ފަހަތުން އަރައި ވިލިމާލެ ބަލިކޮށް، ޗެމްޕިއަން ގަން ފައިނަލަށް!

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024 ގެ ސެމީ ފައިނަލްގެ ފުރަތަމަ މެޗުގައި، ފަހަތުން އަރައި ވިލިމާލެ ބަލިކޮށް އެންމެ ފަހުގެ ޗެމްޕިއަން، ލ.ގަމުން ފައިނަލަށް ދަަތުރުކޮށްފި އެވެ.

ހޯމަ ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ސެމީ ފައިނަލްގެ ފުރަތަމަ މެޗު ގަމުން ކާމިޔާބު ކުރީ 5-3 އިންނެވެ. އެއީ ފުރަތަމަ ހާފުގައި ވިލިމާލެ އިން ދެ ލަނޑު ޖަހައި ލީޑު ނަގާފައި ވަނިކޮށް، ފަހަތުން އަރައި ފަސް ލަނޑު ޖަހައިގެންނެވެ.

ފުރަތަމަ ހާފުގައި ވިލިމާލެ އިން ދެ ލަނޑުގެ ލީޑެއް ހޯދީ ޢަބްދުﷲ ޝައްފާން (ޝާކާ)ގެ ދެ ލަނޑުންްނެވެ. ނަމަވެސް ދެ ވަނަ ހާފު ފަށައިގެން ކުރީ ކޮޅު ގަމުން ވަނީ ތިން ލަނޑު ޖަހައި، މެޗުގައި ލީޑު ނަގައިފަ އެވެ. އެ ތިން ލަނޑު ވެސް އެ ޓީމަށް ޖަހައިދިނީ ކެޕްޓަން ޙުސެއިން ޝަރީފް (އޮންލީ) އެވެ. އެ ޓީމުގެ ހަތަރު ވަނަ ލަނޑު ޖެހީ އަޙުމަދު ޙަލީމް (އައްމަޑޭ) އެވެ. ދެ ލަނޑުގެ ލީޑެއްގައި ގަމުން އޮއްވާ، ވިލިމާލެ އިން ތިން ވަނަ ލަނޑު ޖަހައި ފަރަގު ކުޑަ ވެސް ކުރި އެވެ. އެއީ ފަސް ފައުލު ހަމަވެގެން ލިބުނު ދުރު ޕެނަލްޓީ ކާމިޔާބުކޮށް ޝާކާ ޖެހި ލަނޑުންނެވެ. އެ ލަނޑާއެކު އޭނާ ވަނީ ހެޓްރިކް ވެސް ހަމަކޮށްފަ އެވެ. އޭގެ ފަހުން ގަމުގެ ފަސް ވަނަ ލަނޑު ޖެހީ ޙުސެއިން ނާޝިދު (ނާއްޓޯ) އެވެ.

ގަމުން ފަސް ވަނަ ލަނޑެއް ޖެހި ފަހުން، ވިލިމާލެ އިން ވަނީ ފަރަގު ކުޑަ ކުރުމަށް ވެސް މަސައްކަތް ކޮށްފަ އެވެ. އެ ޓީމަށް ދުރު ޕެނަލްޓީ ލިބުނުއިރު، ކާމިޔާބު ކުރެވޭ ގޮތެއް ނުވި އެވެ.