އއ. ތޮއްޑޫ މަގުހެދުމުގެ މަޝްރޫއުގެ މަސައްކަތް ފަށައިފިއެވެ.

ތޮއްޑޫގައި ބޭއްވި ރަސްމިއްޔާތެއްގައި މި މަޝްރޫއު ފައްޓަވައިދެއްވީ ދިވެހި ބަހާއި ސަގާފަތާއި ތަރިކައާބެހޭ ވަޒީރު އާދަމް ނަސީރު އިބްރާހީމެވެ. މި ރަސްމިއްޔާތުގައި އާރުޑީސީގެ މެނޭޖިންގ ޑިރެކްޓަރު ބްރިގޭޑިއަރ ޖެނެރަލް (ރޓ) އަލީ ޒުހައިރާއި ކުންފުނީގެ އިސް ބޭފުޅުންގެ އިތުރުން ކައުންސިލް މެންބަރުން ބައިވެރިވެވަޑައިގަތެވެ.

މި މަޝްރޫއުގައި ސޮއިކުރެވުނީ 2023 ވަނަ އަހަރުގެ ސެޕްޓެމްބަރު މަހުގެ 5 ވަނަ ދުވަހުއެވެ. މަޝްރޫއުގެ ޖުމްލަ އަގަކީ 77,426,106.17 ދިވެހި ރުފިޔާއެވެ.

މި މަޝްރޫއުގެ ދަށުން ޖުމްލަ 2.84 ކިލޯމީޓަރު ހިމެނޭހެން 5 މަގެއްގެ މަސައްކަތް ކުރެވޭނެއެވެ. އއ. ތޮއްޑޫގެ މަގުތައް ތަރައްގީކުރެވިގެންދާނީ ސްޓޯރމް ވޯޓަރ ނެޓްވޯރކާއި، ފެން ހިއްކުމަށް ގަޓަރުތައް ހެދުމާއި، ފެނާއި ނަރުދަމާ ހިމެނޭހެން ޔުޓިލިޓީ ލައިންތަކަށް ބޭނުންވާ ޖަންކްޝަންތައް ބެހެއްޓުމާއި، މަގު ބައްތި ޖެހުމާއި ސްޕީޑް ބްރޭކަރާއި ރޯޑް ސައިން ބޯޑާއެކުގައެވެ.

ތޮއްޑޫ މަގުތައް ތަރައްގީކުރަން ނިންމާފައިވަނީ ތާރުގެ ބަދަލުގައި ގައު އަތުރައިގެންނެވެ. ތޮއްޑޫގައި ގާއިމް ކުރެވޭ އެ ކޯޕަރޭޝަނުގެ ސައިޓާއި މަގު ހެދުމުގެ މަޝްރޫއަށް ބޭނުންވާ ސާމާނު އިތުރުން ވެހިކަލްތައް މިހާރުވަނީ އެރަށަށް ފޮނުވާފައި ކަމަށް އާރުޑީސީން ބުނެއެވެ.