ގުޅީފަޅު ހިއްކުމާއި މިސަރުކާރާ އެއްވެސް ގުޅުމެއްނެތްކަމަށާއި އެ މަޝްރޫޢު ކުރިޔަށްއެދަނީ އެމަނިކުފާނު ސަރުކާރުގައި އެކުލަވާލާފައިވާ ގޮތަށްކަމަށް ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މަޖިލިސް އިންތިޚާބަށް ކެމްޕެއިން ކުރުމަށް ރާޅުގަނޑު ސަރަހައްދުގައި ބޭއްވި "ހެންވާރު ތަރާވީސް" ގައި ވާހަކަދައްކަވަމުން ރައީސް ޞާލިހު ވިދާޅުވީ މާލެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް އެމަނިކުފާނުގެ ސަރުކާރުގައި ޕްލޭނެއް އެކުލަވާލާ އެ ޕްލޭން ތަންފީޒުކުރުމުގެ މަސައްކަތް ކުރެއްވިކަމަށެވެ.
އެގޮތުން ގުޅީފަޅުން 190 ހެކްޓަރުގެ ބިން، ގިރާވަރުފަޅުން 160ށް ބޮޑު ބިމެއް އަދި ހުޅުމާލޭގެ 3 ވަނަ ފިޔަވަހީގައި 60 ހެކްޓަރަށްވުރެ ބޮޑު ބިމެއް ހިއްކަން ޕްލޭންކޮށް އެމަސައްކަތް ފެށިގެންދިޔަކަމަށެވެ.
އޭގެ އަމަލީ މަސައްކަތް ފަށައިގެން ބާރަށް ކުރިޔަށްދާނެ އަޅުގަނޑުމެން ވެރިކަމުން ފޭބިއިރު. އަޅުގަނޑުމެން ވެރިކަމުން ފޭބިއިރުގައި ގުޅީފަޅުން ފުރަތަމަ ފިޔަވަހީގައި 42 ހެކްޓަރު ހިއްކާ ދެވަނަ ފިޔަވަހީގައި 60 ހެކްޓަރު ހިއްކާ ނިންމާފައިވާނެ. މިއަދު އެކަންވެސް އޮޅުވާލުމަށްޓަކައި މަސައްކަތްކުރަމުން އެބަގެންދޭ. އަޅުގަނޑަށް މިއަދު ރައްޓެއްސަކު ގުޅާފައި ބުނި އޭ ތެދެއްހެއްޔެވެ.މިހާރު ގުޅީފަޅޫގައި ހިއްކަމުން އެދަނީ މުއިއްޒު އަލަށް ހިއްކަން ބުނި ބިންހެއްޔޭ. އަޅުގަނޑު ބުނިން އެހެން ބުނި ހެއްޔޭ؟ އެވާހަކަ އެހެން ދައްކަނީ ހެއްޔޭ. އަޅުގަނޑުގެ ރައްޓެހި މީހާ ބުނި އާނއެކޭ. މިހާރު އެންމެ ބޮޑަށް ދައްކާ އެއް ވާހަކައަކީ އެ ވާހަކައޭ. ގުޅީފަޅު މުއިއްޒު ހިއްކައިދޭ ވާހަކައޭ މާލޭގެ ރައްޔިތުންނަށް. ބުހުތާން ދޮގު އެއީ. ދޮގު މައްޗަށް ދޮގު އެ ހައްދަވަނީ.ކުރީގެ ރައީސް އިބްރާހީމް މުހައްމަދު ޞާލިހު
ރައީސް ޞާލިހު ވިދާޅުވީ ގުޅީފަޅު ހިއްކުމުގެ މަސައްކަތް ކުރަމުން އެދަނީ އެމަނިކުފާނުގެ ސަރުކާރުގައި ނަގާފައިވާ ލޯނާ އެއްގޮތަށް އެޕްލޭނާ އެއްގޮތަށް އެޝިޑިޔުލަށްކަމަށެވެ.
ޖޫން މަސް އަންނަ އިރު އެތަން އޮންނާނީ މުޅިން ހިއްކާ ނިމިފައި. އެޔަކާ މިސަރުކާރަކާ އެއްވެސް ގުޅުމެއް ނެތް. ތެދެެއް މުއިއްޒު ވިދާޅުވެފައި އެބައޮތް އެތަނުން އަދި އިތުރަށް ހިއްކާނެ ވާހަކަ. ވަރަށް ރަނގަޅު ކަމެއް. އެކަން ކުރިޔަށް ގެންދަވަންވީ. ފައިސާ ހޯދައިގެން މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށްޓަކައި އިތުރަށް ގުޅީފަލު ހިއްކަންވީ. ނަމަވެސް ދޮގު ހަދާ އޮޅުވާލައިގެން މިހާރު އެކުރާ މަސައްކަތަކީ ތިމަން ވެރިކަމަށް އައިސް ކުރި މަސައްކަތެކޭ ބުނީމަ އެޔެއް ގަބޫލެއް ނުކުރާނެ. އެހަދަނީ ދޮގު، އެއީ އޮޅުވާލުމެއް. ގިރާވަރު ވެސް ކުރިޔަށްގެންދަންވީ އުތުރު ތިލަފަޅު ވެސް ކުރިޔަށްގެންދަންވީ.ކުރީގެ ރައީސް އިބްރާހީމް މުހައްމަދު ޞާލިހު
ރައީސް ޞާލިހު އިތުރަށް ވިދާޅުވީ މާލެ ސިޓީގެ މޭޔަރަކަށް ރައީސް މުއިއްޒު ހުންނެވިއިރު ހުޅުމާލެ ފޭސް 3 ހިއްކުމަށް ދެކޮޅު ހައްދަވަމުން ގެންދެވިކަމަށެވެ. ނަމަވެސް އެމްޑީޕީ ސަރުކާރުގައި އެމަސައްކަތްކުރެވިފައި އޮތުމުން މިއަދު އެތަނުން މާލޭ ރައްޔިތުންނަށް ބިމާއި ގޯތި ލިބުމަށް މަގުފަހިވެފައިވާކަމަށް ވިދާޅުވިއެވެ.
ކުރީ ސަރުކާރުގައި ވަނީ މާލޭގެ ރައްޔިތުންނަށާއި މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ހޯދައިދިނުމަށް ގެދޮރުވެރިޔާ އަދި ބިންވެރިޔާ ނަމުގައި ބޯހިޔާވަހިކަމުގެ މަޝްރޫޢުތަކެއް ފަށާފައެވެ.
