5 މާރޗުގެ ނިޔަލަށް މަސްވެރިންނަށް ދޭންޖެހޭ ފައިސާ ދެއްވާނެކަމަށް ވިދާޅުވިނަމަވެސް އެކަމެއް ނުވި، އަނެއްކާވެސް އައު ޑެޑްލައިނެއް
ރަަމަޟާން މަަހަށް މިހާރު އޮތް ބެކްލޮގް ސާފުކޮށް، ހުރިހާ ފައިސާއެއް ދައްކަވާނެ ކަމަށް ޝިޔާމް މިހާރު ވިދާޅުވޭ
މަސްވެރިކަމާ ބެހޭ ވުޒާރާގެ ވަޒީރު އަޙްމަދު ޝިޔާމް
މަސްވެރިންނަށް ނުދެވި ހުރި ފައިސާގެ އަދަދަކީ 280 މިލިޔަން ރުފިޔާ ކަމަށާއި އެ ފައިސާ މާރޗު 5 ގެ ނިޔަލަށް ދައްކާ ޚަލާސް ކުރައްވާނެކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވިނަމަވެސް، އަނެއްކާވެސް ސަރުކާރުގެ ރާގު ބަދަލުވެއްޖެއެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިން ދެންނެވި ސުވާލަށް ޖަވާބު ދެއްވަމުން މިިނިސްޓަރު ވިދާޅުވީ، ކޫއްޑޫގައި ކުރިއަށްދިޔަ މުޒާހަރާގައި ދެ ތާރީޚެއް ދެއްވާފައިވާނެ ކަމަށެވެ.
އެގޮތުން 26 ފެބްރުއަރީއަށް 126 މިލިއަން ރުފިޔާ ދޫކުރައްވާފައިވާނެ ކަމަށާއި، ދެން ދެއްވި ތާރީޚަކީ 5 މާރޗުކަމަށް މިނިސްޓަރު ވިދާޅުވިއެވެ.
ޝިޔާމް ވިދާޅުވީ، 5 ވަނަ ދުވަހު 50 މިލިއަން ދޫކުރުމުގެ މަސައްކަތް ފަށާފައިވާ ކަމަށާއި، ބާކީ ހުރި ފައިސާ ވެސް ދޫކުރަމުންދާނެ ކަމަށެވެ.
އަދި ކުރިއަށް އޮތް ރަަމަޟާން މަަހަށް މިހާރު އޮތް ބެކްލޮގް ސާފުކޮށް ހުރިހާ ފައިސާއެއް ސަރުކާރުން ދައްކާނެ ކަމަށް ޝިޔާމް މިހާރު ވިދާޅުވެއެވެ.
އެހެންނަމަވެސް ކުރިން ޝިޔާމް ވިދާޅުވެފައިވަނީ މަސްވެރިންނަށް ނުދެވި ހުރި ފައިސާގެ އަދަދަކީ 280 މިލިޔަން ރުފިޔާ ކަމަށާއި އެ ފައިސާ މާރޗު 5 ގެ ނިޔަލަށް ދައްކާ ޚަލާސް ކުރާނެކަމަށެވެ. އޭރު ޝިޔާމް އެގޮތަށް ވިދާޅުވެފައިވަނީ ފައިސާ ނުދޭ މައްސަލައާ ގުޅިގެން ގއ. ކޫއްޑޫގައި ގިނަ އަދަދެއްގެ މަސްވެރިން އިހުތިޖާޖުކުރަން ފެށުމާއި ގުޅިގެންނެވެ.
ޝިޔާމް އޭރު ވިދާޅުވީ، މި ސަރުކާރަށް ވާރުތަވީ 250 ވަރަކަށް މިލިޔަން ރުފިޔާ އާއެކު، އޭރު ނުދެވި ހުރި ޖުމްލަ 280 މިލިޔަން ރުފިޔާގެ ބެކްލޮގު އެއްކޮށް މާރޗު މަހުގެ 5 ވަނަ ދުވަހުގެ ނިޔަލަށް ސަރުކާރުން ނިންމާނެކަމަށެވެ.
މި ބައްދަލުވުމުގައި ނޫސްވެރިން ވަނީ މިހާރު މަސްވެރިންނަށް ނުދެވި ހުރީ ސީދާ ކިހާ ފައިސާއެއްތޯ ވެސް ސުވާލުކޮށްފައެވެ.
އޭގެ ޖަަވާބުގައި ޝިޔާމް ވިދާޅުވީ، 5 މާރޗުގައި ދޫކުރަން ނިންމި 50 މިލިއަނާއެކު، އެ ދުވަހުގެ ނިޔަލަށް 147 މިލިއަނެއްހާ ރުފިޔާ ނުދެވި ހުރި ކަމަށެވެ.
އެ ފައިސާ ރޯދަ މަސް އަންނަންވާއިރަށް ދޫކުރައްވާނެކަަމަށް ޝިޔާމް ވިދާޅުވިއެވެ.
