އަންޗެލޮޓީ ދެކޭ ގޮތުގައި ލައިޕްޒިގްގެ ފޯވާޑް ލައިން ވަރުގަދަވާނެ!

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ޖަރުމަނުގެ އާރްބީ ލައިޕްޒިގާ ދެކޮޅަށް ނުކުންނައިރު، އެ ޓީމުގެ ފޯވާޑް ލައިން ވަރުގަދަ ވާނެ ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

މި ދެ ޓީމު ލައިޕްޒިގްގެ ދަނޑުގައި ކުޅުނު ފުރަތަމަ ލެގުގެ މެޗު 1-0 އިން ކާމިޔާބު ކުރީ ރެއާލް އެވެ. އެ މެޗުގައި ވެސް ލައިޕްޒިގުން ލަނޑު ޖެހުމަށް މަސައްކަތްކޮށް، ނުރައްކާތެރި ހަމަލާތަކެއް އުފެއްދިކަން އަންްޗެލޮޓީ ވަނީ ފާހަގަކޮށްފަ އެވެ. ނަމަވެސް އެ މެޗުގައި ރެއާލްގެ ގޯލު ކީޕަރު އެންޑްރީ ލުނިން ރަނގަޅު ސޭވްތަކެއް ކުރި ކަމަށާއި ރެއާލްގެ ޑިފެންސްގައި ތިބި ކުޅުންތެރިން ވެސް ރަނގަޅު ކުޅުމެއް ދެއްކި ކަމަށް އޭނާ ބުންޏެވެ.

އަންޗެލޮޓީ ބުނީ ފުރަތަމަ ލެގުގެ މެޗާ އަޅާ ބަލާއިރު، ދެ ވަނަ ލެގުގެ މެޗު ތަފާތު ވާނެ ކަމަށް ޤަބޫލު ކުރެވޭ ކަމަށެވެ. ރެއާލްގެ އަމިއްލަ ދަނޑުގައި ކުޅެން ޖެހުނު ނަމަވެސް، ލަައިޕްޒިގްގެ ފޯވާޑް ލައިނާ މެދު ސަމާލުވާން ޖެހޭނެ ކަމަށް އޭނާ ބުންޏެވެ. ޚާއްސަކޮށް ކުރީ މެޗާ އެއްގޮތަށް ނުވަތަ އެއަށްވުރެ ރަނގަޅަށް ޑިފެންސްގައި ސަމާލުކަން ދޭން ޖެހޭނެ ކަމަށް އޭނާ ދެކެ އެވެ.

މީގެ އިތުރުން އަންޗެލޮޓީ ބުނީ ފުރަތަމަ ލެގުގައި ރެއާލުން ވަރަށް ރަނގަޅަށް ކަންކަން ދެނެގަނެފައިވާނެ ކަމަށާއި، ދެ ވަނަ ލެގަށް ނިކުންނައިރު އެކަންކަމަށް ސަމާލުކަން ދޭނެ ކަމަަށެވެ. ޚާއްސަކޮށް ރަނގަޅު ކުރަން ފާހަގަވެފައި ހުރި ކަންކަމަށް އިތުރަށް މަސައްކަތް ވެސް ކޮށްފައިވާނެ ކަމަށާއި، ރެއާލްގެ ހުރިހާ ކުޅުންތެރިންނަށް ވެސް އޭނާގެ ފުރިހަމަ އިތުބާރު އޮންނާނެ ކަމަށް އަންޗެލޮޓީ ވަނީ ބުނެފަ އެވެ.

ރެއާލް އާއި ލައިޕްޒިގް، ރެއާލްގެ ދަނޑުގައި ކުޅޭ މެޗު ފަށާނީ ބުދަ ދުވަހުގެ ރޭ ދެންވަރު އެކެއް ޖަހާއިރު އެވެ.