާލާކޮށް އޭގެ ވިޔަފާރި ކުރުމަށް ނިންމާފައިވަނީ ސްޕެއިންގެ ކުންފުންޏަކުންނެވެ. މި ވިޔަފާރި ފެށުމަށް އިންވެސްޓުކުރަމުންދަނީ ސްޕެއިންގެ ބޮޑު ކުންފުންޏެއް ކަމަށްވާ ނުއޭވާ ޕެސްކަނޯވާއިންނެވެ. އެކުންފުނިން މިހާތަނަށް ވަނީ މި ވިޔަފާރި ފެށުމަށް 74 މިލިއަން ޑޮލަރު އިންވެސްޓުކޮށްފައެވެ. އެކުންފުނީގެ އެގްރިކަލްޗަރ ޑައިރެކްޓަރ ވިދާޅުވެފައިވަނީ މިއީ ދުނިޔޭގެ ފެންވަރުގައި ފާހަގަކޮށްލެވޭ ލަނޑުދަނޑިއެއް ކަމަށެވެ. އެހެންނަމަވެސް އެ ކުންފުނި އުފެއްދުމަށް އަދިވެސް އެންވަޔަރަންމެންޓަލް އެޕްރޫވަލް ލިބިފައެއް ނުވެއެވެ.
ސްޕެއިންގެ ހުޅަނގުއުތުރު ގައި ގާއިމްކޮށްފައިވާ އެކުންފުނީގެ ރިސަރޗް ސެންޓަރުގައި މިކަމާ ގުޅޭ އެކި ދިރާސާތައް ހަދަމުންދާއިރު، އެތައް އަހަރެއްގެ އެކެޑަމިކް ދިރާސާއަށްފަހު ނުއޭވާ ޕެސްކަނޯވާއިން ވަނީ ގިނަ އަދަދަކަށް ބޯވަ އާލާކުރުމަށް ބޭނުންވާ ޝަރުތުތައް ފުރިހަމަކޮށްފައެވެ. އަދި އެކުންފުނީގެ ވާދަވެރި ކުންފުނިތަކަށްވުރެ ވަނީ ކުރިހޯދާފައެވެ.
އެކުންފުނިން 2026 ވަނަ އަހަރުގެ ނިޔަލަށް އަހަރަކު 3،000 ޓަނުގެ ބޯވަ އުފައްދާ، ބައިނަލްއަގުވާމީ އެތައް ކުންފުންޏަކަށް އެތަކެތި ފޯރުކޮށްދިނުމަށް ވަނީ އަމާޒު ހިފާފައެވެ. އަދި މި ވިޔަފާރީގެ ސަބަބުން ސްޕެއިންގެ ގްރޭން ކެނޭރިއާގައި އެތައް ވަޒީފާއެއް އުފެދިގެންދާނެއެވެ. 2010 ވަނަ އަހަރުން 2019 ވަނަ އަހަރާ ދެމެދު ބޯވައިގެ ވިޔަފާރި ވަނީ 1.30 ބިލިއަން ޑޮލަރުން 2.72 ބިލިއަން ޑޮލަރަށް އިތުރުވެފައެވެ.
އެހެންނަމަވެސް މިފަދަ ވިޔަފާރިއެއް ފަށައިފިނަމަ އެތަކެތީގެ ދިރިހުރުމަށް ނޭދެވޭ އަސަރު ކޮށްފާނެކަމީ މިކަން ދިރާސާކުރާ ފަރާތްތަކުގެ ކަންބޮޑުވުމެކެވެ. މިގޮތުން މީގެ ކުރިން މިފަދައިން ބޯވަ އާލާކޮށްގެން އޭގެ ވިޔަފާރި ކުރުމަށް ކޮށްފައިވާ މަސައްކަތުގެ ތެރެއިން އެތަކެތި ކުއްލިއަކަށް މަރުވުމާއި، ރުޅިގަދަވުމާއި، އެހެން ކުދި ބޯވަތައް ކެއުމާއި، އެތަކެތީގެ އަމިއްލަ ނަފްސަށް އަނިޔާކުރުން ފަދަ ކަންކަން ފާހަގަކުރެވިފައިވެއެވެ. މި ބޯވަ ފާމް އުފެއްދުމަށް ރިސަރޗް ހަދަމުންދާ ސެންޓަރުގެ ޑައިރެކްޓަރ ޑޭވިޑް ވިދާޅުވެފައިވާގޮތުގައި މި ދިރާސާގެ ތެރެއިން އެއްވެސް އެފަދަ ކަމެއް ފާހަގަކުރެވިފަ އެއްނުވެއެެވެ.
އެހެންނަމަވެސް މިކަމާ ދެބަސްވާ މީހުން އަދިވެސް އެބަތިއްބެވެ. މިގޮތުން ބޯވަ ޓޭންކެއްގައި ބަންދުކޮށްގެން ގެންގުޅުމުން އެތަކެތީގެ އުޅުމަށް ނޭދެވޭ ބަދަލުތަކެއް އަންނަ ކަމަށް ސައިންޓިފިކް ދިރާސާތަކުންވެސް ވަނީ ދައްކާފައެވެ. އެހެންކަމުން ވިޔަފާރީގެ އުސޫލުން ބޯވަ އާލާކޮށްގެން އޭގެ ވިޔަފާރި ކުރުމަކީ ކުރެވޭނެ ކަމެއް ނޫން ކަމަށް ގިނަ ބަޔަކު ގެންދަނީ ބުނަމުންނެވެ.
