ސަރުކާރުން ހުރަސް އެޅުމުން ވެސް ރާޅުގަނޑު ސަރަހައްދުގައި ޖަލްސާ ބާއްވާ، ޕީއެންއެފް އުފައްދައިފި

ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދަވާ ޕީއެންއެފް އުފެއްދެވުމުގެ ޖަލްސާއަށް ސަރުކާރުން ހުރަސް އެޅުމުން އެ ޖަލްސާ ނިއުޕޯޓް ސީވިއު ހުންނަ ސަރަހައްދު (ރާޅުގަނޑު) ސަރަހައްދުގައި ބާއްވާ ޕާޓީ އުފައްދައިފިއެވެ.

ރާޅުގަނޑު ސަރަހައްދަށް ޖަލްސާ ބަދަލުކޮށްފައިވަނީ، ޣިޔާސުއްދީން ސްކޫލް ހިންގާ ކުންފުނިން އެތަނުގައި ޖަލްސާ ބާއްވަން ހުއްދަ ހޯދާ ޖަލްސާ ބާއްވަން ކުޑައިރުކޮޅަކަށް ވެފައިވަނިކޮށް، ފުލުހުން އެތަނަށް ގޮސް ސްކޫލް ބަންދުކޮށް މެންބަރުންނަށް އެތެރެއަށް ނުވަދެވުމުންނެވެ. ސަރުކާރުން ވަނީ އެޑިއުކޭޝަން މިނިސްޓްރީ މެދުވެރިކޮށް ސްކޫލުގައި ޖަލްސާ ނުބޭއްވޭނެކަން ފުލުހުންނަށް އަންގާ ފުލުހުން ފޮނުވައިގެން ސްކޫލު ގޭޓު ބަންދުކޮށް އެތަނަށް އެއްވެސް ބަޔަކަށް ނުވަދެވޭ ގޮތަށް ހަދާފައެވެ.

ޖަލްސާ ބާއްވަން އުޅުނު ޣިޔާސުއްދީން ސްކޫލަށް އިލެކްޝަންސް ކޮމިޝަންގެ އޮފިޝަލުންވެސް ވަނުމަށް ފުލުހުން ހުރަސް އެޅިއެވެ. އަދި އެ ސަރަހައްދުގައި ތިބި ޕީއެންއެފްގެ މެންބަރުންގެ ގަޔަށް ޕެޕަރ ސްޕްރޭޖަހާ އެ ސަރަހައްދު ބަންދުކުރިއެވެ.

އަދި އެންމެފަހުން ރާޅުގަނޑުގައި ޖަލްސާ ބާއްވަން ހުއްދަ ހޯދާ ޕީއެންއެފް އުފައްދާ ޖަލްސާ ބާއްވާފައިވަނީ އެތަނުގައެވެ. އަދި ޕީއެންއެފް އުފައްދާ ޖަލްސާއަށް ރައީސް ޔާމީންގެ އަނބިކަނބަލުން ފާތިމަތު އިބްރާހިމް ވަޑައިގެން ބައިވެރިވެވަޑައިގެންނެވިއެވެ.

ޕީއެންއެފް އުފެއްދުމަށް ބޭއްވި ޖަލްސާގައި 420 މެންބަރުން ބައިވެރިވިއެވެ. މި ޖަލްސާގައި ވަނީ ޕާޓީގެ ކުލަ، ލޯގޯ، ސިއްކަ އަދި ޕާޓީގެ އެޑްރެސް ފާސްކޮށްފައެވެ. ޕާޓީގެ ނަމަކަށް ޕީޕަލް ނެޝަނަލް ޕްރަންޓް، ރަމްޒީކޮށް ކިޔަން ފާސްކޮށްފައިވަނީ ޕީއެންއެފްއެވެ. މީގެ އިތުރުން ޕާޓީގެ އަސާސީ ގަވާއިދު ވެސް ވަނީ ފާސްކޮށްފައެވެ.

މީގެ އިތުރުން ޕާޓީގެ ދާއިމީ ސެނެޓް އިންތިހާބުކުރެވެންދެން ވަގުތީ ސެނެޓް ވަނީ އިންތިހާބުކޮށްފައެވެ. އަދި ޕާޓީގެ ދާއިމީ މަގާމުތަކަށް މެންބަރުން އިންތިހާބުކުރެވެންދެން ވަގުތީގޮތުން މެންބަރުން ވަނީ އައްޔަންކޮށްފައެވެ.

ވަގުތީ ސެނެޓުގައި ރައީސް އަބްދުﷲ ޔާމީން، ޒެއިން އަބްދުﷲ ޔާމީން، ޑރ. މުހައްމަދު ޖަމީލް އަހުމަދު، މުހައްމަދު މަލީހު ޖަމާލު، މުހައްމަދު ޝަވީދު، ޑރ. ޖިހާދު ހަސަން، ހުސައިން ވަހީދު، އަހުމަދު މުސްތަފާ މުހައްމަދު، އަހުމަދު ފަޔާޒް، އަލީ ޝިޔާން ރާޝިދު، އަބްދުﷲ ހުސައިން، އަދުލީ އިސްމާއިލް، އަނީސާ ސައީދު، ފާތިމަތު ރަހުމާގެ އިތުރުން ޕީއެންއެފް އަދި ރައީސް ޔާމީންގެ އަރިސް ބޭފުޅުން ހިމެނިވަޑައިގަންނަވައެވެ.

ދާއީމީ މަގާމުތަކަށް މީހުން އިންތިހާބު ކުރެވެންދެން ޕާޓީގެ އިސް މަގާމުތަކަށް ވަގުތީގޮތުން އައްޔަން ކުރައްވާފައިވަނީ 4 މަގާމަކަށެވެ. އެ މަގާމުތަކަކީ:

ޕާޓީގެ ރައީސްކަމަށް ޒެއިން އަބްދުﷲ ޔާމީން

ސެކްރެޓަރީ ޖެނެރަލްގެ މަގާމަށް މުހައްމަދު މަލީހު ޖަމާލް

ޓްރެޝަރަރ އަކަށް އަހުމަދު މުސްތަފާ މުހައްމަދު

ރެޖިސްޓްރާ އަލީ ޝިޔާން ރާޝިދު

މި ޖަލްސާގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވާނެ ކަމަށް ކުރިން ޕީއެންއެފްއިން ބުނި ނަމަވެސް އެމަނިކުފާނު މިޖަލްސާގައި ބައިވެރިވެވަޑައިނުގަންނަވައެވެ.