ބާސެލޯނާ ކަޓުވާލީ ރެފްރީ، އެއީ ގޯސް ރަތްކާޑެއް: ޒަވީ

ޗެމްޕިއަންސް ލީގު ފުޓްބޯޅަ މުބާރާތުން ބާސެލޯނާ ކަޓުވާލީ ރެފްރީ ކަމަށާއި އޭނާގެ ނިންމުންތަކާއި ދެއްކި ރަތް ކާޑު ވަރަށް ގޯސް ކަމަށް ކޯޗު ޒަވީ ހަނާންޑޭޒް ބުނެފި އެވެ.

ފަހަތުން އަރައި 4-1އިން ޕީއެސްޖީ މޮޅުވި މެޗަށް ފަހު ވާހަކަ ދައްކަމުން ޒަވީ ބުނީ މެޗުގެ 29 ވަނަ މިނެޓުގައި ބާސެލޯނާގެ ޑިފެންޑަރު ރޮނަލްޑް އަރައުހޯ އަށް ރޫމޭނިޔާގެ ރެފްރީ ދެއްކީ ރަތްކާޑާއެކު މުޅި މެޗު ބަދަލުވެގެން ހިނގައްޖެ އެވެ.

މެޗުގައި ޒަވީ އާއި ބާސެލޯނާގެ ގޯލްކީޕިން ކޯޗަށް ވެސް ވަނީ ރަތްކާޑު ދައްކައި ދަނޑުން ފޮނުވާލައިފަ އެވެ. އެއީ ޕެނަލްޓީ އޭރިޔާ ތެރެއިން ގުންޑޮގަން އަށް ވައްޓާލުމުން ޕެނަލްޓީ އަށް އެޕީލްކުރުމަށްފަހު ދަނޑުގައި ހުރި ޕާޓްޝަނެއްގައި ފައިން ޖެހުމުންނެވެ.

އޭނާ ބުނީ ލަމީން ޔަމާލްގެ މޮޅު ޕާހަކުން ރަފީނިއާ ޖެހި ގޯލަށް ފަހު ރޮބަޓް ލޮވޮންޑޯސްކީ ހުރަސް ދަނޑިމަތިން ޖެހި ބޯޅަ އާއި ޕީއެސްޖީ ލީޑް ނެގި ފަހުން ގުންޑޮގަން ދަނޑީގައި ޖެހި ބޯޅައަކީ ލިބުނު ފުރުސަތުތަކެއް ކަމަށާއި އެއިން ފުރުސަތެއް ގޯލަކަށް ހަދާލެވުނު ނަމަވެސް ބަލިވުން ދުރު ކަމަށެވެ.

ރަތްކާޑަށް ފަހު މުޅިން ފަހަތަށް ޖެހިގެން ކުޅެމުން އައި ބާސެލޯނާ ކޮޅަށް ފުރަތަމަ ގޯލު ޖެހީ 42 ވަނަ މިނެޓުގައި އޮސްމާނޭ ޑެމްބެލޭ އެވެ. އޭގެ ފަހުން ފަހު ހާފުގެ ފުރަތަމަ 10 މިނެޓު ތެރޭގައި ނަތީޖާ ބަދަލުކޮށްލީ ލިބުނު ޕެނަލްޓީއަކުން އެމްބާޕޭ އާއި ވިޓީނިއާގެ ގޯލުތަކުންނެވެ. އެމްބާޕޭ އިތުރު ގޯލެއް ވެސް ޖެހި އެވެ.

މުބާރާތުގެ ސެމީ ފައިނަލުގައި ޕީއެސްޖީ ކުޅެން ޖެހޭނީ ރޭ އެތްލެޓިކޯ މެޑްރިޑް އަތުން މޮޅުވި ބޮރޫޝިޔާ ޑޯޓްމުންޑާ އެވެ.