ކިމްގެ ހިތް ގަލޮޅު ދަނޑަށް ދޫވެ، ހަނީމޫން މަންޒިލަކީ ވެސް ރާއްޖެ

1995 ވަނަ އަހަރަކީ ރާއްޖޭގެ ފުޓްބޯޅައިގެ ބޮޑު އަހަރަކަށްވި އެވެ. ވެލެންސިއާ ގައުމީ ތަށި މިލްކުކުރަން ނުކުންނާތީވެ އެބަޔަކަށްވީ ގޮތަށް ޓީމުތައް ވަރުގަދަކުރި އެވެ. ދިވެހި މޮޅު ކުޅުންތެރިނާއެކު އެހެން ޓީމުތަކުން ޖެހިލުންވާވަރުގެ ޓީމަކަށް އެ އަހަރުގެ ފުރަތަމަކޮޅު ލެގޫންސްގެ ވެގެންދިޔައީ ޑެންމާކުން ގެނައި މާމޮޅު ފޯވަޑަކާ ހެދި އެވެ. އެއީ އެއިރު އުމުރުން 22 އަހަރުގެ ކިމް ނޯހޮލްޓް ޔެންސަން އެވެ.

ލެގޫންސަކީ މަޝްހޫރު ޗަމްޕާ އާއިލާއާ ގުޅުން އޮތް ކުލަބެކެވެ. އެއާއިލާގެ މެމްބަރުންގެ ތެރެއިން ލެގޫންސް ހިންގުމުގައި އެންމެ އިސްކޮށް އުޅުނު އެއް ބޭފުޅަކީ ޑެންމާކް މީހަކާ ކައިވެނި ބައްލަވައިގެން އުޅުއްވި ނިޔާޒެވެ. ލެގޫންސް ވަރުގަދަ ކުރުމަށް އޭނާ އަށް ކިމް ލިބުނީ ޑެންމާކުގެ ދެ ވަނަ ޑވިޝަނުގެ ކުލަބަކުން ކުޅުންތެރިން ހޯދަން އުޅުމުގެ ތެރޭގަ އެވެ.

ފުރަތަމަ މެޗުގައި ވެސް ގަލޮޅު ދަނޑުގައި ކިމް ވިދާލި އެވެ. އޭނާގެ ސްޕީޑް ބާރެވެ. ކޮއްޓުން މޮޅެވެ. ބާރަށް ބޯޅައިގައި ޖެހުމާއި ޕާސްތައް ބަރާބަރުވެފައި، ޓީމުލައްވައި ކުޅުވައިދެ އެވެ. ގައުމީ މުބާރާތުގެ ފުރަތަމަ މެޗުގައި ބޯ ވިއްސާރައިގެ ތެރޭގައި ވެލެންސިއާ ކޮޅަށް އޭނާ ހެޓްރިކް ހެދީ އެއިރުގެ އެންމެ މޮޅު ޑިފެންޑަރުން ކައިރީގައި "ބޭނުން އެއްޗެއް،" ހަދައިފަ އެވެ. ކިމްގެ ބުނާ ގޮތުން އޭނާގެ އެންމެ ހާއްސަ އެއް މެޗަކީ ވެސް ވެލެންސިއާކޮޅަށް ހެޓްރިކް ހެދި މެޗެވެ.

ނޯޓް: އޭނާގެ ގޯލްތައް މިލިންކުން ފެންނާނެ އެވެ.https://www.youtube.com/watch?v=LIW2Fzh_vj4

މަޑު ފަސްގަނޑުގައި ޕްރެކްޓިސް ކުރަން ޖެހުމާއި ވަސީލަތްތައް ނެތުމާއި ރާއްޖެ ހޫނުވުމުން ކިމް ބުނީ އޭނާއަށް ދިވެހިންގެ ތެރޭގައި އުޅެން ފުރަތަމަ ވަރަށް ދަތިވި ކަމަށެވެ.

އޭނާ ބުނީ ދިވެހި ޓީމުތަކުގެ ތެރެއިން އެންމެ އުނދަގުލީ ނިއުރޭޑިއަންޓާއި ވިކްޓަރީއާ ދެކޮޅަށް ކުޅެން ކަމަށެވެ. ލެގޫންސްގައި ކިމްގެ އެންމެ ގާތް މީހުންނަށްވީ ކީޕަރު މައުރޫފް އަހުމަދު (މާއްޓޭ) އާއި ދޮންބިލެތް އަހުމަދު ހަލީމާއި އަލީ ސުޒޭނެވެ. މިއީ މުޅިން ވެސް ވިކްޓަރީގެ ތަރިންނެވެ. ކިމް 2005 ވަނަ އަހަރު ވިކްޓަރީ އަށް އައުމުގެ ފަހަތުގައި ވެސް އޮތީ މި ގުޅުމެވެ.

އެއް ކުލަބަކަށް ކުޅެފައިހުރި ބިދޭސީ މޮޅު ވާދަވެރި ކުލަބަކަށް ގެނައުމަކީ ރާއްޖޭގައި ވަރަށް މަދުން ކުރާ ކަމެކެވެ. ނަމަވެސް މާއްޓޭގެ ބަހުންނަނަމަ ވިކްޓަރީ އަށް ކިމް ގެނައުމަށް ތަކުރާރުކޮށް މަސައްކަތް ކުރީ  "އެއީ ރާއްޖެ އައި އެންމެ ތަފާތު އެއް ކުޅުންތެރިޔާ،" ކަމަށްވުމުންނެވެ.

ކިމް އެންމެ ފަހުން ރާއްޖެ އައީ 2018 ވަނަ އަހަރު އެވެ. އޭނާގެ ފަހުން މީހަކާ އިނދެ އޭނާ އަށް ދެކުދިން ވެސް ލިބިއްޖެ އެވެ. މިހެންވެ ކިމް ބުނީ ހަނީމޫނަށް ރާއްޖެ އަންނަން ބޭނުންވެފައި ހުރި ކަމަށެވެ.