ފުލުހަކަށް ވަޅިންދިން ހަމާލާ ކުށްވެރިކުރަން، އަވަސް ޝިފާއަކަށް އެދެން:ރައީސް ނަޝީދު
މިހަމަލާ އަމާޒުވެފައިވަނީ ރައްޒާނުގެ ކުރިމަތިން ވައަތު ކޮނޑާ މެއާ ދޭތެރެއަށް
ރައްޒާނަށް ހަމަލާދިން އަޒުހަރު އިބްރާހިމް
ފުލުސް ކޮންސްޓަބަލް އަލީ ރައްޒާންއަށް ވަޅިން ދިން ހަމަލާ ކުށްވެރި ކުރައްވާ ކަމަށާއި އޭނާއަށް އަވަސް ޝިފާއަކަށް އެދިވަޑައިގަންނަވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ ރައްޒާންގެ ހިތްވަރަށް މަރުހަބާ ދަންނަވާ ކަމަށާއި އަވަސް ޝިފާއަކަށް އެދިވަޑައި ގަންނަވާ ކަމަށެވެ. އަދި ވަޅި ޖެހުމުގެ ފިނޑި އަމަލު އަބަދުވެސް ކުށްވެރި ކުރައްވާ ކަމަށް ވެސް ރައީސް ނަޝީދު ވިދާޅުވި އެވެ.
ރައްޒާނަށް އަމަލާދީ ފައިވަނީ މާލެއިން ފުރައިގެން މާފުއްޓަށް ދާ ލޯންޗަކުން އެއްޗެހިތަކެއް މާފުށީ ޖަލަށް އެތެރެކުރުމަށް އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މާފުށީ ޕޮލިސް ސްޓޭޝަނާއި ފުލުހުންގެ އިންޓެލިޖެންސް އަދި މޯލްޑިވްސް ކަރެކްޝަނަލް ސަރވިސް ގުޅިގެން ހުކުރު ދުވަހުގެ ރޭ ހިންގި އޮޕަރޭޝަނެއްގައި ކަމަށް ފުލުހުން ބުނެއެވެ.
ފުލުހުން ބުނީ ރައްޒާނަށް ތޫނު އެއްޗަކުން ހަމަލާދީފައިވަނީ މާފުއްޓަށް ލޯންޗުން އައި މީހަކު މޫދަށް ފުންމާލައިގެން ޖަލަށް ވަންނަން މަސައްކަތްކުރަނިކޮށް އޭނާ ހުއްޓުވައި ފުލުހުންގެ ބެލުމުގެ ދަށަށް ގެނައުމަށް މަސައްކަތްކުރަމުން ދަނިކޮށެވެ.
ރައްޒާނަށް ދިން މިހަމަލާ އަމާޒުވެފައިވަނީ އޭނާގެ ކުރިމަތިން ވައަތު ކޮނޑާ މެއާ ދޭތެރެއަށް ކަމަށް ފުލުހުން ބުނެއެވެ. ރައްޒާނަށް ލިބުނު ޒަޚަމަށް މާފުށީ ސިއްޙީ މަރުކަޒުގައި ފަރުވާދިނުމަށްފަހު މޯލްޑިވްސް ކަރެކްޝަނަލް ސަރވިސްގެ އެހީތެރިކަމާއެކު ވަނީ މާލެ ގެނެސްފައެވެ. އަދި އޭނާއަށް އައިޖީއެމް ހޮސްޕިޓަލްގެ އައިސީޔޫގައި ދަނީ ފަރުވާދެމުން ކަމަށް ފުލުހުން ބުނެއެވެ.
