ރޯދަމަހާ ދިމާކޮށް މޯލްޑިވްސް ކަސްޓަމްސް ސަރވިސް އިން 78 ޓަނުގެ މޭވާއާއި ތަރުކާރީ ކްލިއާކޮށްފިއެވެ.

ކަސްޓަމްސްއިން ހޮނިހިރު ދުވަހު އެކްސްގައި ކުރި ޕޯސްޓެއްގައި ބުނެފައިވަނީ، ރަމަޟާންމަހަށް ބޭނުންވާނެ ތަކެތީގެ ތެރެއިން 78 ޓަނުގެ މޭވާއާއި ތަރުކާރީ ކްލިއާ ކޮށްފައިވާ ކަމަށެވެ.

އެގޮތުން، ހޮނިހިރު ދުވަހުގެ ހަވީރު 15:30 އިން ފެށިގެން ރޭގަނޑު 20:00 އާ ހަމައަށް މިތަކެތި ކްލިއާ ކުރުމުގެ މަސައްކަތްކޮށް އެކަން ކާމިޔާބުކޮށްފައިވާކަމަށް ކަސްޓަމްސްއިން ވަނީ ބުނެފައެވެ.

މި ތަކެތީގެ ތެރޭގައި އަލުވި، ޓޮމާޓޯ، ބަރަބޯ، ކެބެޖް، ދޮންކެޔޮ، ކަރާ، ކިއުކަމްބާ އަދި އަނބު ހިމެނެއެވެ.