އިނގިރޭސި ނެޝަނަލް ލީގް ނޯތްގައި ބްރެޑްފޯޑް ޕާކް އެވެނިއު އަތުން 1-2 ގެ ނަތީޖާއިން ސަލްފޯޑް ސިޓީ މޮޅުވި މެޗުގައި ދަނޑުމައްޗަށް ކުޑަކަމު ދިޔުމުން، ރަތްކާޑު ދައްކާ ދަނޑުން ފޮނުވާލި ސަލްފޯޑް ސިޓީގެ މެކްސް ކްރޯކޮމްބޭ މައާފަށް އެދިއްޖެއެވެ.

މެކްސް އޭނާގެ ޓުވިޓާ އެކައުންޓުން ކުރި ޓުވީޓެއްގައި ބުނީ ދަނޑުމަތީގައި އޭނާއަށް ކުރެވުނީ ގޯސްކަމެއް ކަމަށާއި، އެކަން ކުރީ އެއްވެސް މީހަކަށް އުނދަގޫކުރުމުގެ ނިޔަތުގައި ނޫން ކަމަށެވެ. އެހެން ނަމަވެސް އޭނާ ބުނީ މެޗުގައި ބައްދަލުކުރި ސަލްފޯޑް ސިޓީ އަދި ބްރެޑްފޯޑް ޕާކް އެވެނިއު އަދި އެ ދެޓީމުގެ ސަޕޯޓަރުންނަށް މައާފަށް އެދޭކަމަށެވެ.

ރިޕޯޓްތައް ބުނާގޮތުން މެޗުގެ 86 ވަނަ މިނެޓުގައި ނިއުޒިލޭންޑްގެ 23 އަހަރުން ދަށުގެ ކީޕަރު މެކްސް އަށް ރެފްރީ ސީދާ ރަތްކާޑު ދެއްކުމުން ފުރަތަމަ އޭނާ ކުރި ކުށް ސަޕޯޓަރުންނަށް އަދި ކުޅުންތެރިންނަށްވެސް ސާފެއްނުވިއެވެ. އެހެން ނަމަވެސް ރެފްރީ ފަހުން ވަނީ ކުޅުންތެރިން އަދި ބެންޗަށް ވެސް އެކަން ސާފްކޮށްދީފައިކަމަށް ރިޕޯޓްތައް ބުނެއެވެ.

މެންޗެސްޓާ ޔުނައިޓެޑްގެ ލެޖެންޑުން ކަމަށްވާ ރަޔާން ގިގްސް، ނިކީ ބަޓް، ގެރީ ނެވިލް އަދި ފިލް ނެވިލް ހިއްސާވާ ސަލްފޯޑް ސިޓީގެ ކީޕަރު މެކްސްގެ އަމަލާއެކު އޭނާ ވަނީ ތިން މެޗަށް ސަސްޕެންޑުވެސްކޮށްފައެވެ.