ރާއްޖޭގައި އިންޑިއާ ސިފައިން ތިބޭތީ ނުނިދޭ، އިންޑިއާ އައުޓް ކެންޕޭނަށް ނުކުންނާނަން: ރައީސް ޔާމީން
މިހާރު އިންޑިއާ އައުޓް ނުކިޔެންވީ ކީއްވެގެންތޯ ޔާމީން ސުވާލުކުރެއްވި
ނޫސްވެރިންނާއި ކުރީގެ ރައީސް އަބްދުﷲ ޔާމީން ވާހަކަފުޅު ދައްކަވަނީ
ދިވެހިރާއްޖޭގައި އިންޑިއާ ސިފައިން ދައިމީ ގޮތެއްގައި މަރުކަޒު ހަދައިގެން ތިބޭތީ ނުނިދޭ ކަމަށާއި، އިންޑިއާ އައުޓް ކެންޕޭނަށް ނުކުންނާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމް ބާތިލްކޮށް އަލުން އެ މައްސަލަ ބަލަން ހައިކޯޓުން ކްރިމިނަލް ކޯޓަށް އަމުރު ކުރުމާއެކު، ޖަލުހުކުމުން މިނިވަންވެ ވަޑައިގެން ބުރާސްފަތި ދުވަހުގެ ރޭ ނޫސްވެރިންނާ ވާހަކަ ދައްކަވަމުން އެމަނިކުފާނު ވިދާޅުވީ އަމިއްލަހާލައިގެން ދިރިއުޅެވޭނެ ކަމަށާއި، ދިރިއުޅުމުގައި ސަރުކާރަށް ބަރޯސާވާން ނުޖެހޭ ކަމަށެވެ. ރައީސްކަން ނުލިބުމަކީ ނުނިދިގެން އުޅޭވަރުގެ ކަމެއް ނޫން ކަމަށާއި، ނަމަވެސް ނުނިދޭވަރުގެ ކަންކަން އެބަހުރި ކަމަށެވެ. އެއީ ރާއްޖޭގައި އިންޑިއާ ސިފައިން ދައިމީ ގޮތެއްގައި މަރުކަޒު ހަދައިގެން ތިބުމާއި، ގެއްލުނު ކަނޑުގެ ސަރަހައްދު ގެއްލިފައި އޮތުން ކަމަށް ޔާމީން ވިދާޅުވިއެވެ.
ޔާމީން ވިދާޅުވީ މި މައްސަލަތަކަކީ މިހާރުގެ ރައީސް ޑރ.މުހައްމަދު މުއިއްޒު ހިމެނިވަޑައިގަންނަވާ ގޮތަށް މީގެކުރިން ވެސް އަޑުއުފުލިކަންކަން ކަމަށާއި، ނަމަވެސް ރައީސް މުއިއްޒު ވެރިކަމަށް ވަޑައިގަންނަވާ މިކަންކަން ދިފާއު ކުރައްވާ ކަމަށެވެ. އަދި މިހާރު އިންޑިއާ އައުޓް ނުކިޔެންވީ ކީއްވެގެންތޯ ޔާމީން ސުވާލުކުރެއްވިއެވެ.
ޔާމީން ވިދާޅުވީ ރައީސް މުއިއްޒުއާއި އެއްވެސް އިރެއްގައި ޒާތީ ނުވާ ކަމަށެވެ. އަދި ރައީސް މުއިއްޒު ވެރިކަމުގައި ހުންނެވި ނަމަވެސް ޝައްކަތްނެތް ގޮތުގައި އިންޑިއާ އައުޓް ކެންޕޭނަށް ނުކުންނާނެ ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ޖަލަށްލި ނަމަވެސް ސިޔާސީ ފިކުރާ ވިސްނުމަކަށް ބަދަލު ނާންނަ ކަމަށެވެ.
