ރަސްމާލެއަކީ 70 ބިލިއަނަށްވުރެ ގިނަ ރުފިޔާގެ ބޮޑު ކޮރަޕްޝަނެއް، އޭސީސީން އެކަން ބެލެންޖެހޭ - އެމްޑީޕީ
ބިންތަކުގެ އަގު 70 ބިލިއަން ރުފިޔާއާއި 100 ބިލިއަން ރުފިޔާއާއި ދޭތެރޭގެ އަދަދަކަށް އަރައިގެންދޭ
ފުށިދިއްގަރު ފަޅު ހިއްކުމުގެ މަސައްކަތް ފެށުމުގެ ރަސްމިއްޔާތުގެ ތެރެއިން
މި ސަރުކާރުން ފެށި އެންމެ ބޮޑު އެއް ޕްރޮޖެކްޓް އަދި މަސައްކަތް ހުއްޓިފައިވާ ރަސްމާލެ މަޝްރޫއަކީ 70 ބިލިއަނަށްވުރެ ގިނަ ރުފިޔާގެ ބޮޑު ކޮރަޕްޝަނެއް ކަމަށާއި، އޭސީސީން އަމިއްލަ އިސްނެގުމަށް އެކަން ބެލެންޖެހޭނެ ކަމަށް އެމްޑީޕީން ބުނެފިއެވެ.
މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ބޭއްވި ނޫސްވެރިންގެ ބައްދަލުވުމުގައި ވިދާޅުވީ ރަސްމާލެ ޕްރޮޖެކްޓަކީ ސިއްސައިގެންދާވަރު ކޮރަޕްޝަން ހިމެނޭ މަޝްރޫއެއް ކަމަށެވެ. އަދި އެ މަޝްރޫއާމެދު މުޅި ރާއްޖެ ކަންބޮޑުވާއިރުގައި، އެންޓި ކޮރަޕްޝަން ކޮމިޝަން ފަދަ ދައުލަތުގެ މިނިވަން މުއައްސަސާތަކުން އެކަންކަން ނުބައްލަވާތީ ކަންބޮޑުވާ ކަމަށާއި، ވަކި ފަރުދެއްގެ ފަރާތުން ޝަކުވާ ހުށަނޭޅުނުކަމުގައިވީނަމަވެސް، އަމިއްލައަށް އިސްނަގައިގެން އެކަންކަން ބަލަންޖެހޭނެކަން ގާނޫނުން ލާޒިމްކޮށްފައިވާ ކަމަށް އީސަ ވިދާޅުވިއެވެ.
އީސަ ވިދާޅުވީ 90 ވަރަކަށް ހެކްޓަރުގެ ބިން ރަސްމާލެ ހިއްކުމުގެ މުގާބިލުގައި، ރަސްމާލެ ހިއްކަން ހަވާލުކުރި ކުންފުންޏަށް ގްރޭޓަރ މާލެ ސަރަހައްދުން ވިއްކަން ޕްރޮޖެކްޓުގެ ތެރެއިން ލިބޭ ކަމަށެވެ. އަދި ސަރުކާރުން ގްރޭޓަރ މާލެ ސަރަހައްދުން ބިން ހިއްކާފައި ހުރި އެންމެ ކުޑަ ރޭޓަކީ 6500 ރުފިޔާއަށް އަކަފޫޓެއް ކަމަށާއި، ހުޅުމާލޭ ބީޗް ސަރަހައްދުން ވިއްކި ބިމުގެ އަގަކީވެސް އަކަފޫޓަކަށް 10200 ރުފިޔާ ކަމަށެވެ.
އީސަ ވިދާޅުވީ ރަސްމާލެ ހިއްކުމުގައި ކޮރަޕްޝަންގެ އަމަލެއް ހިމެނޭކަމަށް ގަބޫލުކުރެވޭ މިންވަރަަށް ކަންކަން ހުރި އިރު، މި މައްސަލައަކީ އޭސީސީން އަމިއްލަ އިސްނެގުމުގެ މަތިން ސީރިއަސްކޮށް ބަލަންޖެހޭ މައްސަލައެއް ކަމަށެވެ.
އީސަ ވިދާޅުވީ ވެރިކަމަށް ވަޑައިގެންނެވީ ކުރީ ސަރުކާރުން ބިން ވިއްކާ ކޮންމެ ފަހަރަކު ގައުމު ވިއްކާލަނީއޭ، ގައުމިއްޔަތު ވިއްކާލަނީއޭ އަދި ދީން ވިއްކާލަނީއޭ ކިޔާ، ރައްޔިތުން ބިރުގަންނަ ޒާތުގެ ހުރިހާ ވާހަކައެއް ދައްކާ އެކަންކަން ނުކުރާނެކަމަށް ވިދާޅުވެ ވައުދުވެ ރައްޔިތުންނަށް ވައުދުވެވަޑައިގެން އައި ބޭބޭފުޅުން، ތިލަފުށިން ވެސް ބޭރު މީހުންނަށް ބިން ގަނެވޭނެ އުސޫލެއް ހަދައިގެން ބިން ވިއްކުމުގެ މަސައްކަތް ކުރަމުން އަންނަ ކަމަށެވެ.
އީސަ ވިދާޅުވީ ވެރިކަމަށް ވަޑައިގަތުމަށް ރައްޔިތުން ކައިރިއަށް ގޮސް ދެއްކި ވާހަކައާއި، ވެވަޑައިގެންނެވި ވައުދުތަކާއެކު، ވެރިކަމަށް ވަޑައިގެން އަމަލާއި ބަހާއި ދިމާނުވާ ކަމަށެވެ. އީސަ ވިދާޅުވީ މި ސަރުކާރުގެ ގޮހޮރުގައި އޮތީ އޮޅުވާލުމާއި، ދޮގާއި، މަކަރާއި ވަައްކަން ކަމަށާއި، އިތުރު އެއްވެސްކަމެއް ނެތް ކަމަށެވެ. ސަރުކާރުން ކުރާ ކޮންމެ ކަމެއްގައި އޮތީ ދޮގު ހެދުމާއި، މަކަރާއި ކޮރަޕްޝަން ކަމަށް އީސަ ވިދާޅުވިއެވެ.
