ޖަރުމަނު އެފްއޭގެ ކުރީގެ ދެ ރައީސުންނާ ދެކޮޅަށް ޝަރީއަތް ފަށައިފި

ޖަރުމަނު ފުޓުބޯޅަ އެސޯސިއޭޝަންގެ ކުރީގެ ދެ ރައީސުން ކަމަށްވާ، ތިއޯ ޒްވާންޒިގާ އަދި ވުލްފްގޭންގް ނިއޭސްބަކާ ދެކޮޅަށް ކުރާ ދައުވާގެ ޝަރީއަތް ފަށައިފި އެވެ.

ޖަރުމަނު އެފްއޭގެ ކުރީގެ ދެ ރައީސުންނާ ދެކޮޅަށް ކުރާ ދައުވާ އަކީ، 2006 ވަނަ އަހަރު އޮތް ފީފާ ވޯލްޑް ކަޕް ފުޓުބޯޅަ މުބާރާތުގެ ޓެކްސް ފައިސާ އަށް އޮޅުވާލާފައިވާ ކަމުގެ ދައުވާ އެވެ. އެ ދައުވާ އުފުލީ ދެ ރައީސުންގެ އިތުރުން، ކުރީގެ ޖެނެރަލް ސެކްރެޓަރީ ހޯސްޓް ޝްމިޓްއާ ދެކޮޅަށް ވެސް ވަނީ ދައުވާ އުފުލައިފަ އެވެ. ނަމަވެސް އެ ބޭފުޅުން ވަނީ ދައުވާ އަށް އިންކާރު ކޮށްފަ އެވެ.

އެ ދައުވާގައި ބުނެފައި ވަނީ 2006 ވަނަ އަހަރު ޖަރުމަނުގަައި ބޭއްވި ފީފާ ވޯލްޑް ކަޕް ފުޓުބޯޅަ މުބާރާތާ ގުޅުން ހުރި 14.8 މިލިއަން ޑޮލަރު، އެހެން ކަންކަމަށް ބޭނުންކޮށްފައިވާ ކަމަށެވެ. އެ ދައުވާގައި ޕްރޮސެކިއުޓަރުން ބުނެފައި ވަނީ، ދައުވާ ލިބޭ ތިން ފަރާތް ވެސް، ޓެކްސް ނުބައިކޮށް ފައިލު ކޮށްފައިވާ ކަމަށާއި، އެކަން ކޮށްފައި ވަނީ އެނގި ހުރެ ކަމަށެެވެ.

މީގެ އިތުރުން 2006 ވަނަ އަހަރު ބޭއްވި އިވެންޓަކަށް ޖަރުމަނު އެފްއޭއިން 6.7 މިލިއަން ޔޫރޯގެ ފައިސާ ޚަރަދު ކޮށްފައިވީ ކަމަށް އެ އެސޯސިއޭޝަނުން ބުނެފައިވީ ނަމަވެސް، ހަގީގަތުގައި އެ ފައިސާ ބޭނުންކޮށްފައި ވަނީ އެހެން ބޭނުމަކަށް ކަމަށް ބުނެފައިވެ އެވެ. ހަމަ އެހެންމެ އެއީ ޓެކުހާ ހިލާފަށް އޮފްސެޓް ކޮށްގެން ވާނެ ފައިސާއެއް ނޫން ކަމަށް ވެސް ޕްރޮސެކިއުޓަރުން ވަނީ ބުނެފަ އެވެ.

މި މައްސަލައިގެ ޝަރީއަތް ފަށާފައިވާއިރު، މީގެ ކުރިން ވެސް އެކި ފަހަރުގެ މަތިން ވަނީ އެ ޝަރީއަތްތައް ފެށުމަށް މަސައްކަތް ކޮށްފަ އެވެ.