ޓޮޓެންހަމަށް ސީޒަނުގެ ކުރީކޮޅު ދެއްކި ފޯމު ހިފެހެއްޓޭ
އެސްޓަން ވިލާއާ ދެކޮޅަށް ކުޅުނު މެޗުގައި ލަނޑު ޖެހުމަށްފަހު ޓޮޓެންހަމްގެ ކުޅުންތެރިން އުފާ ފާޅުކުރަނީ
މި ސީޒަނުގެ ގަދަ ހަތަރަކަށް އަރަން ބޭނުންވަނީ ޓީމު ކުރިއަރައިގެން އެކަނި ކަމަށް ޓޮޓެންހަމުގެ ކޯޗު އެންޖޭ ޕޮސްޓެޗެގްލޫ ބުނެފި އެވެ.
އޭނާ މިހެން ބުނީ އިނގިރޭސި ޕްރެމިއާ ލީގުގައި ފުލަމް އަތުން 3-0އިން ބަލިވި މެޗަށް ފަހު ޓޭބަލުގެ ހަތަރުވަނަ މަގާމު ގެއްލި ފަސް ވަނަ މަގާމަށް ވެއްޓުމުންނެވެ. ކުޅުނު 28 މެޗުން މިހާރު ޓޮޓެންހަމަށް ލިބިފައިވަނީ 53 ޕޮއިންޓެވެ. ހަތަރުވަނާގައިވާ އެސްޓަންވިލާ އަށް ލިބިފައިވަނީ 55 ޕޮއިންޓެވެ. ކޮންމެ ޓީމަކަށް ވެސް ބާކީ އޮތީ 10 މެޗެވެ.
އޭނާ އަދި ބުނީ މި ސީޒަނުގައި އޭނާ ޓީމާ ހަވާލުވުމަށްފަހު ގެނައި ކުޅުންތެރިން ރަނގަޅު ކުޅުމެއް ދެއްކި ނަމަވެސް އެންމެ މުހިންމު ކަންތައް އަދި ނުކުރެވޭ ކަމަށެވެ.
ޓޮޓެންހަމުން މި ސީޒަން ފެށީ ވަރަށް ރަނގަޅަށް މެޗުތަކުން މޮޅުވަމުންނެވެ. ނަމަވެސް ސީޒަން މެދަކަށް އެޅުނުއިރު ނަތީޖާތައް ދަށް، ޓީމު ވަނީ ފަހަތަށް ސޮއްސަން ފަށައިފަ އެވެ.
