މިއަދުގެ ސަރުކާރުގައި ތަރައްޤީގެ މަޝްރޫއުތައް ހުރީ ބުރަކި ޖެހިފައި، އެ ބުރަކި ނައްޓާލަން ޖެހޭ: ސާލިހު
ވައުދުތައް ފުއްދުމުގައި ރައްޔިތުން މަޖިލީހުގެ ދައުރާއި އަދި އިދިކޮޅު ޕާޓީގެ ދައުރު ވެސް މުހިންމު
ކުރީގެ ރައީސް އިބްރާހީމް މުޙައްމަދު ޞާލިޙު
މިއަދުގެ ސަރުކާރުގައި ތަރައްގީގެ މަޝްރޫއުތައް ހުރީ "ބުރަކި" ޖެހިފައި ކަމަށާއި، އެ ބުރަކި ނައްޓާލަން ޖެހޭކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުޙައްމަދު ސާލިހު ވިދާޅުވެއްޖެއެވެ.
ބުދަ ދުވަހުގެ ރޭ ފުވައްމުލަކު މެދު ދާއިރާގައި ބޭއްވި އެމްޑީޕީގެބމިސްރާބު ހަމަ މަގަށް ޖަލްސާގައި ރައީސް ސާލިހު ވިދާޅުވީ، ފުވައްމުލަކު ތަރައްގީއަށްޓަކައި ކުރަންޖެހޭ އަދިވެސް ވަރަށް ގިނަ މަސައްކަތްތައް އެބަހުރި ކަމަށެވެ. ވޭތުވެދިޔަ ރިޔާސީ އިންތިޚާބުގެ ތެރޭގައި އޭގެ ތެރެއިން އެމްޑީޕީން ވައުދުވާ ކަންކަން ފާހަގަކޮށްފައިވާނެކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ، އޭގެ ތެރެއިން އެއްކަމަކީ އެ ރަށުގެ އެއާޕޯޓު ބޮޑު ކުރުމުގެ ވާހަކަ ކަމަށެވެ. އެއީ މިއަދު ވެރިކަމުގައި ހުންނެވި ރައީސް ޑރ.މުއިއްޒު ވެސް ވެވަޑައިގެންފައިވާ ވައުދުފުޅެއްކަން ފާހަގަ ކުރައްވައި ރައީސް ސާލިހު ވިދާޅުވީ، އެކަމަށްޓަކައި ރައްޔިތުން މަޖިލީހުގެ ތެރެއިން ކޮށްދެވެން ހުރި ހުރިހާ ކަމެއް އެމްޑީޕީގެ މެމްބަރުން ފަހިކޮށްދެއްވާނެ ކަމަށެވެ.
މި ސަރުކާރު ވެރިކަމަށް އައީ ވަރަށް ގިނަ ވައުދުތަކެއް ވެގެންކަން ފާހަގަ ކުރައްވައި ރައީސް ސާލިހު އިތުރަށް ވިދާޅުވީ، އެވައުދުތައް ފުއްދުމުގައި ރައްޔިތުން މަޖިލީހުގެ ދައުރާއި އަދި އިދިކޮޅު ޕާޓީގެ ދައުރު ވެސް މުހިންމު ކަމަށެވެ. އެގޮތުން ބަޖެޓުގައި އެއްޗެއް ޖެހިދާނެ ކަމަށާއި، ނަމަވެސް ސަރުކާރު ހިންގަން ތިބޭ ބަޔަކު އެ މަޝްރޫއުތައް އިސްފަސްކޮށް ކަންކަން ނުވެ ދިއުމުން މަޖިލީހުން ސަރުކާރު ޖަވާބުދާރީ ކުރުވަންވެސް ޖެހޭނެކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ، ސަރުކާރު ޖަވާބުދާރީ ކުރުވުމަށް އެންމެ ފައްކާ ބަޔަކީ އެމްޑީޕީ ކަމަށެވެ.
ރައީސް ސާލިހު އިތުރަށް ވިދާޅުވީ، އެމްޑީޕީގެ ސިޔާސަތަކީ ރައްޔިތުންނަށް ޚިދުމަތްކުރުން ކަމަށެވެ. އެމްޑީޕީއަށް ރައްޔިތުން މަޖިލީހުގެ މެޖޯރިޓީ ބޭނުންވަނީ ވެސް އެ ސަބަބާހުރެކަން ރައީސް ސާލިހު ފާހަގަ ކުރެއްވިއެވެ.
މީގެ އިތުރުން، ގައުމުގެ މިސްރާބު ހަގީގަތުގައި ވެސް ހަމަ މަގަށް އަޅުވަންޖެހޭ ކަމަށާއި، މިއަދު މި ޤައުމު ދަނީ ގިނަ ރައްޔިތުން ބޭނުންވި މިސްރާބަކަށް ނޫންކަމަށްވެސް ރައީސް ސާލިހު ވިދާޅުވިއެވެ. އެގޮތުން މި ސަރުކާރުގައި ތަރައްގީގެ މަޝްރޫއުތައް ހުރީ "ބުރެކި ޖެހިފައި" ކަން ފާހަގަކުރައްވައި ރައީސް ސާލިހު ވިދާޅުވީ، އެ ބުރަކި ނައްޓާލަން ޖެހިފައިވާ ކަމަށެވެ.
