11 އަހަރުގެ ކައިވެންޏަށް ލިބުނު ފުރަތަމަ ދަރިންނަށް 5 މަސް ނުވަނީސް މި ދުނިޔެއާ ވަކިކޮށްލީ ބައްޕައާވެސް އެކުގައި!
އިޒްރޭލުން ދިން ވައިގެ ޙަމަލާގައި އެއް ޢާއިލާއަކުން މަރުވި 14 މެންބަރުންގެ ތެރެއިން އެންމެ ހަގު 2 މެންބަރުން
ރާނިޔާ އަބޫ އަންޒާ؛ ތުއްތު ދެދަރިންނާއި ފިރިމީހާ މަރުވި ޣައްޒާގެ ރަށްވެއްސެއް
އެއީ މި ފަހުގެ ތާރީޚުގައި އިންސާނިއްޔަތާ ދެކޮޅަށް ހިންގި އެންމެ ލާއިންސާނީ ޖަރީމާތަކާ ނުބައްދަލު ޤަތުލުޢާންމެއް ތަޙައްމަލު ކުރަމުން ދާ ރަށެކެވެ. އެއީ ބޯހިޔާވަހިކަން ފޯރުކޮށްދިން މީހުންގެ އަތުން އެ ބިންތައް ފޭރިގަނެ، އިސްތިއުމާރީ އަޅުވެތިކަމުގައި ޤައިދުކޮށްގެން ވެސް ހިތް ނުފުރުނު ނިރުބަވެރި އިޒްރޭލުގެ މުށްދަށުލާފައި އޮތް ޣައްޒާއެވެ. 5 މަހާ ގާތްވަމުން ދާ ޤަތުލުޢާންމުގައި ޣައްޒާއިން މަރުވި މީހުންގެ ޢަދަދު 30000 އަށް ވުރެ މައްޗަށް އަރައެވެ. ލައްކައަކާ ގާތް ކުރާ ޢަދަދެއްގެ ބަޔަކު ވަނީ ޒަޚަމްވެފައެވެ. މަރާއި ޒަޚަމްގެ ކޭސްތަކުގެ ބޮޑު ބައެއް ހިއްސާކުރަނީ އަންހެނުންނާ ކުޑަކުދިންނެވެ.
ވިސާމްއާއި ނަޢީމް އަބޫ އަންޒާ އަކީ ޣައްޒާއަށް އުފަން، އެއްމާބަނޑު ދެބެންނެވެ. މި ދުނިޔެއަށް ފުރަތަމަ ނޭވާލީ، އިޒްރޭލުން ޤަތުލުޢާންމު ހިންގަން ފެށިތާ ކުރީކޮޅުގައެވެ. މިއިން ދުވަހުކު ނިންމާލަފާނެ ކަމުގެ ކޮޅުމަތިވެސް ފެންނަން ނެތް ޤަތުލުޢާންމުގައި ދެބެންވެސް ވަނީ މި ދުނިޔެ ދޫކޮށްފައެވެ. ޖަނާޒާ އޮތީ އާދީއްތަ ދުވަހުއެވެ. ޣައްޒާގެ ޞިއްޙަތާ ބެހޭ އިދާރާތަކުން ދީފައި ވާ މަޢުލޫމާތަށް ބަލާއިރު ވިސާމްއާއި ނަޢީމް އަބޫ އަންޒާއަކީ، ރަފަޙަށް ޢަމާޒުކޮށް، ހޮނިހިރު ދުވަހުގެ ރޭ އިޒްރޭލުން ދިން ވައިގެ ޙަމަލާގައި އެއް ޢާއިލާއަކުން މަރުވި 14 މެންބަރުންގެ ތެރެއިން އެންމެ ހަގު 2 މެންބަރުންނެވެ.
ދެބެންގެ ޖަނާޒާ ކުރިއަށް ދިޔަ ވަގުތު، މަންމަ، ރާނިޔާ އަބޫ އަންޒާގެ ކިބައިން އެ ފެނުނު ކަންކަމަކީ ކޮންމެކޮންމެ މީހެއްގެ ހިތަށް ކެތްވާނެ ފަދަ މަންޒަރުތަކެއް ނޫނެވެ. ކަފުނުގައި އޮތް ދެބެންގެ ތެރެއިން އެއްކުއްޖަކު ނަގާ، ގަޔާލާ ބޮނޑިކޮށްލުމަށްފަހު، ބޮލާ ވީ ކޮޅުގައި ފިރުމަމުން ދިޔަ އިރު، ރާނިޔާގެ ހިތަށް އަރާފައިބަމުން ދިޔަ އެއްޗެއް ވަޒަން ކޮށްލެވޭނީވެސް ވަކި އެހެން ކާކަށް ހެއްޔެވެ؟ ދެބެންގެ ތެރެއިން އަނެއް ކުއްޖާ އޮތީ ޖަނާޒާގައި ބައިވެރިވަމުން ދިޔަ އެހެން މީހެއްގެ އަތުގައެވެ. އެ ތުއްތު ކުއްޖާ ލައްވާފައި އޮތް މަޑު ނޫކުލައިގެ ނިދާ ހެދުމެއް ކަން، ކަފުނުގެ ތެރެއިން ކޮންމެވެސް ވަރަކަށް ފެންނަން ހުއްޓެވެ.
"އަހަރެންގެ ހިތް އެ ދިޔައީ" އޭ ބުނެ، ރާނިޔާ ދިޔައީ ގިސްލާ ރޮމުންނެވެ. އަބަދުގެ އަބަދަށް ރާނިޔާއާ ވެކިވެ ދިޔައީ އޭނާ ބަނޑުއަޅާ ވިހޭ އެއްމާބަނޑު ދެބެން އެކަންޏެއް ނޫނެވެ. ރާނިޔާގެ ފިރިމީހާވެސް އޮތީ ކަފުނުގައެވެ. ކައިރީގައި ތިބި މީހުން ދިޔައީ، ރާނިޔާގެ ހިތަށް ކުޑަނަމަވެސް ހަމަޖެހުމެއް ހޯދައިދެވޭތޯ މަސައްކަތް ކުރަމުންނެވެ. ނަމަވެސް، އަތުގައި އޮތް ތުއްތު ދަރިފުޅު ވަޅުލަން ދޫކޮށްލަންވެސް އޭނާ ބޭނުމެއް ނުވިއެވެ. އެދެމުން ދިޔައީ އެ ދަރިފުޅު އޭނާ ގާތުގައި ބާއްވައި ދިނުމަށެވެ.
އަބޫ އަންޒާގެ ޢާއިލާ ދިރިއުޅެމުން ދިޔަ ގެއަށް އިޒްރޭލުން ދިން ޙަމަލާގައި 5 ކުއްޖެއްގެ ފުރާނަ ވަނީ ގެއްލިފައެވެ. ވިސާމްއާއި ނަޢީމް އަބޫ އަންޒާ އަކީ، 11 އަހަރުގެ ކައިވެންޏަށް ލިބުނު ފުރަތަމަ ދަރިންނެވެ.
ޢާއިލާ މެންބަރުން ކިޔައިދިން ގޮތުގައި ވިސާމްއާއި ނަޢީމް އަބޫ އަންޒާ އުފަންވީ މީގެ 4 މަހެއްހާ ދުވަސް ކުރިންނެވެ. އެއީ އިޒްރޭލުން ޤަތުލުޢާންމު ފެށިތާ ގާތްގަނޑަކަށް މަހެއްހާ ދުވަސް ފަހެވެ.
ރާނިޔާ އުންމީދު ކުރަމުން ދިޔައީ ރަމަޟާން މަހަށް ނަމަވެސް ޙަމަލާ ބަދަލު ކުރުން މަޑުޖައްސާލާނނެ ކަމަށެވެ. ރާނިޔާއާއި އޭނާގެ ޢާއިލާއިން ދިޔައީ ރަމަޟާން މަހަށް ތައްޔާރުވެސް ވަމުންނެވެ. އެކަމަކު، ދިރިއުޅުމައިގެން ދެން ކުރިއަށް ދާނީ ކިހިނެއް، ކަމެއް ރާނިޔާއަކަށް ވިސްނައިގަންނާކަށް ނޭނގެއެވެ.
އަބޫ އަންޒާ ޢާއިލާއިން މަރުވި މީހުންގެ ހަށިގަނޑުތައް އަތުރާލާފައި ހުރީ އެކަކާޖެހި އަނެކަކު ވާ ގޮތަށް، ކަޅުކުލައިގެ ބޮޑީބޭގްތަކުގައެވެ. އެތަނުން އެއް ބޮޑީބޭގްގެ މަތީގައި ބޯ އަޅާލައިގެން ރޯން އިން ފިރިހެނަކުވެސް އެތާ އިނެވެ. ބޮޑީބޭގްގައި އޮތީ އެމީހާގެ ދަރިފުޅެވެ. އެ ކުއްޖާވެސް އޮތީ ނިދާހެމުގައެވެ.
