ބަލިކުރަންޖެހޭ ޓީމަކީ ސިޓީ، ލިވަޕޫލާއި އާސެނަލް އޮއްވައި ތަފާތު ބޮޑެއްނުވާނެ: ގާޑިއޯލާ

އިނގިރޭސި ޕްރެމިއާ ލީގުގައި އަދިވެސް އޮތް އެންމެ މޮޅު ޓީމަކީ މެންޗެސްޓާ ސިޓީ ކަމަށް ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ ޕްރެމިއާ ލީގުގައި ރޭ އާސެނަލްއާ އެއްވަރުވެ، ޓޭބަލުގެ ތިން ވަނަ އަށް ސިޓީ ވެއްޓުމުންނެވެ. އެންމެ ފަހުގެ ތިން އަހަރުގެ ޗެމްޕިއަން ސިޓީއާއެކު ލީގު ތައްޓަށް ވާދަކުރަނީ އާސެނަލް އާއި ލިވަޕޫލެވެ. އެއްވަނާގައި ލިވަޕޫލަށް 67 ޕޮއިންޓް ލިބިފައިވާއިރު އާސެނަލް އަށް 65 އަދި ސިޓީ އަށް ލިބިފައިވަނީ 64 ޕޮއިންޓެވެ.

އޭނާ ބުނީ ހުސްވި ސީޒަނުގައި އާސެނަލް ބަލިކޮށް ސިޓީން ބޮޑު ލީޑެއް ނެގި ނަމަވެސް ލިވަޕޫލާއި އާސެނަލް އަކީ މޮޅު ދެ ޓީމު ކަމަށާއި އަބަދު އެއްގޮތެއް ނުވާނެ ކަމަށެވެ.

އޭނާ ބުނީ ވިދިވިދިގެން ހަތަރު ސީޒަނަކު އިނގިރޭސި ލީގު ނެގުމަކީ އެއްވެސް ޓީމަކަށް ނުކުރެވުނު ކަމެއް ކަމަށާއި ސިޓީ އެކަން ވޭތޯ މަސައްކަތް ކުރާނެ ކަމަށެވެ.

އޭނާ ބުނީ ކުރިއަށް އޮތް އެސްޓަންވިލާ މެޗަށް ވަރަށް ރަނގަޅަށް ތައްޔާރުވާންޖެހޭ ކަމަށެވެ.