ރެއާލް މެޗުގައި ކައިލް ވޯކާ ފެނުން ގާތް: ގާޑިއޯލާ

އަނިޔާވެފައިވާ ޑިފެންޑަރު ކައިލް ވޯކާ ޗެމްޕިއަންސް ލީގުގެ ކުއާޓާ ފައިނަލުގައި ރެއާލް މެޑްރިޑާ ދެކޮޅަށް ކުޅެންޖެހޭ ފަހު މެޗުގައި ފެނުން ގާތް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

އޭނާ ބުނީ ފުރަތަމަ ލެގުގައި ދެ ޓީމު އެއްވަރުވި މެޗުގައި ވޯކާ ނެތުމުގެ އުނިކަން ޓީމުން ފެނުނު ކަމަށެވެ. ނަމަވެސް އޭނާ އަށް ލިބިފައިވާ އަނިޔާ މަޑުމަޑުން ރަނގަޅު ވަމުން އަންނާތީވެ ރެއާލްއާ ދެކޮޅަށް ކުޅުމުގެ ފުރުސަތު ބޮޑު ކަމަށެވެ.

އެންމެ ފަހުގެ ޗެމްޕިއަން ޓީމުގެ ކޯޗު ބުނީ އަމިއްލަ ދަނޑުގައި މުބާރާތުގެ އެންމެ ކާމިޔާބު ޓީމު ބަލިކުރަން ކުޅެންޖެހޭ މެޗު ވަރަށް ވަރުގަދަވާނެ ކަމަށާއި ރެއާލް މެޑްރިޑް ބަލިކުރުމަކީ އަބަދުވެސް އުނދަގޫ ކަމެއް ކަމަށެވެ.

ސިޓީ އާއި ރެއާލް ކުޅޭ މެޗު އޮންނާނީ އަންނަ ބުދަ ދުވަހުގެރޭ ދަންވަރު ސިޓީގެ އިއްތިހާދު ސްޓޭޑިއަމުގަ އެވެ.