ޕެންޝަން ސްކީމްގެ ފައިދާ އެންމެ ރަނގަޅު ގޮތުގައި ރައްޔިތުންނަށް ހިފޭނެ ގޮތް ހެދުމަށް މަސައްކަތް ކުރާނަން: ރައީސް މުއިއްޒު
ސަރުކާރަށް އެއަށް ބަދަލު ގެނެވޭނީ ގާނޫނު އިސްލާހުކޮށްގެން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ޕެންޝަން ސްކީމްގެ ފައިދާ އެންމެ ރަނގަޅު ގޮތުގައި ރައްޔިތުންނަށް ހިފޭނެ ގޮތް ހެދުމަށް މަސައްކަތް ކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ޕެންޝަން ފަންޑަށް ޖަމާވާ ފައިސާ، ވަޒީފާއިން ވަކިވުމާއެކު ލިބޭނެ އިންތިޒާމެއް ހަމަޖެއްސިދާނެތޯ އާއްމު ރައްޔިތެއް ދެންނެވި ސުވާލަށް ރައީސް މުއިއްޒު ވިދާޅުވީ ޕެންޝަންއަކީ ވަކި ގާނޫނެއްގެ ދަށުން ނަގަމުންދާ އެއްޗެއް ކަމަށާއި، ސަރުކާރަށް އެއަށް ބަދަލު ގެނެވޭނީ ގާނޫނު އިސްލާހުކޮށްގެން ކަމަށެވެ.
ރައީސް މުއިއްޒު ވިދާޅުވީ ޕެންޝަން ސްކީމް ވަރުގަދަ ކުރަން ބޭނުންވާ ކަމަށާއި، އޭގެ ފައިދާ ރަނގަޅު ގޮތުގައި ރައްޔިތުންނަށް ލިބޭނެ ގޮތް ހަދަން ބޭނުންވާ ކަމަށެވެ. އަދި ޕެންޝަން ސްކީމަށް ބަދަލުތައް ގެނެވޭނީ ރައްޔިތުންގެ މަޖިލީހަށް ހުށަހަޅައިގެން ކަމަށް އެމަނިކުފާނު ވިދާޅުވިއެވެ.
ޕެންޝަނަކީ އެމީހަކު އުމުރުން ދުވަސްވުމުން ނުވަތަ ރިޓަޔަރވުމަށް ފަހުގައި ބޭނުންކުރުމަށް އެއްކުރާ ފައިސާއެވެ. މީލާދީ ގޮތުން އުމުރުން 65 އަހަރު ފުރުމުގެ 6 މަސް ކުރިން އަސާސީ ޕެންޝަނަށް އެދެވިދާނެއެވެ. އަދި އާމްދަނީއެއް ނުލިބޭ އުމުރުން ދުވަސްވީ މީހުންނަށް ދައުލަތުންދޭ ފައިސާވެސް މީގެތެރޭގައި ހިމެނެއެވެ.
