މާލެ ސިޓީގެ މަގުތަކުގައި ގަވާއިދާ ހިލާފަށް ޕާކުކޮށްފައި އޮތް 48 ވެހިކަލް ފުލުހުން ބުރާސްފަތި ދުވަހުގެރޭ ޓޯކޮށްފިއެވެ.

ފުލުހުން ބުނީ މާލޭ ސިޓީގެ މަގުތަކުގައި، ޤަވައިދާ ޚިލާފަށް ޕާކްކޮށްފައިވާ އުޅަނދުތައް ނެގުމަށް ކުރާ މަސައްކަތުގެތެރެއިން، އަމީނީމަގުން 15 އުޅަނދެއް ބުރާސްފަތި ދުވަހުގެރޭ ޓޯ ކުރެވިފައިވާ ކަމަށެވެ.

ސަރުކާރުގެ ވައުދާއެއްގޮތަށް ގަވާއިދާ ހިލާފަށް ޕާކްކުރުމުން ސްޓިކަރ ނުޖަހާނެކަމުގެ ވައުދާއެކު، މި ރޯދަމަހު ސަރުކާރުން ދަނި އުޅަނދުތައް ޓޯކުރުމުގެ މަސައްކަތް ކުރަމުންނެވެ. ފުލުހުން އެކްސްގައި ކުރި ޕޯސްޓެއްގައި ބުނީ ބުރާސްފަތި ދުވަހުގެރޭ އެކަނި ވެސް މާލޭ ސިޓީން 48 އުޅަނދު ޓޯކޮށްފައިވާ ކަމަށެވެ. އަދި ބުރާސްފަތި ދުވަހު ފުލުހުން ބުނެފައިވަނީ ބުދަ ދުވަހުގެރޭ 40 އުޅަނދު ޓޯކޮށްފައިވާ ކަމަށެވެ. 2 ދުވަސްތެރޭ ފުލުހުން ޓޯކޮށްފައިވާ ވެހިކަލްތަކުގެ އަދަދު މިވަނީ 88ށް އަރާފައެވެ.

ފުލުހުން ބުނެފައިވަނީ އެއްގަމު ދަތުރުފަތުރުގެ ގާނޫނުގެ 7 ވަނަ މާއްދާގެ (ނ) އަދި އެއްގަމު އުޅަނދު ޕާކުކުރުމުގެ ގަވާއިދުގެ 14 ވަނަ މާއްދާގެ (ށ) ގެ ދަށުން ފިޔަވަޅު އަޅާނެ ކަމަށެވެ.

ފުލުހުން ބުނެފައިވަނީ މާލެ، ހުޅުމާލެ ފޭސް 1 އަދި 2 ގައި ގަވާއިދާ ހިލާފަށް ޕާކުކުރާ އުޅަނދުތަކާމެދު މި މަހުގެ 7 ވަނަ ދުވަހުގެ ފަހުން ފިޔަވަޅު އަޅާނެކަމަށް ފުލުހުން ނެރުނު ބަޔާނުގައި ބުނެފައިވެއެވެ. މީގެ ތެރޭގައި ގްރީން ޒޯން، ޕަބްލިކް ޓްރާންސްޕޯޓް ދުއްވާ މަގުތައް، މަގުތަކާއި ގޯޅިތަކުގެ ކަންމަތި، ސްކޫލް ހިމެނޭ ސަރަހައްދުތަކުގެ އިތުރުން އޮފީސް އިމާރާތްތަކާއި ހޮސްޕިޓަލްތަކާއި، ހާއްސަ އެހީއަށް ބޭނުންވާ މީހުންނަށް ހާއްސަކުރެވިފައިވާ ތަންތަނާއި މިސްކިތްތަކާއި އާންމު ގޭބީސީތަކާއި ގަރާޖުތަކަށް ވަދެނުކުމެހަދާ ފަރާތްތަކަށް ދަތިވާނެހެން ޕާކްކުރާ އުޅަނދު ފަހަރު ޓޯކުރާނެކަމަށް ފުލުހުން ވަނީ ބުނެފައެވެ.

ފުލުހުން ވަނީ ޕާކިންގ ޒޯން ފިޔަވައި އެހެންތަނެއްގައި ޕާކު ނުކުރުމަށްވެސް އިލްތިމާސްކޮށްފައެވެ. ނަމަވެސް މި ސަރުކާރުން މިހާތަނަށް އައި އިރު ޕާކިންގ ޒޯން ނުވަތަ މާލެއަށް އުޅަނދުތައް ތޮއްޖެހުމުގެ މައްސަލައަށް އެއްވެސް ހައްލެއް ގެނެސްފައި ނުވެއެވެ.