އައްޑޫއަށް ހެޔޮ ގޮތެއް އޮތިއްޔާ އޮންނާނީ އަބަދުވެސް އެމްޑީޕީ އާއެކު: ފައްޔާޒު

އައްޑޫ ސީޓީއަށް ހެޔޮ ގޮތެއް އޮތިއްޔާ އޮންނާނީ އަބަދުވެސް އެމްޑީޕީ އާއެކުކަމަށް އެޕާޓީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.

ކުރިޔަށް އޮތް ރައްޔިތުންގެ މަޖިލީހުގެ އިންތިޚާބަށް އައްޑޫ ސިޓީއަށް ވާދަކުރައްވާ އެމްޑީޕީގެ ކެންޑިޑޭޓުންގެ ތަރާވީހުގައި ވާހަކަދައްކަވަމުން ފައްޔާޒު ވިދާޅުވީ އައްޑޫ ސިޓީއަށް މިހާރު ލިބިފައިވާ ތަރައްގީއާ ކުރިއެރުން އަނެއްކާވެސް ހަލާކުވާން ނޭދޭކަމަށްވާނަމަ އައްޑޫގެ ރައްޔިތުންގެ ފަރާތުން ވަކާލާތުކުރާނެ އެމްޑީޕީގެ މެމްބަރުންނަށް ވޯޓު ދެއްވުމަށް އެދިވަޑައިގަންނަވާކަމަށެވެ. ފައްޔާޒު ވިދާޅުވީ އައްޑޫ ސިޓީގެ ތަރައްގީއަށް މަސައްކަތްކުރިކަމަށްވާނަމަ އެމަސައްކަތެއްކޮށްފައިވަނީ އެމްޑީޕީގެ ސަރުކާރުތަކުންކަމަށެވެ.

އެގޮތުން 2008 ވަނަ އަހަރު އަދި 2018 ވަނަ އަހަރު އުފެދުނު އެމްޑީޕީ ސަރުކާރުތަކުން އައްޑޫ ސިޓީގެ ތަރައްގީއަށް ގިނަ މަޝްރޫޢުތަކެއް ހިންގާފައިވާކަމަށެވެ. އޭގެ ކުރިންވެސް އަދި ދެމެދުގައިވެސް އައި ސަރުކާރުތަކުން އައްޑޫ ސިޓީއާމެދު ތަރައްގީގެ ތަސައްވުރެއް ނުގެންގުޅޭކަމަށް ފައްޔާޒު ވިދާޅުވިއެވެ.

ނިމިގެންދިޔަ އެމްޑީޕީގެ ސަރުކާރުގައި ވަނީ އައްޑޫ ސިޓީގެ ތަރައްގީއަށް 500 މިލިއަން ޑޮލަރާއި ގާތްކުރާ އަދަދަކަށް ތަރައްގީގެ މަޝްރޫޢުތަކަށް އިންވެސްޓްކޮށްފައިކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ އެމްޑީޕީ ސަރުކާރުން އައްޑޫ ސިޓީއާމެދު ގެންގުޅުނު ތަސައްވަރަކީ ހުރިހާ ކަމެއް އެއް ފަހަރާ ކުރުމުގެ ސިޔާސަތުތަކަމަށެވެ. އެގޮތުން އެއަރޕޯޓާއި، ރިސޯޓްތަކާއި، ގެސްޓް ހައުސް އާއި ބިން ހިއްކުން ފަދަ ބޮޑެތި މަޝްރޫޢުތަކަށް ބޭނުންވާ ފައިސާ ހަމަޖައްސާ އެކަންކަން އެމްޑީޕީ ސަރުކާރު ނިމުމުގެ ކުރިން ފަށާފައިވާކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ އައްޑޫ ސިޓީގައި އެމްޑީޕީ ސަރުކާރުން ފަށާފައިވާ އިގްތިޞާދީ މަޝްރޫޢުތައް ރަނގަޅަށް ކުރިޔަށްދާނަމަ އައްޑޫގެ އިގްތިޞާދު އަތުނުޖެހޭ ހިސާބަށްދާނެކަމަށެވެ. އެކަމުގެ ހުރިހާ ބިންގަލެއް އަޅުއްވާދެއްވާފައިވަނީ ރައީސް އިބްރާހީމް މުހައްމަދު ޞާލިހުކަމަށެވެ.

އަދި އައްޑޫ ސިޓީގައި އެމްޑީޕީ ސަރުކާރުން ތަރައްގީގެ ގިނަ މަޝްރޫޢުތަކެއް ހިންގާފައިވަނީ އެމްޑީޕީން ގަބޫލުކުރާ މުޅި ދިވެހިރާއްޖޭގެ ހުރިހާ ރައްޔިތުންނަށް ހަމަހަމަކަމާއެކު ޚިދުމަތް ލިބެންޖެހޭ ސިޔާސަތުގެ ދަށުންކަމަށް ފައްޔާޒު ވިދާޅުވިއެވެ.

އެހެންކަމުން ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި އައްޑޫ ސިޓީ ތަމްސީލުކުރާ އެމްޑީޕީ މެމްބަރުން މަޖިލީހުގައި ތިބުން މުހިންމުކަމަށް ފައްޔާޒު ވިދާޅުވިއެވެ.