އެތްލެޓިކޯ ކަޓުވާލައި ޑޯޓްމުންޑް ސެމީ އަށް

އެތްލެޓިކޯ މެޑްރިޑް 5-4އިން ކަޓުވާލުމަށްފަހު ޖަރުމަނުގެ ބޮރޫޝިޔާ ޑޯޓްމުންޑް ޗެމްޕިއަންސް ލީގުގެ ސެމީ ފައިނަލުން ޖާގަ ހޯދައިފި އެވެ.

މި ދެ ޓީމު އެތްލެޓިކޯގެ ދަނޑުގައި ކުޅުނު މެޗު 2-1އިން ޑޯޓްމުންޑް ބަލިވި ނަމަވެސް ރޭގެ މެޗު ކާމިޔާބު ކުރީ 4-2އިންނެވެ.

މުބާރާތުގެ ސެމީ ފައިނަލުގައި ޑޯޓްމުންޑް ކުޅެން ޖެހޭނީ ރޭ ބާސެލޯނާ އަތުން މޮޅުވި ފްރާންސްގެ ޕީއެސްޖީއާ އެވެ.

މެޗަށް ފަހު ކޯޗު ޓެރްޒިކް ބުނީ ކުރީ މެޗުން ބަލިވެފައި އޮތުމުން މުޅި ޓީމު ވެސް އޮތީ އަމިއްލަ ދަނޑުގައި މޮޅުވާން ގަދައަޅައިގެން ކަމަށާއި 2013ގެ ފަހުން ފުރަތަމަ ފަހަރަށް ސެމީ ފައިނަލަށް ދެވުނީ އެރޫހުގައި ކުރި މަސައްކަތުން ކަމަށެވެ.

އޭނާ ބުނީ ސެމި ފައިނަލުގައި ޕީއެސްޖީއާ ދެކޮޅަށް ކުޅެން ޕެރިހަށްދާނީ އެއީ އެންމެ މޮޅު ޓީމު ކަމުގައި ދެކިގެން ކަމަށެވެ.

އެތްލެޓިކޯގެ ކޯޗު ޑިއެގޯ ސިމިއޯނީ ބުނީ ޑޯޓްމުންޑްކީ އެމީހުންގެ ދަނޑުގައި ބަލިކުރަން އުނދަގޫ ޓީމެއް ކަމަށެވެ.