ޕީއެންއެފްގެ ޖަލްސާއަށް ފުލުހުން ހުރަސްއަޅައިފި
9 އެޕްރީލު 2024 | އަންގާރަ 17:24ޣިޔާސުއްދީން އިންޓަރނޭޝަނަލް ސްކޫލުގެ ފަރާތުން އެސްކޫލުގައި ބޭއްވުމަށް މަސައްކަތް ކުރަމުންދާ ހުއްދަދެވިފައިނުވާ އެއްވުމެއް ހުއްޓުވައިދިނުމަށް އެދިފައިވޭ
ޕީއެންއެފް ޖަލްސާއަށް ފުލުހުން ހުރަސްއަޅަނީ
ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދަވާ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ޣިޔާސުއްދީން ސްކޫލް ހޯލުގައި ބާއްވަން އުޅުނު ޖަލްސާއަށް ފުލުހުން ހުރަސް އަޅައިފިއެވެ.
މިރޭ 9:15 ގައި ޖަލްސާ ބޭއްވުމަށް ޕާޓީގެ އިސްވެރިންނާއި މެމްބަރުން ޣިޔާސުއްދީން ސްކޫލަށް ދިޔައިރު ފުލުހުން ވަނީ ޣިޔާސުއްދީން ސްކޫލްގެ ގޭޓް ބަންދުކޮށް ބައިވެރިން ސްކޫލް ތެރެއަށް ވަނުމަށް ހުރަސްއަޅާފައެވެ.
އެކަމާއި ގުޅޭގޮތުން ފުލުހުން މީޑިޔާއަށް ފޮނުވި މެސެޖެއްގައި ބުނެފައިވަނީ ޣިޔާސުއްދީން އިންޓަރނޭޝަނަލް ސްކޫލުގެ ފަރާތުން އެސްކޫލުގައި ބޭއްވުމަށް މަސައްކަތް ކުރަމުންދާ ހުއްދަދެވިފައިނުވާ އެއްވުމެއް ހުއްޓުވައި ސްކޫލު ރައްކާތެރިކުރުމަށް، މިނިސްޓްރީ އޮފް އެޑިއުކޭޝަންގައި އެދިފައިވާތީ، އެކަން ތަންފީޒުކުރުމަށް، މިނިސްޓްރީގެ ފަރާތުން ފުލުހުންގެ އެހީތެރިކަމަށް އެދިފައިވާތީ، އެސްކޫލުގައި މިވަގުތު ކުރިއަށްދާ އެއްވުމަށް ފުލުހުންދަނީ އެޓެންޑް ކުރަމުންކަމަށެވެ. އެޑިޔުކޭޝަން މިނިސްޓްރީން ފުލުހުންނަށް މިގޮތަށް އެދިފައިވަނީ މިރޭ 6:42 ގައިކަމަށް ފުލުހުން ބުނެފައިވެއެވެ.
ޣިޔާސުއްދީން ސްކޫލުން ވަނީ ސްކޫލް ރައްކާތެރިކުރުމަށް އެޑިޔުކޭޝަން މިނިސްޓްރީގައި އެދިފައެވެ. ޣިޔާސުއްދީން ސްކޫލުން ވަނީ މިރޭ އެސްކޫލްގައި ބޭއްވުމަށް ހަމަޖެހިފައިވާ ޖަލްސާ ބޭއްވެން ނެތްކަން ޕީއެންއެފް އަށް އަންގާ ކޮށްފައިވާ ޕޭމަންޓް ރީފަންޑްކުރުމަށް އެކައުންޓް ނަންބަރެއް ހިއްސާކުރުމަށް އެދި ޕީއެންއެފް އަށް މެއިލެއް ފޮނުވާފައެވެ.
ޕީއެންއެފް އުފެއްދުމަށް ބާއްވަންޖެހޭ ޖަލްސާ ބޭއްވުމަށް ފުލުހުން ހުރަސް އަޅާފައިވާއިރު މިޖަލްސާ އެންމެ ފުރަތަމަ ބާއްވަން ތާވަލުކުރީ ހޯމަ ދުވަހުގެ ރެއެވެ. ނަމަވެސް ދައުލަތުގެ އެކި އިދާރާތަކުން ލިބެންޖެހޭ އެހީތެރިކަން ނުލިބުމުގެ ސަބަބުން ޖަލްސާ ފަސްކުރެއްވީ ކަމަށާއި މިޖަލްސާގައި ކުރީގެ ރައީސް ޔާމީން ބައިވެރިވެވަޑައިގަންނަވާނެ ކަމަށާއި ޕީއެންއެފް ނުހުއްޓުވޭނެ ކަމަށް ޕާޓީ އުފެއްދުމުގައި އިސްކޮށް ހަރަކާތްތެރިވާ މަލީހު ޖަމާލު ރާއްޖެއެމްވީ އާ ވާހަކަދައްކަވަމުން ވަނީ ވިދާޅުވެފައެވެ. އަދި މިއަދުވެސް އެޖަލްސާ ބޭއްވުމަށް ސަރުކާރުގެ އެކި ފަރާތްތަކުން ހުރަސްއަޅަމުން ގެންދާކަމަށް ވަނީ ވިދާޅުވެފައެވެ.
ޖަލްސާ ބޭއްވުމަށް ހުރަސްއެޅުމުން ޕީއެންއެފްގެ ސަޕޯޓަރުން އަންނަނީ އެސަރަހައްދަށް އެއްވެ ސަރުކާރާ ދެކޮޅަށް އަޑުއުފުލަމުންނެވެ.
