މިސަރުކާރުން މަސައްކަތް ކުރަނީ ދޮގާއި މަކަރުގެ ތެރެއިން ބާރުވެރިކަން ހޯދައިގެން ރައްޔިތުން ބިކަ ކުރަން: ފައްޔާޒު

މިސަރުކާރުން މަސައްކަތް ކުރަނީ ދޮގާއި މަކަރުގެ ތެރެއިން ބާރުވެރިކަން ހޯދައިގެން ރައްޔިތުން ބިކަ ކުރުމަށް ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.

ކުރިޔަށް އޮތް ރައްޔިތުންގެ މަޖިލީހުގެ އިންތިޚާބަށް އައްޑޫ ސިޓީއަށް ވާދަކުރައްވާ އެމްޑީޕީގެ ކެންޑިޑޭޓުންގެ ތަރާވީހުގައި ފައްޔާޒު ވަނީ ވަރަށް ބޮޑަށް ސަރުކާރަށް ފާޑު ވިދާޅުވެފައެވެ. ދޮގު އިންތިހާއަށް ހަދަމުންދާކަން ފާހަގަކުރައްވައި މިއަދު ސަރުކާރުގެ ބޭފުޅުންނަށް އެނޫން ކަމެއް ދަސްވެފައިނުވާ ކަމަށް ފައްޔާޒު ވިދާޅުވިއެވެ. ފައްޔާޒު ވިދާޅުވީ މިއަދުގެ ސަރުކާރުން ދޮގު ހަދަމުން ކުރިއަށްދާ ކަމަށާއި، ޑިމޮކްރަސީއެއް ނުދަންނަ ކަމަށެވެ.

ލާމަރުކަޒީ ނިޒާމަށް އިޝާރާތް ކުރައްވައި ފައްޔާޒު ވިދާޅުވީ މި ނިޒާމް ސަރުކާރުން ގަބޫލުނުކުރާ ކަމަށާއި، މަސައްކަތް ކުރަނީ ދޮގާއި މަކަރުގެ ތެރެއިން ބާރުވެރިކަން ހޯދައިގެން ރައްޔިތުން ބިކަކޮށް ރައްޔިތުން އަޅުވެތި ކުރުމަށް ކަމަށެވެ.

މީގެ އިތުރުން ފައްޔާޒު ވިދާޅުވީ ލާމަރުކަޒީ ނިޒާމުގެ ތެރެއިން މުޅި ރާއްޖެ ތަރައްގީ ކުރުމަކީ އެމްޑީޕީގެ ސިޔާސަތެއް ކަމަށާއި، ތަރައްގީގެ ގިނަ މަޝްރޫއުތައް ރާއްޖޭގެ އެކިރަށްތަކުގައި ފެށީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ކަމަށެވެ. އެގޮތުން އައްޑޫސިޓީއަށް ޚާއްސަ އިސްކަމެއްދިން ފައްޔާޒު ފާހަގަކުރެއްވިއެވެ.

ފައްޔާޒު ވިދާޅުވީ ލާމަރުކަޒީ ނިޒާމުގެ ތެރެއިން އައްޑޫސިޓީ ތަރައްގީ ކުރެވި، އައްޑޫ ސިޓީގައި އެމްޑީޕީ ސަރުކާރުން ފަށާފައިވާ އިގްތިސާދީ މަޝްރޫއުތައް ރަނގަޅަށް ކުރިޔަށްދާނަމަ އައްޑޫގެ އިގްތިސާދު އަތުނުޖެހޭ ހިސާބަށްދާނެ ކަމަށެވެ. އަދި މިމަޝްރޫއުތައް ބާރު ސްޕީޑްގައި ކުރިއަށް ގެންދިއުމަށް ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި އައްޑޫ ސިޓީ ތަމްސީލުކުރާ އެމްޑީޕީ މެމްބަރުން މަޖިލީހުގައި ތިބުން މުހިންމުކަމަށް ފައްޔާޒު ވިދާޅުވިއެވެ.