އެމެރިކާ ކޯޗުގެ ދެމަފިރިންގެ ހިތް ދެވުނީ ހުރަޔަށް، ރާއްޖޭގެ އެހެން ޓީމަކަށް ނުދާނެ

2000 ވަނަ އަހަރުގެ ކުރީކޮޅު މާލެ އަތޮޅު ހުރާ ރައްޔިތުން އަވަދިނެތި އުޅުނީ ކައިރީގައި އޮތް ބަނޑޮސް އައިލެންޑް ރިސޯޓްގެ ވެރިޔާ މުހައްމަދު ވަހީދުއްދީން (ޑީން) ތައްޔާރުކުރި ޒަމާނީ ފެންވަރުގެ ކޮޓަރި ހެދުމުގައި އަވަދިނެތި އެވެ. އެއީ ހުރާގެ ކުދިބޮޑު އެންމެންގެ ހިތްތަކާއި ގުޅިފައިވާ އެރަށު ފުޓްބޯޅަ ޓީމަށް ގެންނަ ކޯޗު ބަހައްޓާނެ ކޮޓަރި އެވެ. ތިން އަހަރަށް ފަހު ކުޑަމޫސަ، ވަކިވުމުން ވަހީދުއްދީންގެ ހުރައަށް ގެނެސްދެއްވީ އެމެރިކާގެ ކޯޗެވެ. އެއީ މިހާތަނަށް ރާއްޖެ ގެނައި ހަމައެކަނި އެމެރިކާ ކޯޗުވެސްމެ އެވެ. ހުރައަށް ކޯޗުކޮށްދިނުމަށްފަހު، ރާއްޖެއިން ދިޔަތާ 22 އަހަރު ފަހުން ފުރަތަމަ ފަހަރަށް ދިވެހި ނޫސްވެރިއަކާ ވާހަކަ ދައްކަމުން ސްކޮޓް ވިލިއަމް ލެޑްކޭ ބުނީ އޭނާގެ ހަޔާތާއި ހުރާ ގުޅިފައިވަނީ ވަކިނުވެވޭ ފަދަ ގުޅުމަކުން ކަމަށެވެ.

ސްކޮޓް ބުނީ އޭނާ ހުރައަށް ގެންދިއުމަށް ލަފާދިނީ އެމެރިކާގައި ދިރިއުޅޭ ޑީންގެ ދަރިން ކަމަށެވެ. ހުރާ ޓީމާ ހަވާލުވުމަށް ރާއްޖެ އައިސް އޭނާ ފުރަތަމަ ބަހައްޓާފައި ހުރީ ވެސް ޑީންގެ ބަނޑޮހުގަ އެވެ.

ދުނިޔޭގެ އެންމެ ކުރިއަރާފައި ގައުމުގައި އުޅެފައި، ރާއްޖޭގެ މީސްކޮޅުމަދު ވަސީލަތްތައް ފުރިހަމަނޫން ރަށުގައި އުޅެން އޭނާ އަށް ދަތިތަކެއް ހުންނާނެ އެވެ. އެކަމަކު ހުރާ ރައްޔިތުންދިން ލޯތްބާއި އެހީތެރިކަމާއި ބޭއްވި ގާތްކަމުން ސްކޮޓަށް ހިތް ބަދަލުކޮށްލި އެވެ.

ސްކޮޓާއި އަންހެނުން ޝޭން ކައިވެންޏަށް މިހާތަނަށް ލިބިފައިވަނީ އެންމެ އަންހެން ކުއްޖެކެވެ. އަންހެނުން، ދަރިފުޅަށް ބަލިވެއިނީ ހުރާގަ އެވެ. އަންނަ ހޯމަ ދުވަހު 21 އަހަރު ފުރޭ އޭނާ މި ދަރިފުޅަށް، ކޯޗު ސްކޮޓް ދީފައިވާ ނަމަކީ ސުހާނާ އެވެ. އެއީ ހުރާގެ މަޝްހޫރު ވޮލީ ކުޅުންތެރިޔާ ސުހާނާ އަހުމަދުގެ ނަމެވެ. ހުރައިން ދިއުމަށްފަހު އެނބުރި އޭނާ ހުރައަށް ޒިޔާރަތްކުރިއިރު ދަރިފުޅުގެ އުމުރުންވީ އެންމެ ފަސް އަހަރެވެ. އެފަހަރު އުފަންދުވަހުގެ ޕާޓީ އޮތީ ވެސް ހުރާގަ އެވެ.

ސްކޮޓް ހުރައާ ހަވާލުވިއިރު އެރަށު ޓީމަކީ ރާއްޖޭގެ އެންމެ ވަރުގަދަ އެއް ޓީމެވެ. ކުރިމަތީގައި އޮތީ ޕޮމިސްކަޕް ދިފާއު ކުރުމާއި އޭޝިއަން ކަޕް ވިނާސް ކަޕެވެ. ބައިނަލް އަގްވާމީ މުބާރާތެއްގައި ވާދަކުރުމަކީ އެ ޓީމަށް މުޅިން އާ ތަޖުރިބާއެކެވެ.

އުމުރުން މިހާރު 54 އަހަރުގެ ކޯޗު ބުނީ ރާއްޖޭގެ ފުޓްބޯޅައިގެ ވަސީލަތްތައް ފުރިހަމަނޫންއިރު، ހުރާގައި އަމުދުން ވަސީލްތައް ނެތް ކަމަށެވެ. މިހެންވެ ބޮޑަށް އިސްކަންދިނީ ފިޒިކަލް ފިޓްނަސް ރަނގަޅު ކުރުމަށެވެ. އަދި އޭނާ ބުނާ ކޮންމެ ވަގުތަކު ކުޅުންތެރިން ޕްރެކްޓިސް ކުރަން ތައްޔާރަށް ތިބޭއިރު ޓީމުގެ ކަންކަން ހަމަޖައްސަން ޝަކުވާނުކޮށް މެނޭޖްމަންޓާއި ސަޕޯޓަރުން ތިބޭ ކަމަށެވެ.

ސްކޮޓް ބުނީ އޭނާއަށް ވުރެ ބޮޑަށް ދިވެހި ބަހަށް ފަރިތައީ އަންހެނުން ޝޭން ކަމަށެވެ. މިހެންވެ އޭނާ ބޭނުންވާ ކަންކަން ދިވެހިން މެނޭޖްމަންޓާއި ދިވެހިން ކިޔައިދޭންވެއްޖެނަމަ ގިނަ ފަހަރު އެކަންކޮށްދެނީ ވެސް އަންހެނުން ކަމަށެވެ. މެނޭޖްމަންޓާއި ކުޅުންތެރިންގެ ވެސް އެދުމުގެ މަތީން އޭނާ އެންމެ ބޮޑަށް ތައްޔާރުވީ ޕޮމިސްކަޕް ދިފާއުކުރުމަށެވެ.

އޭނާ ބުނީ ހުރާ މީހުން އެންމެ ފޯރި ނަގަނީ ނިއުރޭޑިއަންޓާ ކުޅޭ މެޗުތަކުގަ އެވެ. އަދި އޭނާ ހުއްޓައި އެ ދެ ޓީމު ކުޅުނު ގިނަ މެޗުތައް ހުރަށް ކާމިޔާބުވުމުން އުފާކުރާ ކަމަށެވެ. އެކަމަކު ހުރާގެ އެންމެ މޮޅު ކުޅުންތެރިއަކީ ކާކުތޯ އެހުމުން ކޯޗު ބުނީ އެއީ އިންސާފުވެރި ސުވާލެއްނޫން ކަމަށެވެ. އެންމެނަކީ ވެސް މޮޅު ކުޅުންތެރިން ކަމަށެވެ.

އެކަމަކު ކީޕަރު އިސްހާގާއި ކޯޗާ އޮތީ ވަރަށް ބަދަހި ގުޅުމެކެވެ. ސަބަބަކަށްވީ ކޯޗު ބަހައްޓާފައި ހުރި ގެ އާއި އިސްހާގު ދިރިއުޅޭ ގެއާ ކައިރި ވުމުވެ. އެ ގުޅުމުގެ ތެރެއިން ޗުއްޓީގައި ހުރަށް ގޮސް ކޯޗު ހުންނަނީ ވެސް އިސްހާގުގެ ގޭގަ އެވެ. ކޯޗު ބުނީ "އިސްހާގުގެ މަންމަ އާއި ބައްޕަވީ އަހަރުމެންގެ ވެސް މައިންބަފައިންނަށް،" ކަމަށެވެ. އަދި "އެމީހުން އަހަރުމެންނަށް ވަރަށް ކަމޭހިތާ. އަހަރުމެން ދެކެ ލޯބިވޭ. އަހަރުމެން ވެސް އެމީހުން ދެކެ ލޯބިވޭ،" ކަމަށެވެ.

ހުރާ ދޫކޮށް ސްކޮޓަށް ދާން ޖެހުނީ 2011 ވަނަ އަހަރު އެމެރިކާގެ ވޯލްޑް ޓްރޭޑް ސެންޓަރު ގޮއްވާލުމުންނެވެ. އިންޑިޔާގައި ޗުއްޓީ ހޭދަކޮށްފައި އައިތަނާ އެވެ. އޭނާ ބުނީ ހުރައިން ދާން ޖެހުމުން އެންމެ އޭނާއަށް ވުރެ ދެރަވީ އަންހެނުން ޝޭން ކަމަށެވެ.

ހުރައިން ދިއުމަށްފަހު ހަވާއީގެ ޕްސިފިކް ޔުނިވަރސިޓީ އަށް ހަތް އަހަރު ކޯޗުކޮށްދިނެވެ. އެތަނުގެ މުސާރަ ކުޑަވުމުން މިހާރު މަސައްކަތް ކުރަނީ އެހެން ޓީމުތަކުގަ އެވެ.  

ސްކޮޓް ބުނީ އޭނާ އަކީ ދިރިއުޅުމުގެ އެއްވެސް ކަމެއްގައި ނުވާނެއޭ ބުނާނެ މީހެއްނޫނެވެ. އެކަމަކު ހުރައަށް ހިތްދެވުނުލެއް ބޮޑުކަމުން އޭނާ މިހާރުވަނީ އެއްކަމެއް ނުކުރާން އަޒުމް ކަނޑައަޅައިފަ އެވެ.

ރާއްޖޭގައި މަސައްކަތް ކުރި އެމެރިކާގެ ފުރަތަމަ ކޯޗަށްވުމުން ސްކޮޓް އުފާކުރެ އެވެ. އިންޓަވިއު ނިންމާލަމުން ވެސް ބުނީ ހުރާ ރައްޔިތުންނާއި އިސްހާގުގެ އާއިލާ އަށް ވަރަށް ބޮޑަށް ޝުކުރިއްޔާ ކަމަށެވެ.