މަޖިލިސް މެޖޯރިޓީ ހޯދުމަށް ސަރުކާރުން ވަޒީފާގެ ބިރު!!

ރައްޓެއްސަކާއެކު މެދުރާއްޖެތެރޭގެ ރަށަކަށް ޒިޔާރަތްކުރީމެވެ. ރަށަށް ފޭބުނީ މަޖިލިސް އިންތިޚާބުގެ ކެމްޕެއިން އިވެންޓެއްގެ ތެރެއަށެވެ. އެރަށަށް އެދުވަހު ސަރުކާރު ކެންޑިޑޭޓް އަންނާތީ އޭނާއަށް މަރުހަބާ ކިޔަން ނުކުމެ ތިބި މީހުންގެ ތެރެއަށެވެ. ކުއްލިއަކަށް ލޮލުގައި އަޅައިގަތީ އެތަނަށް ނުކުމެހުރި އެރަށު އެހެން ރައްޓެއްސެކެވެ. ހައިރާންވެ އަންތަރީސްވިއެވެ. އަނެއްކާ ކިހިނެއްވީބައޭ ހިތަށް އެރިއެވެ. މީހާގެ ހަށިގަނޑަށް އައިސްހުރި ބަދަލަކުން ނޫނެވެ. ގަޔަށް މަހާލާފައި ހުރި ޓީޝާޓުންނާއި ބޮލުގައި އަޅާލާފައި އޮތް ތާކިހާ އަދި އަތުގައި އޮތް ދިދައިންނެވެ. އޭނާވެސް ހުރީ އެސަފުގައެވެ.

ހާލުއަހުވާލު އަހާލަން ގާތަށް ލެފިލާނަމޭ ހިތާ ހިނގައިގަތީމެވެ. އެއަށްވުރެ ކުރިން އޭނާ ކޮށްލީ އިޝާރާތެކެވެ. ބުނާ ކަހަލައެވެ. މިވަގުތު މިތާކުން ނޫނެވެ. ފަހުން ދިމާވެލާނަމެވެ.

ހާސްކަންވީ އިތުރެވެ. އެއްތަށިމަތިންކައި އެކުގައި ސަކަރާތްޖަހާ މަޖާކޮށް އުޅުނު އެހާ ގާތްމީހަކު ސަލާމްކޮށްލަންވެސް ދެކޮޅު ހެދީމެވެ.

އެދުވަހުގެ އިރުއޮއްސުނުފަހުން އެއްކަލަ ރައްޓެހި މީހާގުޅިއެވެ. ދިމާވެލުމަށެވެ. އެކަމަކު އާންމުކޮން އަހަރެމެން ގޮސް އުޅުނު ކެފޭއަކުން ނޫނެވެ. ކަންކުރަންވީ ގޮތާއި ދާނެ ތަނާއި ގަޑިއެއްވެސް ބުނެ ފޯނު ބޭއްވިއެވެ. އަނެއްކާވެސް ހާސްވިއެވެ. އެހާ ސިއްރުން ބައްދަލުކުރަން އުޅޭތީއެވެ.

ދެމީހުން ބައްދަލުވުމާއެކުވެސް އޭނާ ބުނެލީ މިހެންނެވެ. "ބްރޯ. ވަރަށް ސޮރީ. މިއަދު ހަމަ މިނޫންގޮތެއް ނެތީ" އެވެ.

އެޖުމްލައިން މުޅި މަންޒަރު ސާފުވެއްޖެއެވެ. ވެގެން އުޅެނީ ކީއްކަންވެސް އެނގިއްޖެއެވެ. އެކަމަކުވެސް އޭނާގާތު ތަފްސީލަށް އަހާލީމެވެ.

އެއީ ރަށު ފެނަކައިގެ މުވައްޒަފެކެވެ. ދާއިމީ ވަޒީފާއެއްގައި ހުރި މީހެކެވެ. ރަށުގެ ސިއްހީ މަރުކަޒުގައި އޭނާގެ ކޮއްކޮއެއްވެސް އުޅެއެވެ. ހަމަ ދާއިމީ ވަޒީފާއެއްގައެވެ.

އޭނާ ބުނީ ސަރުކާރަށް ތާއީދު ނުކޮށްފިނަމަ، ނޫނީ ސަރުކާރު ކެންޑިޑޭޓުގެ ކެމްޕެއިންގައި ނޫޅެފިނަމަ އެވަޒީފާއިން ވަކިކުރާނެ ކަމުގެ އިންޒާރު ދީފައިވާ ކަމަށެވެ. އަދި ސޯޝަލް މީޑިއާގައިވެސް ސަރުކާރު ކެންޑިޑޭޓާ ދެކޮޅު ބަހެއް ބުނެލިއަސް އެއީ ވަޒީފާގެ ފަހު ދުވަސް ކަމަށެވެ.

މާގިނައިރުތަކެއްގައި ނުތިބެ ދެމީހުން ވަކިވީމެވެ. އެކަމަކު އެވަގުތުވެސް އޭނާ އިތުރު އެއްޗެއް ބުނެލިއެވެ. "ބްރޯ. ޕްލީސް. އަހަރެން މީޓް ކުރިކަން ނާންގައްޗޭ. ވަރަށް ގޯސްވާނެ. އެނގެއެއެއްނު ވަޒީފާ ގެއްލުނީމާ މަށަށް ވާނެގޮތް. އެކަމަކު މަށެއްވެސް ވޯޓެއް ނުދޭނަން" ކަމަށެވެ.

އެހާހިސާބުން ރަށުގެ އެކަންކަން ހުރިނެތްގޮތް ބަލައިލާ ހިތްވިއެވެ. އެކަމަށްޓަކައި އިތުރު ބަޔަކާ ވާހަކަ ދައްކާލީމެވެ.

އެމީހުންގެ ވާހަކަތަކުން އެނގުނުގޮތުގައި އެރަށުގެ މައިގަނޑު ވަޒީފާތަކަކީ ފެނަކަ ވަޒީފާތަކެވެ. ވަޒީފާގައި ތިބި މީހުންނަށް ފާޅުގައި އަންގާފައިވަނީ އެނޫންގޮތެއް ނޯންނާނެ ކަމަށެވެ. ދެންތިބީ އަލަށް ވަޒީފާ ދިން މީހުންނެވެ. އެމީހުންނަށް ވަޒީފާ ދިނީވެސް މުޅި އާއިލާގެ އެއްވެސް މީހަކު އެހެންގޮތަކަށް ހުއްޓަސް ވަޒީފާ ގެއްލޭނެ ކަމުގެ އިންޒާރާއެކުއެވެ. އެކަން ކުރާން ފަސޭހައަކަށް އެވެރިންނަށް ދީފައިވަނީވެސް ވަގުތީ ވަޒީފާއެކެވެ. އިންތިޚާބު ނިމުމުން ދާއިމީ ކުރާ ގޮތަށެވެ. އިތުރު ބަޔަކުވެސް އެކެޓަގަރީގައި ހިމެނެއެވެ. ވަޒީފާ ދޭންތިބި މީހުންނެވެ. އަންގާފައިވަނީ ސަރުކާރު ކެންޑިޑޭޓް ނަގަން މަސައްކަތް ކުރުމަށެވެ. ވަޒީފާ ލިބުން އޮތީ މަސައްކަތުގެ ރޭޓުގެ މައްޗަށް ކަމަށެވެ. އިންތިޚާބުގެ ކުރިންވެސް ވަޒީފާ ދޭނެކަމަށް ބުނެފައި ތިބި ބަޔަކާއި އިންތިޚާބުގެ ފަހުން ވަޒީފާ ދޭނެ ކަމުގެ އުއްމީދު ދީފައިވާ ބަޔަކުވެސް އޭގައި ހިމެނެއެވެ. ހުށަހަޅަންޖެހޭ ތައުލީމީ ސެޓްފިކެޓާއި ވަޒީފާގެ އިންޓަވިއުއަކީ ކެމްޕެއިންގައި ދައްކާ ޕާފޯމަންސެވެ.

ލިބުނު މައުލޫމާތުގެ އަލީގައި ރަށުގެ ހަރުމީހެއްގެ ގާތުވެސް އަހާލީމެވެ. އޭނާގެ ޖަވާބު ކުރުވެފައި ވަރަށް ސާދާއެވެ.

"ކޮއްކޯ މިއޮތީ އިހު އޮތްތަން ލައިގެންފަ. ލާހިކެއްނޫން ދެކޮޅަށް އިނގިލިވެސް ހިއްލާލާކަށް" އޭނާ ބުންޏެވެ.

ކޮންމެއަކަސް އެއީ މިއަދު މުޅި ރާއްޖޭގެ ހާލަތެވެ. ކޮންމެ ރަށަކުންވެސް ފެންނަން އޮތް ބޮޑު ހަގީގަތެކެވެ. ކިތައްމެ ވަރަކަށް ސަރުކާރުން ނޫންކަމަށް ދައްކަން އުޅުނަސް މިހަގީގަތް ރަށުގެ ރައްޔިތުންނަކަށް ނޯޅެއެވެ. އެރަށެއްގެ ހަގީގަތް އެރަށެއްގެ ކުދިބޮޑު އެންމެނަށް އެނގެއެވެ. ގިނިދުށްމީހާ ރަތްމަލަށް ބިރުގަންނަ ބީދައިން "ފިތިފައި" ތިބީއެވެ.