ދަނޑުމަތީގައި ގްރީލިޝްއާ ދިމާކޮށްލީ ކެމެރާތައް ހިތްހަމަޖައްސައިދޭން: ގާޑިއޯލާ

އާސެނަލް އަތުން މޮޅުނުވެވުނު މެޗަށް ފަހު ދަނޑުމަތީގައި ޖެކް ގްރީލިޝްއާ ދިމާކޮށްލީ ކެމެރާތައް ހިތްހަމަޖައްސައިދޭން ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ ގާޑިއޯލާގެ އަމަލުތަކަށް މީޑިޔާތަކުންނާއި ކުރީގެ ބައެއް ކުޅުންތެރިން ފާޑުކިޔަން ފެށުމުންނެވެ.

މެޗު އެއްވަރުވުން، އެއްވަނާގައިވާ ލިވަޕޫލަށްވުރެ ތިން ޕޮއިންޓް މަދުވެ، ޓޭބަލުގެ ތިން ވަނަ އަށް ވެއްޓުނު މެޗަށް ފަހު ގާޑިއޯލާ ވަނީ ދަނޑަށް އަރައި ގްރީލިޝްގެ މިސްޓޭކްތައް ވަރަށް ފާޅުކަން ބޮޑު ގޮތެއްގައި ދައްކައިފަ އެވެ.

އޭނާ އަދި ބުނީ ކުޅުންތެރިން މާބޮޑަށް ގޯސްކޮށް ކުޅުމުން އެކަން ދަނޑުމަތީގައި ދެއްކުމަކީ އޭނާ ކުރާހިތްވާ ކަމެއް ކަމަށާއި އެކަން ކުރަނީ ސަބަބަކަށްޓަކައި ކަމަށެވެ.

ނަމަވެސް ގާޑިއޯލާގެ މި އަމަލަކީ އާއްމުކޮށް އޭނާގެ ފަރާތުން ފެންނަ މަންޒަރެއްނޫނެވެ. އެއަށްވުރެ ބޮޑަށް އޭނާ އަކީ ދަނޑަށް އަރައި ކުޅުންތެރިންނާ ވަރަށް ރަނގަޅަށް މުއާމަލާތްކުރާ ކޯޗެވެ.

މި މެޗު އެއްވަރުވުމުން ތަށި ދިފާއުކުރުމުގެ އަމިއްލަ ބާރު ސިޓީއަށް ގެއްލުނުކަމަށް ގާޑިއޯލާ އެއްބަސްވި އެވެ. ޕްރެމިއާ ލީގުގެ ކުރީގެ ކުޅުންތެރިންނާއި ތަޖުރިބާކާރު ކޯޗުން ބުނަމުންދަނީ އެންމެންގެ ކުރިމަތީގައި ގްރީލިޝްއާ ދިމާކޮށްލުމުގެ ބަދަލުގައި  ޗޭންޖިން ރޫމަށް ގޮސް ކުޅުންތެރިޔާއާ ބޭނުންގޮތަކަށް ވާހަކަދެއްކުން މާބޮޑަށް ވެސް ރަނގަޅު ކަމަށެވެ. މިކަމާ ގުޅޭ ގޮތުން ބައެއް ފަރާތްތަކުން ބުނަނީ މިއީ ގާޑިއޯލާ އާއި ގްރީލިޝްގެ ގުޅުން ގޯސްވާނެ ކަމެއް ކަމަށާއި ކުޅުންތެރިޔާ ސިޓީގައި ދެމިހުރުން ދުރުވެދާނެ ކަމަށެވެ.