އެމްޑީޕީ ދޫކޮށް އަޅުގަނޑުގެ ނަފްސު ވިއްކައެއް ނުލާނަން: ސައީދު
މާޔޫސްކަމާއި އުނދަގޫ ތަކުލީފުތައް ލިބޭނެ އެއްވެސް ކަމަކަށް ތާއީދު ނުކުރައްވާނެ ކަމަށް ސައީދު ވިދާޅުވި
އަޙުމަދު ސައީދު މުޙައްމަދު
އެމްޑީޕީ ދޫކޮށް ނަފްސު ވިއްކާ ނުލައްވާނެކަމަށް ގައްދޫ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ ކެންޑިޑޭޓް އަޙްމަދު ސައީދު މުޙައްމަދު ވިދާޅުވެއްޖެއެވެ.
ސައީދު މިހެން ވިދާޅުވެފައިވަނީ ބުދަ ދުވަހުގެރޭ ގައްދޫ ދާއިރާގެ މާލެ ޖަގަހަ ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ސައީދު ވިދާޅުވީ އޭނާ ނަފްސު ނުގަނެވޭނެކަމަށާއި އަބަދުވެސް ހުންނަވާނީ އަމާނާތްތެރިކަމާއި ތެދުވެރިކަމާއެކު ރައްޔިތުންނަށް ޚިދުމަތް ކުރެއްވުމުގައި އެމްޑީޕީއަށް ކަމަށެވެ. އަދި އެމްޑީޕީގެ ސިޔާސަތުތައް ތަންފީޒުކުރުމަށާއި އެމްޑީޕީގެ ގޮވުންތަކަށް އިޖާބަދީ، މިއަދު މިއޮތް ސަރުކާރު ހަމަމަގަށް އެޅުވުމަށްޓަކައި އެމްޑީޕީގެ ލީޑަރޝިފާ އެއްކޮށް ހުންނަވާނެކަމުގެ ފުރިހަމަ ޔަގީންކަން ދެއްވާކަމަށް ވެސް ސައީދު ވިދާޅުވިއެވެ.
ސައީދު އިތުރަށް ވިދާޅުވީ މާޔޫސްކަމާއި އުނދަގޫ ތަކުލީފުތައް ލިބޭނެ އެއްވެސް ކަމަކަށް ތާއީދު ނުކުރައްވާނެ ކަމަށާއި، ރައްޔިތުންގެ އިހުސާސްތަކާ އެކު ރައްޔިތުންގެ ހައްގުގައި މަޖިލީހުގައި ވަކާލާތުކުރައްވާނެ ކަމުގައެވެ.
އަދި ހަމައެއާއެކު އެމްޑީޕީ އަބަދުވެސް މަސައްކަތް ކުރާނީ ރައްޔިތުންގެ ހެވޭ ލާބައަށް ކަމަށާއި އެ އިރެއްގައި ދިމާވެފައި އޮންނަ ތަކުލީފަކުން ރައްޔިތުން ސަލާމަތް ކުރުމަށް ކަމަށް ވެސް ސައީދު ވިދާޅުވިއެވެ.
އެހެންކަމުން، އަމާނާތްތެރިކަމާއި ތެދުވެރިކަމާއި އިޚުލާސްތެރިކަމާއެކު އެކަން ކުރާނެ މީހަކަށް ކެންޑިޑޭޓް ނަންބަރު ތިނެއް، އަޙުމަދު ސައީދު މުޙައްމަދަށް ވޯޓު ދެއްވުމަށް ސައީދު ވަނީ އެދިވަޑައިގެންފައެވެ.
