ގިރާވަރުފަޅު ހިއްކުން ހުއްޓިފައި، ކޮންޓްރެކްޓަރަށް ދޭންޖެހޭ ފައިސާ ދިނުމުން މަސައްކަތް ފަށަން ކޮންޓްރެކްޓަރ ތައްޔާރު
އެ މުޅި މަޝްރޫއަކީ ޚަރަދު ބޮޑު، އަގުބޮޑު މަޝްރޫއެއްކަން މިނިސްޓަރ ފާހަގަ ކުރެއްވި
ގިރާވަރު ފަޅު ހިއްކުން
ގިރާވަރުފަޅު ހިއްކުމުގެ މަޝްރޫއު މިވަގުތު އޮތީ ހުއްޓިފައި ކަމަށާއި، ކޮންޓްރެކްޓަރަށް ދޭންޖެހޭ ފައިސާ ދިނުމުން މަސައްކަތް ފަށަން ކޮންޓްރެކްޓަރ ތައްޔާރުކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެއެވެ.
ބުދަ ދުވަހު އޮތް ނޫސްވެރިންގެ ބައްދަލުވުމުގައި ވާހަަކަ ދައްކަވަމުން މިިނިސްޓަރ ވިދާޅުވީ، ގިރާވަރުފަޅު ހިއްކުމަކީ އަގުބޮޑު މަޝްރޫއަކަށް ވާނެކަމަށެވެ.
އެ މަޝްރޫއު ޙަވާލު ކުރެވިފައި އޮތީ ބަޖެޓުން އެއްބައި ޚަަރަދު ކުރާ ގޮތަށް ކަމަށާއި، އެއީ 50 ހެކްޓަރު ހިއްކުމުން 50 މިލިއަން ޑޮލަރު ދައުލަތުން ދޭން ޖެހޭގޮތަށް ކަމަށް މިނިސްޓަރ ވިދާޅުވިއެވެ.
އަދި ބާކީ ހުރި މަސައްކަތްތައް ކޮންޓްރެކްޓަރ ފައިނޭންސް އުސޫލުން ލޯނެއްގެ ތެރެއިން ކޮންޓްރެކްޓަރަށް ދޭ ގޮތަށް ކުރިއަށް ގެންދާގޮތަށް މިދިޔަ ސަރުކާރުން އެއްބަސްވެފައިވާކަމަށް އޭނާ ވިދާޅުވިއެވެ.
އެ މުޅި މަޝްރޫއަކީ ޚަރަދު ބޮޑު، އަގުބޮޑު މަޝްރޫއެއްކަން މިނިސްޓަރ ފާހަގަ ކުރެއްވިއެވެ.
މިނިސްޓަރ ވިދާޅުވީ، މިދިޔަ ސަރުކާރުގައި އެ މަސައްކަތުގެ 50 ހެކްޓަރު ހިއްކާފައި އޮތުމުން ދޭންޖެހޭ ފައިސާގެ ތެރެއިން 30 މިލިއަން ޑޮލަަރު އަދިވެސް ނުދީ އެބައޮތްކަމަށެވެ.
އެ ފައިސާ ދިނުމަށް ކޮންޓްރެކްޓަރުން ޑިމާންޑު ކުރަމުންދާ ކަމަށާއި، ކޮންޓްރެކްޓަރަށް ދޭންޖެހޭ ފައިސާ ދެވުމުން އެ މަސައްކަތް ކުރިއަށްދާނެކަމަށް ބެލެވޭކަމަށް މިނިސްޓަރ ވިދާޅުވިއެވެ.
މިއީ ޑޮލަރުން ދައްކަންޖެހޭ ފައިސާކަމަށްވުމާއެކު، އެކަމުގައި ދަތިތައް ހުރިކަން މިނިސްޓަރ ފާހަގަ ކުރެއްވިއެެވެ.
ނިމިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށްގެންދިޔަ ބިންވެރިޔާ ސްކީމުން، ގިރާވަރުފަޅުން ގޯތި ލިބިފައިވާ ފަރާތްތަކާއެކު އެތަނަށް ތައްޔާރުކޮށްފައިވާ ލޭންޑް ޔޫސް ޕްލޭނާ ގުޅޭގޮތުން މަޝްވަރާކުރުމަށް ސަރުކާރުން ވަނީ ނިންމާފައެވެ.
ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ މިނިސްޓްރީން ބުނެފައި ވަނީ ގިރާވަރުފަޅުގެ ލޭންޑް ޔޫސް ޕްލޭނާއި ގުޅޭގޮތުން ބާއްވާ އާންމު ބައްދަލުވުމެއް މި ހިނގާ މާރޗް މަހުގެ 27 ވާ ބުދަ ދުވަހު ބޭއްވުމަށް ނިންމާފައިވާ ކަމަށެެވެ.
