ހިލާލީ ގެއިން ނުކުމެވަޑައިގެންނެވިކަމަށް ދެކެވޭ ވާހަކަ ނައިބު ރައީސް ދޮގުކުރައްވައިފި
ހިލާލީގެ އަދިވެސް މަރާމާތުކުރަމުން ދާތީ، އެމަނިކުފާނު އަދި ހިލާލީގެއަކަށް ބަދަލުވެވަޑައިނުގަންނަވާ
ނައިބު ރައީސް އަލްއުސްތާޛު ހުސައިން މުހައްމަދު ލަތީފު
ނައިބު ރައީސް އަލްއުސްތާޛު ހުސައިން މުހައްމަދު ލަތީފު ހިލާލީ ގެއިން ނުކުމެވަޑައިގެންނެވިކަމަށް ދެކެވޭ ވާހަކަ އެމަނިކުފާނު ދޮގުކުރައްވައިފިއެވެ.
ނައިބު ރައީސް ހުސައިން ހިލާލީގެއިން ނިކުމެވަޑައިގެންނެވިކަމަށް ރިޕޯޓުކުރި ނޫހަކުން ބުނެފައިވަނީ، އެމަނިކުފާނު ހިލާލީގެއިން ނުކުމެވަޑައިގެން ހުޅުމާލޭ އެޕާޓްމަންޓަކަށް ބަދަލުވެވަޑައިގެންފައިވާ ކަމަށެވެ. އަދި، ނައިބު ރައީސް ހުސައިން ހިލާލީގެއިން ނުކުމެވަޑައިގަތީ، ސަރުކާރުގެ ތެރެއިން އެމަނިކުފާނަށް ޖާސޫސްކުރާތީ ކަމަށް ވެސް އެ ނޫހުގައި ވަނީ ރިޕޯޓުކޮށްފައެވެ.
މިކަމާ ގުޅޭގޮތުން ނައިބު ރައީސް ހުސައިން އަންގާރަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެއީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. އަދި އެފަދަ ވާހަކަތައް ފަތުރައިގެން މުޖުތަމަޢު ފަސާދަކުރުން ހުއްޓާލުމަށް އެ މަނިކުފާނު ވަނީ ގޮވާލައްފާއެވެ.
ބައެއް މީޑިއާތަކުން ނައިބު ރައީސް ހުސައިން ހިލާލީގެއިން ނުކުމެވަޑައިގެންނެވިކަމަށް ޚަބަރު ފަތުރަމުންދާއިރު، ހިލާލީގެ އަދިވެސް މަރާމާތުކުރަމުން ދާތީ އެމަނިކުފާނު އަދި ހިލާލީގެއަކަށް ބަދަލުވެވަޑައިނުގަންނަވައެވެ.
