ބެލިންހަމަށް ރަތް ކާޑު ދެއްކުމުން، އަންޗެލޮޓީ ހިތްހަމަ ނުޖެހިފައި!

ރެއާލް މެޑްރިޑަށް ކުޅެމުން އަންނަ އިންގްލެންޑުގެ ޖޫޑް ބެލިންހަމަށް ރަތް ކާޑު ދެއްކުމުން، އެ ޓީމުގެ ކޯޗު ކާލޯ އަންޗެލޮޓީ ހިތްހަމަ ނުޖެހިއްޖެ އެވެ.

ބެލިންހަމަށް ރަތް ކާޑު ދެއްކީ ސްޕެނިޝް ލީގުގައި ރެއާލުން ވެލެންސިއާއާ ދެކޮޅަށް ކުޅުނު މެޗުގަ އެވެ. އެ މެޗުގެ އެންމެ ފަހު ވަގުތު ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ. މެޗުގެ ފަހު ވަގުތު ބެލިންހަމް ލަނޑު ޖެހުމުގެ ކުރިން ރެފްރީ ވަނީ ފަހު ކަށިގަނޑު ފުމެލައިފަ އެވެ. އެކަމާ ބެލިންހަމް އަދި ރެއާލްގެ ކުޅުންތެރިން ވަނީ ހިތްހަމަ ނުޖެހުން ފާޅުކޮށް، ދެކޮޅު ހަދައިފަ އެވެ. އެކަމުގެ ތެރެއިން ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ.

އެ މެޗަށްފަހު ވާހަކަ ދައްކަމުން ރެއާލްގެ ކޯޗު އަންޗެލޮޓީ ބުނީ، ދައްކާނެ މާބައިވަރު ވާހަކައެއް ނެތް ކަމަށާއި، ނަމަވެސް މެޗުގައި ހިނގައިދިޔަ ކަމަކީ، ބަލައި ގަންނަން އުނދަގޫ ކަމެއް ކަމަށެވެ. ޚާއްސަކޮށް ބެލިންހަމަށް ދެއްކު ރަތް ކާޑުގެ ވާހަކަ އޭނާ ފާހަަގަ ކުރި އެވެ. އަންޗެލޮޓީ ބުނީ އެކަމާ ހިތްހަމަ ނުޖެހޭ ކަމަށެވެ. އެކަން ފާހަގަކޮށް އަންޗެލޮޓީ ބުނީ ބެލިންހަމް ރެފްރީ އަށް އިޙުތިރާމް ކުޑަ ކުރުމުގެ ގޮތުން ކަމެއް ނުކުރާ ކަމަށާއި، ބެލިންހަމް ބުނީ އެއީ ލަނޑެއް ކަމަށެވެ. ނަމަވެސް އެކަމުގެ ސަބަބުން ރެފްރީ ރަތް ކާޑު ދެއްކި ކަމަށާއި، އެއީ ކިހިނެއްވެ ދެއްކި ކާޑެއް ކަން ވެސް ސާފު ނުވާ ކަމަށް އަންޗެލޮޓީ ވަނީ ބުނެފަ އެވެ.

ވެލެންސިއާގެ ދަނޑުގައި ކުޅުނު މެޗުގައި އެ ޓީމުން ދެ ލަނޑު ޖަހައި ލީޑު ނަގާފައި ވަނިކޮށް، ރެއާލުން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ. ފަހު ވަގުތު ބެލިންހަމް ލަނޑު ޖެހި ނަމަވެސް، އެ ލަނޑު ޖަހަން ބޯޅަ ހުރަސް ކުރަނިކޮށް ރެފްރީ ވަނީ މެޗު ނިންމާލައިފަ އެވެ.

ލީގު ތާވަލްގެ އެއް ވަނައިގައި ރެއާލް އޮތީ މިހާތަނަށް ކުޅުނު 27 މެޗުން 66 ޕޮއިންޓު ހޯދައިގެންނެވެ. ރެއާލަށް ވުރެ އެއް މެޗު މަދުން ކުޅެގެން ދެ ވަނައިގައި ޖިރޯނާ އަށް ލިބެނީ 59 ޕޮއިންޓެވެ.