ޓޭކްއަވޭ އައުޓްލެޓަކަށް ގެއްލުން ދޭން އުޅުނު ކަމަށް ބުނެ ގުރޫޕް މަރާމާރީއެއް
ފުލުހުން އެ ސަރަހައްދަށް ދިޔައިރު ގެއްލުން ދޭން އުޅުނު މީހާއާ ބަޔަކު މާރާމާރީ ހިންގުމަށް ފަހު ފިލާފައިވާ ކަމަށް ފުލުހުން ބުނޭ
މާރާމާރީ
މާލޭގައި ހުރި ކާބޯތަކެތި ތައްޔާރުކޮށްދޭ ޓޭކްއަވޭ އައުޓްލެޓަކަށް މީހަކު ގެއްލުން ދޭން އުޅުނު ކަމަށް ބުނެ ބަޔަކު މާރާމާރީއެއް ހިންގައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައިވާ ގޮތުގައި ރޯޝަނީ މަގުގައި ހުރި އެ އައުޓްލެޓަށް މީހަކު ގެއްލުން ދޭން އުޅޭ ކަމުގެ މައުލޫމާތު ވަނީ ހޮނިހިރު ދުވަހުގެ ރޭ 19:00ހާއިރު ލިބިފައެވެ.
އެ ރިޕޯޓާ ގުޅިގެން ފުލުހުން އެ ސަރަހައްދަށް ދިޔައިރު ގެއްލުން ދޭން އުޅުނު މީހާއާ ބަޔަކު މާރާމާރީ ހިންގުމަށް ފަހު ފިލާފައިވާ ކަމަށް ފުލުހުން ބުންޏެވެ.
އެ މާރާމާރީއާ ގުޅިގެން ދެ މީހަކު ހައްޔަރުކޮށްފައިވާ ކަމަށާއި އޭގެ ތެރޭގައި ހިމެނެނީ ޓޭކްއަވޭ ތަނަށް ގެއްލުން ދޭން އުޅުނު ކަމަށް ތުހުމަތު ކުރެވޭ މީހާއާއި މާރާމާރީ ހިންގުމަށް ފަހު ފިލި އެކަކު ކަމަށް ވެސް ފުލުހުން ބުންޏެވެ.
އެ ހާދިސާގެ ވީޑިއޯއެއް ސޯޝަލް މީޑިއާގައި އަންނަނީ ދައުރުވަމުންނެވެ. ވީޑިއޯއިން ފެންނަ ގޮތުގައި މީހަކު މަގު މައްޗަށް ވައްޓައިލައި، ބަޔަކު ގުރޫޕު ހަދައިގެން އޭނާއަށް ހަމަލާ ދޭ މަންޒަރު ފެނެއެވެ.
