މާލެ ސަރަހައްދުން މިހާތަނަށް 300އަށްވުރެ ގިނަ އުޅަނދު ޓޯކޮށްފައިވޭ
2 އެޕްރީލު 2024 | އަންގާރަ 07:36ހޯމަ ދުވަހުގެރޭ އެކަނި ވެސް މާލެސިޓީގެ މާފަންނުގެ އެކި ސަރަޙައްދުތަކުން 19 އުޅަނދެއް ޓޯކޮށްފައިވޭ
ވެހިކަލްތައް ޓޯކުރުމުގެ މަސައްކަތުގެ ތެރެއިން
އާއްމުންނަށް އުނދަގޫވާގޮތަށް މާލޭގެ މަގުތަކުގައި ބަހައްޓާފައި ހުރި އުޅަނދުތައް ނެގުމުގެ މަސައްކަތުގެ ތެރެއިން މިހާތަނަށް 300 އަށްވުރެ ގިނަ އުޅަނދު ޓޯކޮށްފައިވާކަމަށް ފުލުހުން ބުނެފިއެވެ.
އާއްމުންނަށް އުނދަނގޫވާ ގޮތަށް ބަހައްޓާފައިވާ އުޅަނދުތަކާއި ޤަވާއިދާއި ޚިލާފަށް ޕާކްކޮށްފައިވާ އުޅަންދުތައް ޓޯކުރުމުގެ މަސައްކަތް ފުލުހުން ފެށީ ނިމިދިޔަ މާރޗް މަހުގެ 13ވަނަ ދުވަހުއެވެ. ފުލުހުން ބުނީ މި މަސައްކަތުގެ ދަށުން މާލެ އަދި ހުޅުމާލެއިން ގިނަ އަދަދެއްގެ އުޅަނދުތައް ނަގާފައިވާ ކަމަށާއި އެ އުޅަނދުތައް ނައްތާލުމުގެ މަސައްކަތް ކުރިއަށްގެންދާނީ ތިލަފުއްޓަށް ގެންގޮސްގެން ކަމަށެވެ.
މީގެ އިތުރުން ބައެއް ސަރަޙައްދުތަކުގައި ޤަވާޢިދާ ޚިލާފަށް ޕާކުކުރާތީ ފުލުހުން ޚާއްޞަ ސަމާލުކަމެއް ދެމުންދާ ކަމަށް ވެސް ފުލުހުން ބުނެއެވެ. އެގޮތުން އެ ސަރަހައްދުތަކުގެ ތެރޭގައި ގްރީން ޒޯނާއި، ޕަބްލިކް ޓްރާންސްޕޯޓް ދުއްވާ މަގުތައް ހިމެނެއެވެ. ހަމައެހެންމެ މަގުތަކާއި ގޯޅިތަކުގެ ކަންމަތިގެ އިތުރުން ސްކޫލުތައް ހިމެނޭ ސަރަޙައްދުތަކުގައި އާއްމުންނަށް އުނދަނގޫވާގޮތަށް ނުވަތަ ޤަވާއިދާއި ޚިލާފަށް ޕާކްކޮށްފައިވޭތޯ ވެސް ފުލުހުން ބަލަމުންދާކަމަށް ފުލުހުން ބުނެއެވެ.
ފުލުހުން ބުނީ ހޯމަ ދުވަހުގެ ރޭ އެކަނި ވެސް މާލެސިޓީގެ މާފަންނުގެ އެކި ސަރަޙައްދުތަކުން 19 އުޅަނދެއް ޓޯކޮށްފައިވާ ކަމަށެވެ.
ޕާކު ކުރާނެތަނެއް ނުދައްކާ ސްޓިކަރ ނުޖަހާނެކަމަށް ވައުދުވެފައިވާ އަދުގެ ސަރުކާރުން އުޅަނދުތައް ޓޯކުރަމުން ގެންދާތީ އެކަމާމެދު ރައްޔިތުންގެ ނުރުހުން ވަނީ އަމާޒުވެފައެވެ.
